സുപ്രധാനസന്ദേശവുമായി പ്രധാനമന്ത്രി; അൽപസമയത്തിനകം മോദി രാജ്യത്തെ അഭിസംബോധന ചെയ്യും

 'മേരേ പ്യാരേ ദേശ്‍വാസിയോം', ഒരു പ്രധാനസന്ദേശവുമായി പതിനൊന്നേമുക്കാലിനും പന്ത്രണ്ടുമണിക്കുമിടയിൽ ഞാൻ വരും - എന്നാണ് മോദിയുടെ ട്വീറ്റ്. 

ദില്ലി: പ്രധാനമന്ത്രി നരേന്ദ്രമോദി രാവിലെ പതിനൊന്നേമുക്കാലിന് രാജ്യത്തെ അഭിസംബോധന ചെയ്യും. 

'മേരേ പ്യാരേ ദേശ്‍വാസിയോ (എന്‍റെ പ്രിയപ്പെട്ട നാട്ടുകാരേ),

ഇന്ന് രാവിലെ പതിനൊന്നേമുക്കാൽ മുതൽ പന്ത്രണ്ട് മണി വരെ 

പ്രധാനപ്പെട്ട ഒരു പ്രഖ്യാപനവുമായി ഞാൻ നിങ്ങൾക്കിടയിൽ വരും. 

ടെലിവിഷൻ, റേഡിയോ, സാമൂഹ്യമാധ്യങ്ങളിൽ ലൈവ് കാണുക'.

എന്നാണ് മോദിയുടെ ട്വീറ്റ്. മോദിയുടെ സ്വകാര്യ ട്വിറ്റർ അക്കൗണ്ടിലാണ് പ്രഖ്യാപനം. 

മോദിയുടെ പ്രഖ്യാപനം തത്സമയം ഏഷ്യാനെറ്റ് ന്യൂസിന്‍റെ ഫേസ്ബുക്ക് പേജിൽ കാണാം. 

വലിയ ആകാംക്ഷയോടെയാണ് രാജ്യം അഭിസംബോധന ഉണ്ടാകുമെന്ന പ്രധാനമന്ത്രിയുടെ പ്രസ്താവനയെ കാത്തിരിക്കുന്നത്. എന്താണ് പ്രഖ്യാപിക്കാൻ പോകുന്നതെന്ന് ഇതുവരെ മോദി പറഞ്ഞിട്ടില്ല. തെരഞ്ഞെടുപ്പ് പെരുമാറ്റച്ചട്ടം നിലവിലുണ്ട്. അതിനാൽ വമ്പൻ പ്രഖ്യാപനങ്ങളൊന്നും നടത്താൻ കഴിയില്ല. നയപരമായ ഒരു തീരുമാനങ്ങളും എടുക്കാനും പ്രഖ്യാപിക്കാനും മോദിക്ക് കഴിയുകയുമില്ല. അങ്ങനെ ചെയ്താൽ അത് തെരഞ്ഞെടുപ്പ് പെരുമാറ്റച്ചട്ടത്തിന്‍റെ ലംഘനമാകുകയും ചെയ്യും.

ദേശീയ താൽപര്യമുള്ള വിഷയങ്ങളാണോ അതോ രാജ്യ സുരക്ഷയെ കുറിച്ച് സുപ്രധാന വിവരങ്ങളാണോ പ്രധാനമന്ത്രി പങ്കുവയ്ക്കുക എന്നതരത്തിലൊക്കെ വാര്‍ത്തകൾ വരുന്നുമുണ്ട്.