ഓപ്പറേഷൻ കാവേരി : സുഡാനിൽ നിന്ന് തിരിച്ചെത്തിച്ചത് 3195 ഇന്ത്യക്കാരെ, തിരിച്ചെത്തിയവരിൽ 50 മലയാളികളും

എട്ട് ദിവസം കൊണ്ടാണ് ഇത്രയും നടപടികൾ പൂർത്തിയാക്കിയത് എന്നും അധികൃതർ അറിയിച്ചു. 

ദില്ലി : ആഭ്യന്തര സംഘ‌ർഷം രൂക്ഷമായി തുടരുന്ന സുഡാനിൽ നിന്ന് ഇതുവരെ 3195 പേരെ ഒഴിപ്പിച്ചെന്ന് വിദേശകാര്യ മന്ത്രാലയം. എട്ട് ദിവസംകൊണ്ടാണ് ഇത്രയും പേരെ ഒഴിപ്പിച്ചത്. ഇതിൽ 2500 ൽ അധികം പേരെ ഇതിനോടകം ഇന്ത്യയിലെത്തിച്ചിട്ടുണ്ട്. ആകെ 50 മലയാളികളാണ് ഇതുവരെ ദൌത്ത്യത്തിന്റെ ഭാഗമായി നാട്ടിൽ തിരിച്ചെത്തിയത്.  ജിദ്ദ കൂടാതെ സൗത്ത് സുഡാൻ, ഈജിപ്ത്ത്, ചാഡ്, ജിബൂട്ടി എന്നിവിടങ്ങളിലേക്കും ആളുകളെ മാറ്റിയെന്നും മന്ത്രാലയം അറിയിച്ചു. ശ്രീലങ്ക, നേപ്പാൾ, ബം​ഗ്ലാദേശ് എന്നീ രാജ്യങ്ങളുടെ പൗരൻമാരെയും ദൗത്യത്തിന്റെ ഭാ​ഗമായി ഒഴിപ്പിച്ചു. അഞ്ച് സൈനിക കപ്പലും 13 വ്യോമസേന വിമാനങ്ങളും ദൗത്യത്തിന്റെ ഭാ​ഗമായെന്നും സുഡാനിലെ ഇന്ത്യൻ എംബസി അറിയിച്ചു. 

അതേസമയം കലാപം നടക്കുന്ന സാഹചര്യത്തിൽ സുഡാനിലെ ഇന്ത്യൻ എംബസി മാറ്റി. ഖാർത്തൂമിൽനിന്ന് പോർട്ട് സുഡാനിലേക്കാണ് താൽകാലികമായി മാറ്റിയത്. ഖാർത്തൂമിലെ സ്ഥിതി നിരീക്ഷിച്ചുവരികയാണെന്നും വിദേശകാര്യ മന്ത്രാലയം അറിയിച്ചു.