ഇറങ്ങുന്നതിനിടെ മെട്രോയുടെ വാതിലിൽ സാരി കുടുങ്ങി; വീട്ടമ്മ രക്ഷപ്പെട്ടത് തലനാരിഴയ്ക്ക്

പ്ലാറ്റ്ഫോമിലൂടെ ​ഗീതയെയും വലിച്ച് ട്രെയിൻ നീങ്ങുന്നത് ശ്രദ്ധയിൽപ്പെട്ട യാത്രക്കാരിൽ ഒരാൾ എമർജൻസി ബട്ടൻ അമർത്തിയതോടെയാണ് ദുരന്തം ഒഴിവായത്. 

ദില്ലി: സ്റ്റേഷനിൽ ഇറങ്ങുന്നതിനിടെ മെട്രോ ട്രെയിനിന്റെ വതിലിൽ സാരി കുടുങ്ങിയതിനെ തുടർന്ന് പ്ലാറ്റ് ഫോമിൽ തെറിച്ചുവീണ വീട്ടമ്മയ്ക്ക് ​ഗുരുതര പരിക്ക്. മോത്തിന​ഗർ മെട്രോ സ്‌റ്റേഷനില്‍വെച്ചാണ് അപകടമുണ്ടായത്. ഇന്ദ്രലോക് സ്വദേശിനിയായ ഗീതയ്ക്കാണ് തലയ്ക്കും മുഖത്തും ​ഗുരുതരമായി പരിക്കേറ്റത്.  

 ബ്ലൂലൈന്‍ മെട്രോയില്‍ യാത്ര ചെയ്യുകയായിരുന്നു  ഗീതയും മകളും. തുടർന്ന് മോട്ടിനഗര്‍ സ്‌റ്റേഷനില്‍ ഇറങ്ങുന്നതിനിടെ വാതിലുകൾക്കിടയിൽ ​ഗീതയുടെ സാരി കുടുങ്ങി.  പ്ലാറ്റ്ഫോമിലൂടെ ​ഗീതയെയും വലിച്ച് ട്രെയിൻ നീങ്ങുന്നത് ശ്രദ്ധയിൽപ്പെട്ട യാത്രക്കാരിൽ ഒരാൾ എമർജൻസി ബട്ടൻ അമർത്തിയതോടെയാണ് ദുരന്തം ഒഴിവായത്. 

ട്രെയിൻ നിർത്തിയ ഉടനെ മെട്രോ അധികൃതരും യാത്രക്കാരും എത്തി ​ഗീതയ്ക്ക് പ്രാഥമിക ശുശ്രൂഷകൾ നൽകി.  ​തലയ്ക്കും മുഖത്തും ​ഗുരുതരമായി പരിക്കേറ്റ ​ഗീതയെ ആശുപത്രിയിൽ പ്രവേശിപ്പിച്ചിരിക്കുകയാണെന്ന് ഇവരുടെ ഭർത്താവ് അറിയിച്ചു. ദ്വാരകയെ നോയ്ഡയിലെ ഇലക്ട്രോണിക് സിറ്റിയുമായി ബന്ധിപ്പിക്കുന്ന റെയില്‍വേ ലൈനാണ് ബ്ലൂലൈന്‍. അപകടത്തെ തുടര്‍ന്ന് ഈ റൂട്ടിലെ മെട്രോ സര്‍വീസുകള്‍ താത്കാലികമായി തടസപ്പെട്ടിരുന്നു.