
പുണെ: കോടികൾ ചെലവിട്ടുള്ള ആഡംബര വിവാഹത്തിന് ദിവസങ്ങൾ മാത്രം ബാക്കിനിൽക്കെ, പ്രതിശ്രുത വരനെ മലമുകളിൽ നിന്ന് തള്ളിയിട്ട് കൊലപ്പെടുത്തി യുവതി. മഹാരാഷ്ട്രയിലെ പുണെയ്ക്കടുത്തുള്ള പ്രശസ്തമായ ലോഹഗഡ് കോട്ടയിലാണ് സിനിമാക്കഥയെ വെല്ലുന്ന ക്രൂരമായ കൊലപാതകം നടന്നത്. 32-കാരനായ ബിസിനസുകാരൻ കൽപേഷ് ഗെയ്ക്വാദാണ് കൊല്ലപ്പെട്ടത്. സംഭവത്തിൽ ഇയാളുടെ പ്രതിശ്രുത വധുവായ സിയ ഗോയലിനെ (28) പോലീസ് അറസ്റ്റ് ചെയ്തു. കാമുകൻ ചേതൻ ചൗധരിയുടെ സഹായത്തോടെയാണ് കൽപേഷിനെ കൊക്കയിലേക്ക് തള്ളിയിട്ട് കൊന്നതെന്നാണ് വിവരം.
ഏറെ നാളത്തെ പ്രണയത്തിനൊടുവിലാണ് ഇവരുടെ വിവാഹം ഉറപ്പിച്ചത്. രാജസ്ഥാനിലെ ജയ്പൂരിലുള്ള പ്രശസ്തമായ കൊട്ടാരത്തിൽ വെച്ച് 17 കോടി രൂപ ചെലവഴിച്ചായിരുന്നു ആഡംബര വിവാഹം പ്ലാൻ ചെയ്തിരുന്നത്. ഇതിനായുള്ള അഡ്വാൻസ് തുകയടക്കം നൽകി ബുക്കിങ്ങും പൂർത്തിയാക്കിയിരുന്നു. ജൂൺ 18-ന് ഇരുവരും ലോഹഗഡ് കോട്ടയിലെത്തി. ഡോളിയുടെ പിറന്നാൾ ആഘോഷിക്കാനാണ് കൽപേഷ് ഇവരെയും കൂട്ടി ഇവിടെയെത്തിയത്. എന്നാൽ മറ്റൊരു വ്യക്തിയുമായി തനിക്ക് പ്രണയമുണ്ടെന്നും ഈ വിവാഹത്തിൽ താല്പര്യമില്ലെന്നും ഡോളി കൽപേഷിനോട് ഇവിടെ വച്ച് പറഞ്ഞു. രണ്ട് കുടുംബങ്ങളും ചേർന്ന് ഉറപ്പിച്ച ആഡംബര വിവാഹത്തിൽ നിന്നും പിന്മാറാൻ കൽപേഷ് തയ്യാറായില്ല. വിവാഹവുമായി മുന്നോട്ട് പോകാൻ കൽപേഷ് നിർബന്ധിച്ചതാണ് ഡോളിയെ കൊലപാതകത്തിന് പ്രേരിപ്പിച്ചതെന്നാണ് വിവരം.
ലോഹഗഡ് കോട്ടയുടെ മുകളിൽ വെച്ച് സംസാരിക്കുന്നതിനിടെ സിയയും ചേതനും ചേർന്ന് കൽപേഷിനെ ആഴമേറിയ കൊക്കയിലേക്ക് തള്ളിയിട്ടെന്നാണ് പുറത്തുവരുന്ന വിവരം. സെൽഫിയെടുക്കാൻ ശ്രമിക്കുന്നതിനിടെ കൽപേഷ് കാൽവഴുതി താഴേക്ക് വീണതാണെന്ന് വരുത്തിതീർക്കാൻ ഇവർ ശ്രമിച്ചു. എന്നാൽ ഇവരുടെ ഫോൺ സംഭാഷണങ്ങൾ, മൊബൈലിലെ മറ്റ് വിവരങ്ങൾ എന്നിവയ്ക്ക് പുറമെ, കോട്ടയിൽ ഈ സമയത്തുണ്ടായിരുന്ന മറ്റ് സാക്ഷികളുടെ മൊഴിയും പൊലീസിനെ സംശയത്തിലാക്കി. പോലീസിന്റെ വിശദമായ ചോദ്യം ചെയ്യലിൽ സിയയുടെ മൊഴികളിലെ പരസ്പരവിരുദ്ധമായ കാര്യങ്ങൾ പുറത്തുവന്നു. തുടർന്ന് നടത്തിയ ശാസ്ത്രീയ അന്വേഷണത്തിലാണ് കൊലപാതകത്തിന്റെ ചുരുളഴിഞ്ഞത്. പ്രതിയായ യുവതിക്കും ചേതനും എതിരെ കൊലക്കുറ്റം ചുമത്തി പോലീസ് കേസെടുത്തു.
ഇന്ത്യയിലെയും ലോകമെമ്പാടുമുള്ള എല്ലാ India News അറിയാൻ എപ്പോഴും ഏഷ്യാനെറ്റ് ന്യൂസ് വാർത്തകൾ. Malayalam News തത്സമയ അപ്ഡേറ്റുകളും ആഴത്തിലുള്ള വിശകലനവും സമഗ്രമായ റിപ്പോർട്ടിംഗും — എല്ലാം ഒരൊറ്റ സ്ഥലത്ത്. ഏത് സമയത്തും, എവിടെയും വിശ്വസനീയമായ വാർത്തകൾ ലഭിക്കാൻ Asianet News Malayalam