വിദ്യാർഥിനികളെ ജാതീയമായി അധിക്ഷേപിക്കും ടോയ്‍ലറ്റ് വൃത്തിയാക്കിക്കുകയും ചെയ്തു; പ്രൊഫസർക്കെതിരെ അന്വേഷണത്തിന് ഉത്തരവിട്ട് വിസി

ബിഎച്ച്‍യുവിന്റെ കീഴിലുള്ള മഹിളാ മഹാ വിദ്യാലയത്തിലെ രണ്ട് ഗവേഷക വിദ്യാർഥിനികളുടെ പരാതിയിൻമേലാണ് വിസിയുടെ നടപടി.  

വാരാണസി: ​ഗവേഷക വിദ്യാർഥിനികളെ ജാതീയമായി അധിക്ഷേപിക്കും അവരെകൊണ്ട് ടോയ്‍ലറ്റ് വൃത്തിയാക്കിക്കുകയും ചെയ്ത പ്രൊഫസർക്കെതിരെ ബനാറസ് ഹിന്ദു സർവകലാശാല (ബിഎച്ച്‍യു) വൈസ്-ചാൻസ്‍ലർ അന്വേഷണത്തിന് ഉത്തരവിട്ടു. ബിഎച്ച്‍യുവിന്റെ കീഴിലുള്ള മഹിളാ മഹാ വിദ്യാലയത്തിലെ രണ്ട് ഗവേഷക വിദ്യാർഥിനികളുടെ പരാതിയിൻമേലാണ് വിസിയുടെ നടപടി.

എസ്‍‍സി, എസ്‍ടി വിഭാ​ഗത്തിൽപ്പെടുന്ന വിദ്യാർഥിനികളാണ് ഹോം സയൻസ് വിഭാ​ഗത്തിലെ പ്രൊഫസർക്കെതിരെ ‌വിസിക്ക് പരാതി നൽകിയത്. മാർച്ചിൽ കോളേജിൽവച്ച് നടന്ന സെമിനാറിനിടെയായിരുന്നു സംഭവം. എസ് സി-എസ് ടി നിയമപ്രകാരം വിദ്യാർഥിനികളുടെ പരാതി അന്വേഷിക്കുന്നതിനായി സർവകലാശാല വൈസ്-ചാൻസ്‍ലർ രാ​ഗേഷ് ഭട്ട്ന​ഗർ അന്വേഷണ കമ്മിറ്റിക്ക് രൂപം നൽകി. സംഭവത്തിൽ കമ്മിറ്റി അന്വേഷണം ആരംഭിച്ചതായി ഇന്ത്യൻ എക്സ്പ്രസ് റിപ്പോർ‌ട്ട് ചെയ്യുന്നു.

പൊളിറ്റിക്കൽ സയൻസ് വിഭാ​ഗം അസിസ്റ്റന്റ് പ്രൊഫസർ ആണ് അന്വേഷണ കമ്മിറ്റിക്ക് നേതൃത്വം നൽകുന്നത്. രണ്ടാഴ്ച മുമ്പാണ് സർവകലാശാല വിസി, കമ്മിറ്റിക്ക് രൂപം നൽകിയതെന്നും മഹിളാ മഹാ വിദ്യാലയത്തിലെ പ്രിൻസിപ്പാൾ ചന്ദ്രകല ത്രിപാഠി പറഞ്ഞു. എന്നാൽ സംഭവത്തെക്കുറിച്ച് തനിക്ക് ഇതുവരെ പരാതി ലഭിച്ചിട്ടില്ലെന്നും ചന്ദ്രകല ത്രിപാഠി കൂട്ടിച്ചേർത്തു.