അധോലോക കുറ്റവാളി രവി പൂജാരി ദക്ഷിണാഫ്രിക്കയിൽ വച്ച് പിടിയിലായതായി റിപ്പോർട്ട്
Synopsis
ബുര്ക്കിനഫാസോ പാസ്പോര്ട്ട് ഉപയോഗിച്ച് ആന്റണി ഫെര്ണാണ്ടസ് എന്ന വ്യാജ പേരിലാണ് രവി പൂജാരി ആഫ്രിക്കയില് കഴിഞ്ഞിരുന്നത്. ഇന്ത്യയില് ഇയാള്ക്കെതിരെ കൊലക്കേസുകള് അടക്കം ഇരുന്നൂറിലേറെ കേസുകള് രജിസ്റ്റര് ചെയ്തിട്ടുണ്ട്.
കേപ്ടൗൺ: അധോലോക കുറ്റവാളി രവി പൂജാരി ദക്ഷിണാഫ്രിക്കയില് അറസ്റ്റിലായെന്ന് റിപ്പോര്ട്ട്. രവി പൂജാരിയെ ഇന്ത്യയിലേക്ക് കൊണ്ടുവരാന് കര്ണാടക പോലീസ് സംഘവും റോയുടെ ഉദ്യോഗസ്ഥരും സെനഗലില് എത്തി. ഞായറാഴ്ചയോ തിങ്കളാഴ്ചയോ പൂജാരിയെ ഇന്ത്യയില് എത്തിക്കുമെന്നാണ് സൂചന. ഇന്ത്യന് അന്വേഷണ ഏജന്സികളുടെ നിരന്തരമായ ഇടപെടലിന് പിന്നാലെയാണ് രവി പൂജാരിയെ പിടികൂടിയതെന്ന് അധികൃതർ വ്യക്തമാക്കുന്നു.
കഴിഞ്ഞദിവസം ദക്ഷിണാഫ്രിക്കയിലെ ഒരു ഉള്നാടന് ഗ്രാമത്തില്നിന്നാണ് ഇയാളെ പിടികൂടിയതെന്നാണ് വിവരം. നേരത്തെ സെനഗലില് പിടിയിലായ രവി പൂജാരി ജാമ്യം നേടിയതിന് പിന്നാലെ ദക്ഷിണാഫ്രിക്കയിലേക്ക് കടക്കുകയായിരുന്നു. അറസ്റ്റിലായ രവി പൂജാരിയെ പിന്നീട് സെനഗലില് എത്തിച്ചു. രവി പൂജാരിയെ പിടികൂടാനുള്ള ഓപ്പറേഷനില് ദക്ഷിണാഫ്രിക്കന് ഏജന്സികളും സഹായിച്ചു. ബുര്ക്കിനഫാസോ പാസ്പോര്ട്ട് ഉപയോഗിച്ച് ആന്റണി ഫെര്ണാണ്ടസ് എന്ന വ്യാജ പേരിലാണ് രവി പൂജാരി ആഫ്രിക്കയില് കഴിഞ്ഞിരുന്നത്. ഇന്ത്യയില് ഇയാള്ക്കെതിരെ കൊലക്കേസുകള് അടക്കം ഇരുന്നൂറിലേറെ കേസുകള് രജിസ്റ്റര് ചെയ്തിട്ടുണ്ട്. അടുത്തിടെ കൊച്ചിയില് നടന്ന ബ്യൂട്ടി പാര്ലര് വെടിവെപ്പ് കേസിലും രവി പൂജാരിക്ക് പങ്കുണ്ട്.
ഇന്ത്യയിലെയും ലോകമെമ്പാടുമുള്ള എല്ലാ India News അറിയാൻ എപ്പോഴും ഏഷ്യാനെറ്റ് ന്യൂസ് വാർത്തകൾ. Malayalam News തത്സമയ അപ്ഡേറ്റുകളും ആഴത്തിലുള്ള വിശകലനവും സമഗ്രമായ റിപ്പോർട്ടിംഗും — എല്ലാം ഒരൊറ്റ സ്ഥലത്ത്. ഏത് സമയത്തും, എവിടെയും വിശ്വസനീയമായ വാർത്തകൾ ലഭിക്കാൻ Asianet News Malayalam