പൗരത്വ നിയമ ഭേദ​ഗതി പ്രതിഷേധം; ചരിത്രമായി, കരുത്ത് പകര്‍ന്ന് സ്ത്രീ സാന്നിദ്ധ്യം

വീട്ടമ്മമാരും വിദ്യാർത്ഥികളും യാഥാസ്ഥിതികരായ സ്ത്രീകളുമുൾപ്പെടെയുള്ളവർ പ്രതിഷേധവുമായി തെരുവിലിറങ്ങിയിരിക്കുന്നു. പ്രതിഷേധത്തിലെ സ്ത്രീസാന്നിദ്ധ്യം വിളിച്ചോതുന്ന നിരവധി ചിത്രങ്ങളാണ് സമൂഹമാധ്യമങ്ങളുൾപ്പെടെയുള്ള മാധ്യമങ്ങൾ പങ്ക് വച്ചിരിക്കുന്നത്. 

ബം​ഗളൂരു: പൗരത്വ ഭേദ​ഗതി നിയമത്തിനെതിരെ ഉയർന്നുകൊണ്ടിരിക്കുന്ന പ്രതിഷേധത്തിൽ മുമ്പൊരിക്കലും കാണാൻ സാധിക്കാത്ത വിധത്തിലുള്ള സ്ത്രീ സാന്നിദ്ധ്യമാണുള്ളത്. വീട്ടമ്മമാരും വിദ്യാർത്ഥികളും യാഥാസ്ഥിതികരായ സ്ത്രീകളുമുൾപ്പെടെയുള്ളവർ പ്രതിഷേധവുമായി തെരുവിലിറങ്ങിയിരിക്കുന്നു. പ്രതിഷേധത്തിലെ സ്ത്രീസാന്നിദ്ധ്യം വിളിച്ചോതുന്ന നിരവധി ചിത്രങ്ങളാണ് സമൂഹമാധ്യമങ്ങളുൾപ്പെടെയുള്ള മാധ്യമങ്ങൾ പങ്ക് വച്ചിരിക്കുന്നത്. 

കഴിഞ്ഞ ഡിസംബർ 20 ന് ബം​ഗളൂരുവിൽ നടന്ന പ്രതിഷേധത്തിൽ പൊലീസ് ഉദ്യോ​ഗസ്ഥരുടെ ലാത്തി പ്രയോ​ഗത്തിൽ നിന്ന് പുരുഷൻമാരെ സംരക്ഷിക്കാൻ ചുറ്റും വലയം തീർത്ത് നിൽക്കുന്ന സ്ത്രീകളെ കാണാൻ സാധിക്കും. സ്ത്രീകൾ ദുർബലരാണെന്ന സ്ഥിരം വാദത്തെയും കാഴ്ചകളെയും മാറ്റിമറിക്കുന്നുണ്ട് ഈ ചിത്രം. ശുബാം നേ​ഗി എന്നയാളാണ് ഫേസ്ബുക്കിൽ ഈ ചിത്രം പോസ്റ്റ് ചെയ്തിരിക്കുന്നത്. പുരുഷൻമാർക്ക് ചുറ്റും സംരക്ഷണ വലയം തീർക്കുന്നതോടൊപ്പം തന്നെ പൗരത്വബില്ലിനെതിരെ ഉറക്കെ മുദ്രാവാക്യം മുഴക്കുക കൂടി ചെയ്യുന്നുണ്ട് ഇവർ. 

ഫോട്ടോ പോസ്റ്റ് ചെയ്ത ശുബാം നേ​ഗി ഇപ്രകാരം കുറിച്ചിരിക്കുന്നു, ''ബംഗളൂരുവിലെ വിദ്യാർത്ഥി പ്രതിഷേധത്തിൽ ഞാൻ‌ പങ്കെടുത്തിരുന്നു. ജീവൻ വരെ അപകടത്തിലാകുമെന്ന് അറിയാമെങ്കിലും നിരവധി പേർ  ഈ പ്രതിഷേധത്തിൽ പങ്കെടുത്ത് അറസ്റ്റ് വരിച്ചിരുന്നു. എന്നാൽ പ്രതിഷേധത്തിന് ഏറ്റവും കരുത്തു പകർന്ന് മുന്നിൽ നിന്നത് സ്ത്രീകളായിരുന്നു. സൂര്യാസ്തമയത്തിന് ശേഷവും സൂര്യോദയത്തിന് മുമ്പും സ്ത്രീകളെ അറസ്റ്റ് ചെയ്യാൻ‌ പാടില്ല എന്ന് ചട്ടമുണ്ട് എന്ന് നിങ്ങൾക്കറിയാമോ? അതാണ് അവരുടെ സുരക്ഷാ മാനദണ്ഡം'' നേ​ഗി ഫേസ്ബുക്ക് പോസ്റ്റിൽ കുറിക്കുന്നു. മുഖ്യധാരാ ബോളിവുഡ് സിനിമകളിൽ സ്ത്രീകളെ വെറും വസ്തുക്കളാക്കി മാറ്റുമ്പോൾ യഥാർത്ഥ സ്ത്രീകൾ ഇവിടെ തെരുവിൽ പുരുഷൻമാരുടെ ജീവൻ രക്ഷിച്ച് സമരത്തിലാണെന്നും നേ​ഗി കൂട്ടിച്ചേർക്കുന്നു. ജാമിയ ക്യാംപസിൽ പൊലീസ് കടന്നുകയറി അക്രമണം നടത്തിയതിനെ തുടർന്ന് നിരവധി സ്ത്രീകളാണ് പ്രതിഷേധവുമായി തെരുവിലിറങ്ങിയിരിക്കുന്നത്.

പൗരത്വനിയമ ഭേദ​ഗതിക്കെതിരെ നടന്ന പ്രതിഷേധങ്ങളിൽ ഏറ്റവും ശ്രദ്ധേയമായ ചിത്രങ്ങളിലൊന്ന് ജാമിയ ക്യാംപസിലെ മതിലിന് മുകളിൽ നിന്ന് വായുവിലേക്ക് വിരൽ ചൂണ്ടി മുദ്രാവാക്യം വിളക്കുന്ന മൂന്നു പെൺകുട്ടികളുടേതായിരുന്നു. മറ്റൊന്ന് പൊലീസിൽ നിന്ന് ആൺസുഹൃത്തുക്കളെ രക്ഷിക്കാൻ വലയം തീർക്കുന്ന സ്ത്രീകളുടേതും. പ്രതിഷേധത്തിന്റെ ചരിത്രനിമിഷങ്ങൾ അടയാളപ്പെടുത്തുമ്പോൾ ഈ ചിത്രങ്ങളും അതിൽ ഇടം പിടിക്കും.