വീണ്ടും മാപ്പ്; പ്രധാനമന്ത്രിയുടെ വീഡിയോ നീക്കംചെയ്തതിൽ കേന്ദ്ര ഐടി മന്ത്രിയോട് ക്ഷമാപണം നടത്തി മെറ്റയുടെ ഉന്നത ഉദ്യോ​ഗസ്ഥൻ

ബുധനാഴ്ച മെറ്റയുടെ ഉന്നത ഉദ്യോ​ഗസ്ഥർ കേന്ദ്ര ഐടി സെക്രട്ടറി എസ്. കൃഷ്ണൻ ഉൾപ്പെടെയുള്ള കേന്ദ്രസംഘവുമായി കൂടിക്കാഴ്ച നടത്തിയിരുന്നു. 45 മിനിറ്റോളം നീണ്ടുനിന്ന ഈ കൂടിക്കാഴ്ചയിലാണ് ജോയൽ കാപ്ലാൻ നേരിട്ട് ക്ഷമാപണം നടത്തിയത്.

ന്യൂഡൽഹി: പ്രധാനമന്ത്രി നരേന്ദ്രമോദിയുടെ വീഡിയോ നീക്കംചെയ്തതിൽ കേന്ദ്ര ഐടി മന്ത്രി അശ്വിനി വൈഷ്ണവിനോട് മാപ്പ് പറഞ്ഞ് മെറ്റയുടെ ഉന്നത ഉദ്യോ​ഗസ്ഥൻ. മെറ്റ ചീഫ് ​ഗ്ലോബൽ അഫേഴ്സ് ഓഫീസറായ ജോയൽ കാപ്ലാനാണ് മന്ത്രി അശ്വിനി വൈഷ്ണവിനോട് ക്ഷമാപണം നടത്തിയത്. പ്രധാനമന്ത്രിയുടെ പോസ്റ്റ് നിയന്ത്രിക്കാനിടയായ പിഴവിൽ മെറ്റയ്ക്ക് വേണ്ടി താൻ മന്ത്രിയോട് ക്ഷമ ചോദിച്ചതായി അദ്ദേഹം പ്രസ്താവനയിലൂടെ വ്യക്തമാക്കി.

ബുധനാഴ്ച മെറ്റയുടെ ഉന്നത ഉദ്യോ​ഗസ്ഥർ കേന്ദ്ര ഐടി സെക്രട്ടറി എസ്. കൃഷ്ണൻ ഉൾപ്പെടെയുള്ള കേന്ദ്രസംഘവുമായി കൂടിക്കാഴ്ച നടത്തിയിരുന്നു. 45 മിനിറ്റോളം നീണ്ടുനിന്ന ഈ കൂടിക്കാഴ്ചയിലാണ് ജോയൽ കാപ്ലാൻ നേരിട്ട് ക്ഷമാപണം നടത്തിയത്. മെറ്റയുടെ വിവിധ പ്ലാറ്റ്ഫോമുകളിലെ കുട്ടികളുടെ ലൈം​ഗിക​ദൃശ്യങ്ങളുടെ ഉള്ളടക്കം, ഡീപ്ഫേക്ക് ഉള്ളടക്കം, പ്ലാറ്റ്ഫോമുകളുടെ പ്രവർത്തനങ്ങളിലെ പിഴവുകൾ തുടങ്ങിയവയ്ക്ക് മെറ്റ മേധാവി മാർക് സക്കർബർ​ഗും നേരത്തേ ക്ഷമാപണം നടത്തിയിരുന്നു. മെറ്റ പ്രതിനിധിസംഘത്തിന്റെ കൂടിക്കാഴ്ചയ്ക്കിടെയാണ് സക്കർബർ​ഗിന്റെ ക്ഷമാപണം കേന്ദ്രസർക്കാരിനെ അറിയിച്ചതെന്നായിരുന്നു റിപ്പോർട്ട്. പ്രത്യേക ഉള്ളടക്കങ്ങൾ പണം വാങ്ങി പ്രചരിപ്പിച്ചതായി മെറ്റ സമ്മതിച്ചതായും റിപ്പോർട്ടുകളിലുണ്ടായിരുന്നു.

ഡൽഹിയിലെ സിജെപി പ്രതിഷേധത്തിനിടെ പ്രധാനമന്ത്രി നരേന്ദ്രമോദി പോസ്റ്റ് ചെയ്ത വീഡിയോ സന്ദേശമാണ് മെറ്റ പ്ലാറ്റ്ഫോമുകളായ ഫെയ്സ്ബുക്കിൽനിന്നും ഇൻസ്റ്റ​ഗ്രാമിൽനിന്നും അല്പസമയത്തേക്ക് നീക്കംചെയ്തത്. പിന്നീട് ഇത് പുനഃസ്ഥാപിച്ചു. സംഭവത്തിന് പിന്നിൽ സാങ്കേതിക പിഴവാണെന്നും ക്ഷമാപണം നടത്തുന്നതായും മെറ്റ പിന്നീട് വിശദീകരിച്ചു. എന്നാൽ, മെറ്റയുടെ വിശദീകരണം തൃപ്തികരമല്ലെന്നായിരുന്നു കേന്ദ്ര ഐടി മന്ത്രാലയത്തിന്റെ നിലപാട്. ഐടി-കമ്മ്യൂണിക്കേഷൻ വിഷയങ്ങൾ കൈകാര്യംചെയ്യുന്ന പാർലമെന്ററി സമിതിയും മെറ്റയെ കുറ്റപ്പെടുത്തി. മൂന്നുദിവസത്തിനുള്ളിൽ സക്കർബർ​ഗ് മാപ്പ് പറയണമെന്നും പാർലമെന്ററി സമിതി അധ്യക്ഷനായ ബിജെപി എംപി നിഷികാന്ത് ദുബെ ആവശ്യപ്പെട്ടിരുന്നു. ഇതിനുപിന്നാലെയാണ് രണ്ടുദിവസത്തെ കൂടിക്കാഴ്ചയ്ക്കായി മെറ്റയുടെ ഉന്നതതല സംഘം ഇന്ത്യയിലെത്തിയത്.

മെറ്റയുടെ ഏറ്റവും വലിയ വിപണികളിലൊന്നാണ് ഇന്ത്യ. മെറ്റയുടെ വിവിധ സാമൂഹികമാധ്യമ പ്ലാറ്റ്ഫോമുകളായ ഫെയ്സ്ബുക്കിനും ഇൻസ്റ്റ​ഗ്രാമിനും വാട്സാപ്പിനും ഇന്ത്യയിൽ ദശലക്ഷക്കണക്കിന് ഉപയോ​ക്താക്കളാണുള്ളത്.