മെട്ടൂർ അണക്കെട്ട് പൂർണ്ണ സംഭരണ ശേഷിയിലെത്തി; ഈ വര്‍ഷം ഇത് അഞ്ചാം തവണ; കാവേരി നദിയിൽ ജലനിരപ്പ് ഉയർന്നു

മെട്ടൂർ അണക്കെട്ട് അഞ്ചാം തവണയാണ് ഈ വർഷം പരമാവധി സംഭരണ ശേഷിയിലെത്തുന്നത്. 

സേലം: മെട്ടൂർ അണക്കെട്ട് വീണ്ടും അതിന്റെ പരമാവധി സംഭരണ ശേഷിയായ 120 അടിയിലെത്തി. ഈ വർഷം അഞ്ചാം തവണയാണ് ഇത്. അണക്കെട്ടിൽ നിന്ന് 64,990 ക്യൂസെക്സ് വെള്ളം പുറത്തേക്ക് ഒഴുക്കിവിട്ടതോടെ കാവേരി നദിയിൽ ജലനിരപ്പ് ഉയർന്നു. കർണാടകയിലെ കൃഷ്ണ രാജ സാഗർ (കെ.ആർ.എസ്), കബിനി അണക്കെട്ടുകളിൽ നിന്നുള്ള ഉയർന്ന നീരൊഴുക്കാണ് മെട്ടൂർ അണക്കെട്ട് നിറയാൻ കാരണം.

കർണാടകയിലും കേരളത്തിലും ഉണ്ടായ കനത്ത മഴ കാരണം ഈ അണക്കെട്ടുകളിലേക്ക് വലിയ തോതിൽ നീരൊഴുക്ക് രേഖപ്പെടുത്തിയിരുന്നു. ഇതിൻ്റെ ഭാഗമായി കർണാടക ആകെ 1,17,780 ക്യൂസെക്സ് വെള്ളം പുറത്തുവിട്ടു. കബിനിയിൽ നിന്ന് 26,450 ക്യൂസെക്സും കൃഷ്ണ രാജ സാഗറിൽ നിന്ന് 91,330 ക്യൂസെക്സും ഉൾപ്പെടെയാണിത്.

ഈ വെള്ളം തിങ്കളാഴ്ച രാത്രി മുതൽ ഹൊഗെനക്കൽ വെള്ളച്ചാട്ടത്തിലും, ചൊവ്വാഴ്ച രാവിലെ മുതൽ മെട്ടൂർ അണക്കെട്ടിലും എത്തിത്തുടങ്ങിയതായി ജലവിഭവ വകുപ്പ് ഉദ്യോഗസ്ഥൻ അറിയിച്ചു. ചൊവ്വാഴ്ച വൈകുന്നേരത്തോടെ അണക്കെട്ടിലെ ജലനിരപ്പ് 119 അടിയായി ഉയർന്നു. തുടർന്ന് ബുധനാഴ്ച പുലർച്ചെ നാല് മണിയോടെ 120 അടിയിലെത്തി. ബുധനാഴ്ച രാവിലെ 1,14,098 ക്യൂസെക്സ് നീരൊഴുക്കാണ് രേഖപ്പെടുത്തിയതെങ്കിലും, പിന്നീട് ഇത് 70,000 ക്യൂസെക്സായും വൈകുന്നേരത്തോടെ 64,990 ക്യൂസെക്സായും കുറഞ്ഞതായി ഉദ്യോഗസ്ഥർ പറഞ്ഞു.

അണക്കെട്ടിൻ്റെ 16 വെൻ്റ് എലിസ് സാഡിൽ സർപ്ലസ് ബ്രിഡ്ജിലൂടെ അധിക ജലം പൂർണ്ണമായും കാവേരിയിലേക്ക് ഒഴുക്കിവിടുന്നതായും, അണക്കെട്ടിൻ്റെ ഇടതും വലതും വശങ്ങളിലെ കനാലുകളിലൂടെ 1,000 ക്യൂസെക്സ് വെള്ളം പുറത്തുവിടുന്നുണ്ടെന്നും അധികൃതർ കൂട്ടിച്ചേർത്തു.