അമിത് ഷാക്ക് വീട്ടിൽ വിരുന്നൊരുക്കി സൗരവ് ഗാംഗുലി; ആകാംക്ഷയോടെ ബം​ഗാൾ രാഷ്ട്രീയം

അത്താഴത്തിനുള്ള തന്റെ ക്ഷണം ആഭ്യന്തരമന്ത്രി സ്വീകരിച്ചെന്നും ഇന്ന് വൈകുന്നേരം ഒരുമിച്ച് ഭക്ഷണം കഴിക്കുമെന്നും ഗാംഗുലി പറഞ്ഞു.

കൊൽക്കത്ത: ബിസിസിഐ പ്രസിഡന്റ് ഇന്ത്യൻ ക്രിക്കറ്റ് ടീം മുൻ ക്യാപ്റ്റനുമായി സൗരവ് ​ഗാം​ഗുലിയുടെ (Saurav Ganguly) വീട്ടിൽ കേന്ദ്ര ആഭ്യന്തരമന്ത്രി അമിത് ഷാക്ക് (Amit Shah)  വിരുന്ന്. ഇന്ന് രാത്രിയാണ് ​ഗാം​ഗുലിയുടെ വീട്ടിൽ മന്ത്രിക്ക് വിരുന്നൊരുക്കുന്നത്. അമിത് ഷാക്ക് സസ്യവിഭവങ്ങൾ മാത്രമാണ് തയ്യാറാക്കിയിരുന്നതെന്ന് ​ഗാം​ഗുലി പറഞ്ഞു. അത്താഴത്തിനുള്ള തന്റെ ക്ഷണം ആഭ്യന്തരമന്ത്രി സ്വീകരിച്ചെന്നും ഇന്ന് വൈകുന്നേരം ഒരുമിച്ച് ഭക്ഷണം കഴിക്കുമെന്നും ഗാംഗുലി പറഞ്ഞു. 2008 മുതൽ തനിക്ക് അമിത് ഷായെ പരിചയമുണ്ടെന്നും ​​ഗാം​ഗുലി പറഞ്ഞു.

കൊൽക്കത്തയിലെ വിക്ടോറിയ മെമ്മോറിയൽ ഹാളിൽ സാംസ്‌കാരിക മന്ത്രാലയം സംഘടിപ്പിക്കുന്ന 'മുക്തി-മാത്രിക' എന്ന സാംസ്‌കാരിക പരിപാടിയിലും അമിത് ഷാ പങ്കെടുക്കും. പരിപാടിയിൽ ഒഡീസി നർത്തകിയും സൗരവ് ഗാംഗുലിയുടെ ഭാര്യയുമായ ഡോണ ഗാംഗുലിയുടെ നൃത്ത ട്രൂപ്പായ ദിക്ഷ മഞ്ജരിയുടെയും നൃത്തവും പരിപാടിയിൽ അവതരിപ്പിക്കും. ബം​ഗാളിൽ പാർട്ടിയെ ശക്തിപ്പെടുത്തുന്നതിന്റെ ഭാ​ഗമായാണ് അമിത് ഷാ പര്യടനം നടത്തുന്നത്. മൂന്ന് ദിവസമാണ് സന്ദർശനം. പ്രധാന നേതാക്കളെയും പാർട്ടി അനുഭാവികളെയും കാണുന്നുണ്ട്. ബം​ഗാൾ നിയമസഭാ തെരഞ്ഞെടുപ്പിൽ ബിജെപിക്ക് കനത്ത തിരിച്ചടി നേരിട്ടിരുന്നു.

ലോക്സഭാ തെര‍ഞ്ഞെടുപ്പിലെ വിജയത്തിന് പിന്നാലെ നിയമസഭയിലും മികച്ച പ്രകടനം നടത്താമെന്നാണ് ബിജെപി പ്രതീക്ഷിച്ചത്. എന്നാൽ 200 സീറ്റിലധികം നേടി തൃണമൂൽ കോൺ​ഗ്രസ് വിജയിച്ചു. സൗരവ് ​ഗാം​ഗുലി അമിത് ഷാക്ക് വിരുന്നൊരുക്കുന്നത് ആകാംക്ഷയോടെയാണ് ബം​ഗാൾ രാഷ്ട്രീയം ഉറ്റുനോക്കുന്നത്. നിയമസഭ തെരഞ്ഞെടുപ്പിന് മുമ്പ് ​ഗാം​ഗുലി ബിജെപിയിൽ ചേർന്നേക്കുമെന്ന് അഭ്യൂഹമുയർന്നിരുന്നു.