കോൺ​ഗ്രസിന്റെ മോഹങ്ങൾ തളിർക്കുമോ, അതോ വീണ്ടും പ്രതിപക്ഷത്തിരിക്കേണ്ടി വരുമോ, അസമിൽ വോട്ട് വൈബിന്റെ പുതിയ സർവേ

അസമിലെ നിയമസഭാ തെരഞ്ഞെടുപ്പിൽ ബിജെപി നയിക്കുന്ന എൻഡിഎ തുടർച്ചയായ വിജയം നേടുമെന്ന് വോട്ട് വൈബ് സർവേ പ്രവചിക്കുന്നു. 126 അംഗ നിയമസഭയിൽ എൻഡിഎ 87-97 സീറ്റുകൾ നേടുമ്പോൾ, കോൺഗ്രസ് നയിക്കുന്ന ഇന്ത്യ ബ്ലോക്കിന് 26-36 സീറ്റുകളാണ് സർവേ പ്രവചിക്കുന്നത്. 

ദില്ലി: അസമിൽ തെരഞ്ഞെടുപ്പിന് മുമ്പ് രണ്ടാമത്തെ സർവേയുമായി വോട്ട് വൈബ്. നിയമസഭാ തെരഞ്ഞെടുപ്പിൽ അസമിൽ ബിജെപി നയിക്കുന്ന ഭരണകക്ഷിയായ എൻഡിഎ തുടർച്ചയായ വിജയം നേടുമെന്ന് സർവേയിൽ പറയുന്നു. അഭിപ്രായ വോട്ടെടുപ്പുകളുടെ ഏറ്റവും പുതിയ കണ്ടെത്തൽ പ്രകാരം, 126 അംഗ നിയമസഭയിൽ ബിജെപിക്ക് 87-97 സീറ്റുകൾ ലഭിക്കും. പ്രധാന എതിരാളിയായ കോൺഗ്രസ് നയിക്കുന്ന ഇന്ത്യ ബ്ലോക്കിന് ഏകദേശം 26-36 സീറ്റുകൾ ലഭിക്കുമെന്നും പറയുന്നു. എൻഡിഎയ്ക്ക് 44 ശതമാനം വോട്ട് വിഹിതവും പ്രതിപക്ഷത്തിന് 36.7 ശതമാനം വോട്ട് വിഹിതവും സർവേ പ്രവചിച്ചു. നേരത്തെ നടത്തിയ പ്രീപോൾ സർവേയിൽ എൻഡിഎയ്ക്ക് നിയമസഭയിൽ 80 മുതൽ 90 വരെ സീറ്റുകൾ നേടാൻ സാധ്യതയുണ്ടെന്നായിരുന്നു പറഞ്ഞിരുന്നത്. അതേസമയം, ഇന്ത്യാ ബ്ലോക്ക് 29-39 സീറ്റുകൾ നേടുമെന്നും പ്രതീക്ഷിച്ചിരുന്നു.

മുഖ്യമന്ത്രി ഹിമന്ത ബിശ്വ ശർമ്മ എൻഡിഎയുടെ ഫലത്തിൽ ഒരു പ്രധാന പങ്ക് വഹിക്കുമെന്നും സർവേയിൽ പങ്കെടുത്തവർ പറഞ്ഞു. ആദ്യ സർവേയിൽ 48 ശതമാനം പേർ ശർമ്മയെ മുഖ്യമന്ത്രി സ്ഥാനത്തേക്ക് പിന്തുണച്ചപ്പോൾ, രണ്ടാമത്തേതിൽ 47 ശതമാനം പേർ അദ്ദേഹത്തെ പിന്തുണച്ചു. അതേസമയം, 37.7 ശതമാനം പേർ കോൺഗ്രസ് മേധാവി ഗൗരവ് ഗൊഗോയിയെ പിന്തുണച്ചു. സർവേയിൽ പങ്കെടുത്തവരിൽ ഏകദേശം 42.7 ശതമാനം പേർ ഭരണകക്ഷിയെ പിന്തുണച്ചപ്പോൾ 36.1 ശതമാനം പേർ പ്രതിപക്ഷത്തെ പിന്തുണച്ചു. നിലവിൽ അസം നിയമസഭയിലെ 126 സീറ്റുകളിൽ 86 എണ്ണവും എൻഡിഎക്കാണ്. കോൺഗ്രസിന് 22 സീറ്റുകളുണ്ട്. തൊഴിലില്ലായ്മ, അഴിമതി, ഗായകൻ സുബീൻ ഗാർഗിന്റെ മരണത്തെക്കുറിച്ചുള്ള ന്യായമായ അന്വേഷണം എന്നിവയാണ് ഈ തെരഞ്ഞെടുപ്പിലെ പ്രധാന വിഷയങ്ങൾ. ഗാർഗിന്റെ മരണം ഒരു ഘടകമാകുമെന്ന് 42.6 ശതമാനം വോട്ടർമാർ വിശ്വസിച്ചു. അതേസമയം, ഐഎഎൻഎസ്-മാട്രിസ് ഒപിനിയൻ പോൾ നടത്തിയ ഒരു സർവേയിൽ, ഭരണകക്ഷി 43 മുതൽ 44 ശതമാനം വരെ വോട്ട് വിഹിതത്തോടെ നിയമസഭയിൽ 96 മുതൽ 98 വരെ സീറ്റുകൾ നേടുമെന്ന് പ്രവചിക്കപ്പെട്ടു.