നോയൽ ടാറ്റയുടെ വാദങ്ങൾ തളളി, എൻ ചന്ദ്രശേഖരന്റെ പുനർനിയമനം നിയമപരമെന്ന് ടാറ്റാ സണ്‍സ്

സെപ്റ്റംബർ 17 ന് ചേർന്ന ടാറ്റാ സൺസ് ബോർഡ് യോഗത്തിൽ എൻ. ചന്ദ്രശേഖരനെ അഞ്ച് വർഷത്തേക്ക് കൂടി ചെയർമാനായി നിയമിച്ചിരുന്നു

മുംബൈ: എൻ ചന്ദ്രശേഖരന്റെ പുനർനിയമനം നിയമപരമെന്ന് ടാറ്റാ സണ്‍സ് . നോയൽ ടാറ്റയുടെ വാദങ്ങൾ തളളിയാണ് ടാറ്റാ സണ്‍സ് നിലപാട് വ്യക്തമാക്കിയത്. ടാറ്റാ ട്രസ്റ്റിന് നൽകിയ മറുപടിയിലാണ് ഇക്കാര്യം വ്യക്തമാക്കിയിട്ടുള്ളത്. പുനർനിയമനം ആർട്ടികിൾ ഓഫ് അസോസിയേഷൻ പ്രകാരം നിയമ വിരുദ്ധമെന്നായിരുന്നു ട്രസ്റ്റിന്റെ വാദം. സെപ്റ്റംബർ 17 ന് ചേർന്ന ടാറ്റാ സൺസ് ബോർഡ് യോഗത്തിൽ എൻ. ചന്ദ്രശേഖരനെ അഞ്ച് വർഷത്തേക്ക് കൂടി ചെയർമാനായി നിയമിച്ചിരുന്നു.തീരുമാനം നടപ്പിലാക്കാൻ വാർഷിക പൊതുയോഗം വേഗത്തിലാക്കാനും ടാറ്റാ സണ്‍സ് നീക്കം തുടങ്ങി. കമ്പനിയുടെ ഭരണഘടനാ ചട്ടങ്ങളും കമ്പനി നിയമങ്ങളും പൂർണ്ണമായും പാലിച്ചാണ് തീരുമാനമെടുത്തതെന്ന് ടാറ്റാ സൺസ് മറുപടിയിൽ ചൂണ്ടിക്കാണിക്കുന്നു. ടാറ്റ ഗ്രൂപ്പിന്റെ പ്രിൻസിപ്പൽ ഹോൾഡിംഗ് കമ്പനിയായ ടാറ്റാ സൺസിന്റെ 66 ശതമാനം ഓഹരികളും ടാറ്റാ ട്രസ്റ്റുകളുടെ കൈവശമാണ്.

എക്സിക്യൂട്ടീവ് ചെയർമാന്റെ കാലാവധി നീട്ടി നൽകുന്ന നടപടി ക്രമങ്ങളിൽ ട്രസ്റ്റിന്റെ അനുമതിയും പങ്കാളിത്തവും കൃത്യമായി ഉറപ്പാക്കിയിരുന്നില്ലെന്ന വാദമാണ് നോയൽ ടാറ്റ ഉയർത്തിയത്. എന്നാൽ ബോർഡ് യോഗത്തിന്റെ നിബന്ധനകളും വോട്ടിംഗ് നടപടികളും അനുസരിച്ച് തന്നെയാണ് തീരുമാനം കൈക്കൊണ്ടതെന്നും ഇതിൽ യാതൊരു വിധ നിയമ ലംഘനവും നടന്നിട്ടില്ലെന്നും ടാറ്റാ സൺസ് വ്യക്തമാക്കി. ടാറ്റാ ട്രസ്റ്റും ടാറ്റാ സൺസ് ബോർഡും തമ്മിൽ അഭിപ്രായ വ്യത്യാസങ്ങൾ നിലനിൽക്കുന്നുണ്ടെന്ന വാർത്തകൾ പുറത്തുവരുന്നതിനിടെയാണ് ഈ ഔദ്യോഗിക പ്രതികരണം വന്നിരിക്കുന്നത്.

ഏഷ്യാനെറ്റ് ന്യൂസ് ലൈവ് കാണാം