ട്രെയിനിൽ ഫസ്റ്റ് ക്ലാസ് എസി കമ്പാര്‍ട്ട്മെന്റിൽ യാത്ര, സ്റ്റേഷനിൽ ഇങ്ങിയപ്പോൾ ലഗേജിന് ഭാരക്കൂടുതൽ; ടിടിഇ പരിശോധനയിൽ റെയിൽവേ ബെഡ് ഷീറ്റുകൾ

ഫസ്റ്റ് ക്ലാസ് എസിയിൽ യാത്ര ചെയ്ത ഒരു കുടുംബം റെയിൽവേ ബെഡ്ഷീറ്റുകൾ മോഷ്ടിക്കാൻ ശ്രമിച്ചുവെന്നാരോപണത്തിൽ കുടുങ്ങി. റെയിൽവേ ജീവനക്കാർ ഇവരെ ചോദ്യം ചെയ്യുന്ന വീഡിയോ വൈറലായതോടെ, റെയിൽവേ വസ്തുക്കൾ മോഷ്ടിക്കുന്നതിൻ്റെ   പ്രത്യാഘാതങ്ങളെക്കുറിച്ചും ചർച്ച 

ഒഡിഷ: പുരുഷോത്തം എക്സ്പ്രസ്സിലെ ഫസ്റ്റ് ക്ലാസ് എ.സി. കമ്പാർട്ട്മെന്റിൽ യാത്ര ചെയ്ത ഒരു കുടുംബം റെയിൽവേയുടെ ബെഡ്ഷീറ്റുകൾ മോഷ്ടിക്കാൻ ശ്രമിച്ചുവെന്നാരോപിച്ച് വീഡിയോ പുറത്തുവന്നു. ട്രെയിൻ ലക്ഷ്യസ്ഥാനത്തെത്തിയ ശേഷം പ്ലാറ്റ്‌ഫോമിൽ വെച്ച് റെക്കോർഡ് ചെയ്യപ്പെട്ട ഈ സംഭവം റെയിൽവേയുടെ വസ്തുക്കൾ മോഷ്ടിക്കുന്നതിലുള്ള ഗുരുതര പ്രശ്നങ്ങൾ ചൂണ്ടിക്കാട്ടിയാണ് പങ്കുവയ്ക്കപ്പെട്ടിരിക്കുന്നത്. പുരിയിൽ നിന്ന് ന്യൂദില്ലിയിലേക്ക് സർവീസ് നടത്തുന്ന ഒരു പ്രധാന ട്രെയിനാണ് പുരുഷോത്തം എക്സ്പ്രസ്.

വൈറൽ വീഡിയോയും കുടുംബവുമായുള്ള തർക്കവും

എക്‌സിൽ ബാപി സാഹു എന്ന ഉപയോക്താവ് പങ്കുവെച്ച വീഡിയോയിൽ ഒരു സ്ത്രീയും രണ്ട് പുരുഷന്മാരും ഉൾപ്പെടെയുള്ള മൂന്നംഗ കുടുംബത്തെ രണ്ട് ടിടിഇമാരും മറ്റ് റെയിൽവേ ജീവനക്കാരും ചോദ്യം ചെയ്യുന്നതാണ് കാണുന്നത്. ലഗേജിലേക്ക് ബെഡ്ഷീറ്റുകൾ ഒളിപ്പിക്കാൻ ശ്രമിച്ചതിന്റെ പേരിൽ ജീവനക്കാർ അവരെ ശാസിക്കുകയാണ്. സ്ത്രീ മടിച്ച് മടിച്ച് ബാഗിൽ നിന്ന് ബെഡ്ഷീറ്റുകൾ പുറത്തെടുക്കുന്നതും, കൂടെയുള്ള പുരുഷന്മാർ വ്യക്തമായ മറുപടി നൽകാതെ ഒഴിഞ്ഞുമാറുന്നതും വീഡിയോയിലുണ്ട്. "പുരുഷോത്തം എക്സ്പ്രസ്സിൽ ഫസ്റ്റ് എസിയിൽ യാത്ര ചെയ്യുന്നത് അഭിമാനകരമാണ്. പക്ഷേ, യാത്രാ വേളയിലെ സൗകര്യത്തിനായി നൽകുന്ന ബെഡ്ഷീറ്റുകൾ മോഷ്ടിച്ച് വീട്ടിലേക്ക് കൊണ്ടുപോകാൻ മടിക്കാത്ത ആളുകൾ ഇപ്പോഴുമുണ്ട്," എന്ന കുറിപ്പോടെയാണ് വീഡിയോ പങ്കുവെച്ചിരിക്കുന്നത്.

റെയിൽവേ വസ്തുക്കൾ മോഷ്ടിച്ചാൽ എന്ത് സംഭവിക്കും?

റെയിൽവേ നിയമം 1966-ലെ സെക്ഷൻ 3 പ്രകാരം റെയിൽവേ വസ്തുക്കൾ മോഷ്ടിക്കുന്നതോ നശിപ്പിക്കുന്നതോ ശിക്ഷാർഹമായ കുറ്റമാണ്. ആദ്യമായി ഈ കുറ്റം ചെയ്യുന്നവർക്ക് ഒരു വർഷം വരെ തടവോ 1000 രൂപ വരെ പിഴയോ അല്ലെങ്കിൽ രണ്ടും കൂടിയോ ലഭിക്കാം. ആവർത്തിച്ചുള്ള ഗുരുതരമായ ലംഘനങ്ങൾക്ക് ശിക്ഷ അഞ്ച് വർഷം വരെ തടവും ഉയർന്ന പിഴയും വരെയാകാം. ഇത് തടയാൻ റെയിൽവേ പ്രൊട്ടക്ഷൻ ഫോഴ്സ് (ആർ.പി.എഫ്) ഉദ്യോഗസ്ഥർ പതിവായി പരിശോധനകൾ നടത്താറുണ്ട്. യാത്രക്കാർക്ക് നൽകിയ എല്ലാ വസ്തുക്കളും യാത്രയുടെ അവസാനം തിരികെ ഏൽപ്പിക്കണമെന്നാണ് ചട്ടം. അതേസമയം, സംഭവം നടന്ന സമയത്തെക്കുറിച്ചും സ്ഥലത്തെക്കുറിച്ചുമുള്ള വിവരങ്ങൾ സ്ഥിരീകരിക്കപ്പെട്ടിട്ടില്ല. കൂടാതെ, പ്രതികളായ യാത്രക്കാർക്കെതിരെ എന്തെങ്കിലും നടപടി സ്വീകരിച്ചോ എന്നതിനെക്കുറിച്ച് അധികൃതർ ഔദ്യോഗിക പ്രസ്താവനയൊന്നും പുറത്തിറക്കിയിട്ടില്ല.