ഭീകരരെ അവരുടെ വീട്ടില്‍ കയറി തുടച്ച് നീക്കുമെന്ന് മോദി

തെരഞ്ഞെടുപ്പ് അടുത്തതോടെയാണ് പ്രത്യാക്രമണം നടത്തിയതെന്നുള്ള വാദത്തെയും വിമര്‍ശിച്ചു. ആദ്യത്തെ മിന്നലാക്രമണം നടത്തിയപ്പോള്‍ ഏതെങ്കിലും തെരഞ്ഞെടുപ്പ് നടക്കാനുണ്ടായിരുന്നോ എന്ന് മോദി ചോദിച്ചു

അഹമ്മദാബാദ്: ഭീകരരെ അവരുടെ വീട്ടില്‍ കയറി തുടച്ച് നീക്കുമെന്ന് പ്രധാനമന്ത്രി നരേന്ദ്ര മോദി. എവിടെ ഒളിച്ചാലും തീവ്രവാദികളെ വെറുതെ വിടില്ലെന്നും മോദി പറഞ്ഞു. അഹമ്മദാബാദിലെ പൊതുയോഗത്തില്‍ പ്രസംഗിക്കുകയായിരുന്നു അദ്ദേഹം.

കൃത്യമായ മറുപടി കൊടുക്കുക എന്നതാണ് തന്‍റെ രീതി. ഭീകരരെ അവരുടെ വീട്ടില്‍ കയറി തുടച്ച് നീക്കും. ഭൂമിക്കടിയില്‍ ഒളിച്ചാല്‍ പോലും അവിടെ നിന്ന് അവരെ വലിച്ച് പുറത്തിട്ട് എല്ലാം അവസാനിപ്പിക്കുമെന്നും മോദി പറഞ്ഞു. ശത്രുക്കളുടെ സാമ്രാജ്യത്തിലേക്ക് കയറി അവരെ നശിപ്പിക്കുക എന്നതാണ് ഞങ്ങളുടെ നയം.

അതിനായി നാളുകളോളും കാത്തിരിക്കാന്‍ താന്‍ ഇഷ്ടപ്പെടുന്നില്ലെന്ന് പറഞ്ഞ പ്രധാനമന്ത്രി തെരഞ്ഞെടുപ്പ് അടുത്തതോടെയാണ് പ്രത്യാക്രമണം നടത്തിയതെന്നുള്ള വാദത്തെയും വിമര്‍ശിച്ചു. ആദ്യത്തെ മിന്നലാക്രമണം നടത്തിയപ്പോള്‍ ഏതെങ്കിലും തെരഞ്ഞെടുപ്പ് നടക്കാനുണ്ടായിരുന്നോ എന്ന് മോദി ചോദിച്ചു.

40 വര്‍ഷമായി ഭീകരവാദപ്രവര്‍ത്തനത്തിന്‍റെ ഫലം നാം അനുഭവിക്കുകയാണ്. അധികാരം എനിക്ക് വിഷയമേയല്ല. തന്‍റെ ആകൂലത രാജ്യത്തിന്‍റെ സുരക്ഷ മാത്രമാണെന്നും മോദി പറഞ്ഞു.