ബിജെപിയുടേത് കർഷകർക്കും യുവാക്കൾക്കുമെതിരായ രാഷ്ട്രീയം; പ്രിയങ്ക ​ഗാന്ധി

പ്രധാൻ മന്ത്രി കിസാൻ സമ്മാന്‍ നിധി പദ്ധതിയെ  'കിസാൻ അപമാൻ യോജന' എന്ന് വിളിക്കാനാണ് ഞാൻ ആ​ഗ്രഹിക്കുന്നത്. ഈ പദ്ധതികളെല്ലാം വ്യവസായികൾക്ക് നേട്ടമുണ്ടാക്കുന്നതാണെങ്കിൽ അവർ സന്തുഷ്ടരായിരിക്കുമെന്നും പ്രിയങ്ക പറഞ്ഞു

റായ്ബറേലി: ബിജെപിക്കെതിരെ വിമർശനമുന്നയിച്ച് എഐസിസി ജനറൽ സെക്രട്ടറി പ്രിയങ്ക ​ഗാന്ധി. രാജ്യത്തെ കർഷകർക്കും  യുവാക്കൾക്കുമെതിരായ നിഷേധാത്മകമായ നിലപാടെടുക്കുന്ന രാഷ്ട്രീയമാണ് ബിജെപിയുടേതെന്ന് പ്രിയങ്ക ​ഗാന്ധി പറഞ്ഞു.

''കഴിഞ്ഞ അഞ്ചു വർഷം കൊണ്ട് ബിജെപി തങ്ങളുടെ യഥാർഥ മുഖം എന്താണെന്ന് കാണിച്ചു കഴി‍ഞ്ഞു. രാജ്യത്തെ കർഷകർക്കും യുവാക്കൾക്കുമെതിരെ നിഷേധാത്മകമായ നിലപാടെടുക്കുന്ന രാഷ്ട്രീയമാണ് ബിജെപിയുടേത്. രാജ്യത്തെ ജനങ്ങളോട് പ്രതിബദ്ധത പുലർത്തേണ്ടതാണ് ഓരോ സർക്കാരുകളും. എന്നാൽ ഈ സർക്കാർ ജനങ്ങളെ അവ​ഗണിക്കുകയാണ് ചെയ്യുന്നത്''- പ്രിയങ്ക ​ഗാന്ധി വാർത്താ ഏജൻസിയായ എഎൻഐയോട് പറഞ്ഞു.

കോൺ​ഗ്രസിന്റെ മിനിമം വരുമാന പദ്ധതിക്കെതിരെയുള്ള ബിജെപിയുടെ ആരോപണങ്ങൾക്കെതിരെയും പ്രിയങ്ക പ്രതികരിച്ചു. പാവപ്പെട്ടവർക്കും കർഷകർക്കും ഉപകാരപ്രദമാകുന്ന കാര്യങ്ങൾ ചെയ്യുന്നതിനെതിരാണ് ഭരണകക്ഷിയെന്ന് പ്രിയങ്ക പറഞ്ഞു. 

ഈ പദ്ധതികൊണ്ട് വ്യവസായികൾക്ക് നേട്ടമുണ്ടാകണമെന്നാണ് ബിജെപിയുടെ ആവശ്യം. പ്രധാൻ മന്ത്രി കിസാൻ സമ്മാന്‍ നിധി പദ്ധതിയെ  'കിസാൻ അപമാൻ യോജന' എന്ന് വിളിക്കാനാണ് ഞാൻ ആ​ഗ്രഹിക്കുന്നത്. ഈ പദ്ധതികളെല്ലാം വ്യവസായികൾക്ക് നേട്ടമുണ്ടാക്കുന്നതാണെങ്കിൽ അവർ സന്തുഷ്ടരായിരിക്കുമെന്നും പ്രിയങ്ക പറഞ്ഞു.