സരസ്വതി, സ്വീറ്റി, സീമ...ആരാണ് രാഹുൽ ​ഗാന്ധി തെളിവായി കാണിച്ച ബ്രസീലിയൻ മോഡൽ, സോഷ്യൽമീഡിയയിൽ ചൂടേറിയ ചർച്ച

ബ്രസീലിയന്‍ മോഡലിന്‍റെ ഈ ചിത്രം Unsplash എന്ന സ്റ്റോക്ക് ഇമേജ് വെബ്സൈറ്റിൽ നിന്നുള്ളതാണെന്നും തിരഞ്ഞെടുപ്പുമായി ബന്ധമില്ലെന്നും തെളിവുകള്‍ വ്യക്തമാക്കുന്നു.

ദില്ലി: 2024 ലെ ഹരിയാന നിയമസഭാ തെരഞ്ഞെടുപ്പിൽ 25 ലക്ഷം വ്യാജ വോട്ടുകൾ രേഖപ്പെടുത്തിയെന്ന് ആരോപിച്ച് കോൺഗ്രസ് നേതാവ് രാഹുൽ ഗാന്ധി, തെരഞ്ഞെടുപ്പിൽ ബ്രസീലിയൻ മോഡലിന്റെ പേരിൽ പോലും ബിജെപി കള്ളവോട്ടുണ്ടാക്കിയെന്ന് ആരോപിച്ചിരുന്നു. നവംബർ 5 ബുധനാഴ്ച ന്യൂഡൽഹിയിൽ നടന്ന പത്രസമ്മേളനത്തിലാണ് രാഹുൽ ഗാന്ധി, തെളിവുകൾ സഹിതം തന്റെ സംഘം കണ്ടെത്തിയെന്ന് ആരോപിച്ചത്. ഹരിയാനയിലെ എട്ട് വോട്ടർമാരിൽ ഒരാൾ വ്യാജനാണെന്ന് അദ്ദേഹം അവകാശപ്പെട്ടു. ഹരിയാനയിൽ രണ്ട് കോടി വോട്ടർമാരിൽ 25 ലക്ഷം പേരും വ്യാജന്മാരാണെന്നും അദ്ദേഹം പറഞ്ഞു. 5.21 ലക്ഷം ഡ്യൂപ്ലിക്കേറ്റ് വോട്ടർ എൻട്രികൾ കണ്ടെത്തിയതായും അവയിൽ ചിലതിൽ വ്യത്യസ്ത പേരുകളിൽ ഉപയോഗിച്ചിരിക്കുന്ന ഒരേ ഫോട്ടോ ഉണ്ടായിരുന്നതായും അദ്ദേഹം ആരോപിച്ചു.

ഉദാഹരണമായി, ബ്രസീലിയൻ മോഡലിന്റെ ചിത്രമുപയോ​ഗിച്ച് സീമ, സ്വീറ്റി, സരസ്വതി തുടങ്ങിയ പേരുകളിൽ സംസ്ഥാനത്തെ വോട്ടർ പട്ടികയിൽ ഒന്നിലധികം തവണ പ്രത്യക്ഷപ്പെട്ടതായും 22 തവണ വോട്ട് ചെയ്തതായും രാഹുൽ ആരോപിച്ചു. വോട്ടുകളുടെ എണ്ണം വർദ്ധിപ്പിക്കുന്നതിനായി ഐഡന്റിറ്റികൾ എങ്ങനെ പകർത്തിയെന്ന് ചിത്രം വ്യക്തമാക്കുന്നുവെന്ന് അദ്ദേഹം പറഞ്ഞു.

രാഹുൽ ​ഗാന്ധി അവതരിപ്പിച്ച ചിത്രങ്ങളിലൊന്ന് ഒരു ബ്രസീലിയൻ മോഡലിന്റേതായിരുന്നു. ഫോട്ടോഗ്രാഫർ മാത്യൂസ് ഫെറേറോയുടെ പേരിൽ സൗജന്യ സ്റ്റോക്ക് ഇമേജ് പ്ലാറ്റ്‌ഫോമായ Unsplash.comൽ അപ്‍ലോഡ് ചെയ്ത ചിത്രമാണിത്. നീല ഡെനിം ജാക്കറ്റ് ധരിച്ച സ്ത്രീ' എന്ന തലക്കെട്ടിലുള്ള ചിത്രം 2017 മാർച്ച് 2 നാണ് ആദ്യമായി പ്രസിദ്ധീകരിച്ചത്. 59 ദശലക്ഷത്തിലധികം തവണ ഇത് കാണുകയും 4 ലക്ഷത്തിലധികം തവണ ഡൗൺലോഡ് ചെയ്യപ്പെടുകയും ചെയ്തു. അൺസ്പ്ലാഷിലെ ഫെറേറോയുടെ പ്രൊഫൈൽ അദ്ദേഹം ഒരു പ്രൊഫഷണൽ ഫോട്ടോഗ്രാഫറാണെന്ന് സ്ഥിരീകരിക്കുന്നു. കാനൻ EOS ഡിജിറ്റൽ റെബൽ XS ക്യാമറ ഉപയോഗിച്ചാണ് ഈ ചിത്രം എടുത്തത്. ഹരിയാന തിരഞ്ഞെടുപ്പുമായി ബന്ധമില്ലാത്ത ബ്ലോഗുകളിലും ഓൺലൈൻ പോസ്റ്റുകളിലും ഇത് വ്യാപകമായി പ്രദർശിപ്പിച്ചിട്ടുണ്ട്. ആരോപിക്കപ്പെടുന്ന വോട്ടർ പകർപ്പിൽ മോഡലിന്റെയോ ഫോട്ടോഗ്രാഫറുടെയോ പങ്കാളിത്തത്തെക്കുറിച്ച് സൂചനയില്ല.