പുറപ്പെടുന്ന സമയം കഴിഞ്ഞിട്ടും ഏറെ നേരം കാത്തിരുന്ന യാത്രക്കാര്‍ കാര്യമന്വേഷിച്ചപ്പോഴാണ് സാങ്കേതിക കാരണം പറഞ്ഞ് വിമാനം റദ്ദാക്കിയതായി അധികൃതര്‍ അറിയിച്ചത്.
ദില്ലി: യാത്രക്കാരും വിമാനവും തയ്യാറായിട്ടും പറത്താന്‍ പൈലറ്റില്ലാത്തതിനെ തുടര്‍ന്ന് സര്‍വീസ് റദ്ദാക്കി. വിമാനത്തില്‍ കയറിയ ശേഷമാണ് യാത്രക്കാരെ തിരിച്ചിറക്കിയത്. ഛണ്ഡിഗഡില്‍നിന്ന് ദില്ലിയിലേക്ക് പുറപ്പെടേണ്ടിയിരുന്ന ഇന്‍ഡിഗോ വിമാനമാണ് അപ്രതീക്ഷിതമായി യാത്ര റദ്ദാക്കിയത്. ബുധനാഴ്ച രാവിലെ 7.55ന് പുറപ്പെടേണ്ടിയിരുന്ന വിമാനമാണ് റദ്ദാക്കിയത്. ഇതോടെ 183 യാത്രക്കാരുടെ യാത്ര മുടങ്ങി. പുറപ്പെടുന്ന സമയം കഴിഞ്ഞിട്ടും ഏറെ നേരം കാത്തിരുന്ന യാത്രക്കാര്‍ കാര്യമന്വേഷിച്ചപ്പോഴാണ് സാങ്കേതിക കാരണം പറഞ്ഞ് വിമാനം റദ്ദാക്കിയതായി അധികൃതര്‍ അറിയിച്ചത്.
പൈലറ്റ് ലഭ്യമല്ലാത്തിനെ തുടര്‍ന്നാണ് വിമാനം റദ്ദാക്കിയതെന്ന് പിന്നീട് വ്യക്തമായി. ദേശീയമാധ്യമമായ ഹിന്ദുസ്ഥാന്‍ ടൈംസാണ് വാര്‍ത്ത റിപ്പോര്‍ട്ട് ചെയ്തത്. മഴകാരണം പൈലറ്റുമാര്‍ ദില്ലിയില്‍ കുടുങ്ങിയതാണ് സര്‍വീസ് മുടങ്ങാന്‍ കാരണമെന്ന് ഇന്‍ഡിഗോ അധികൃതര്‍ വിശദീകരിച്ചു.