മുഖ്യമന്ത്രിയായതിന് ശേഷം ആദ്യമായി അമ്മയെ സന്ദർശിച്ച് യോ​ഗി ആദിത്യ‌നാഥ്

കൊവിഡ് വ്യാപനമായതിനാൽ  2020 ഏപ്രിലിൽ ഹരിദ്വാറിൽ നടന്ന പിതാവിന്റെ ശവസംസ്കാര ചടങ്ങിൽ പങ്കെടുക്കാൻ യോ​ഗിക്ക് കഴിഞ്ഞില്ല.

ലഖ്‌നൗ: മുഖ്യമന്ത്രിയായതിന് ശേഷം ഉത്തർപ്രദേശ് മുഖ്യമന്ത്രി യോഗി ആദിത്യനാഥ് (UP CM Yogi Adityanath) ആദ്യമായി അമ്മയെ സന്ദ​ർശിച്ചു. അമ്മയുടെ കാൽതൊട്ട് വന്ദിക്കുന്ന ചിത്രം "മാ" എന്ന അടിക്കുറിപ്പോടെ ആദിത്യനാഥ് ട്വിറ്ററിൽ പങ്കുവെച്ചു. മുഖ്യമന്ത്രിയായതിന് ശേഷം യോ​ഗി ആദിത്യനാഥ് ആദ്യമായാണ് അമ്മ സാവിത്ര ദേവിയെ സന്ദർശിക്കുന്നത്. ഉത്തരാഖണ്ഡിലെ തന്റെ ജന്മനാടായ പൗരിയിൽ എത്തിയാണ് ആദിത്യനാഥ് അമ്മയെ സന്ദ​ർശിച്ചത്.  ബുധനാഴ്ച  നടക്കാനിരിക്കുന്ന കുടുംബ ചടങ്ങിനാണ് യോ​ഗി എത്തിയത്. 28 വർഷത്തിന് ശേഷം, ഔദ്യോ​ഗിക ചടങ്ങിനല്ലാതെ, വീട്ടിലെ കുടുംബ ചടങ്ങിൽ പങ്കെടുക്കാൻ ആദ്യമായാണ് ‌യോ​ഗി ഉത്തരാഖണ്ഡിലേക്ക് പോകുന്നത്. 

കൊവിഡ് വ്യാപനമായതിനാൽ  2020 ഏപ്രിലിൽ ഹരിദ്വാറിൽ നടന്ന പിതാവിന്റെ ശവസംസ്കാര ചടങ്ങിൽ പങ്കെടുക്കാൻ യോ​ഗിക്ക് കഴിഞ്ഞില്ല. "അവസാന നിമിഷത്തിൽ പിതാവിനെ ഒരു നോക്ക് കാണണമെന്ന് എനിക്ക് അതിയായ ആഗ്രഹമുണ്ടായിരുന്നു. എന്നാൽ കൊവിഡിന്റെ സമയത്ത് സംസ്ഥാനത്തെ 23 കോടി ജനങ്ങളോടുള്ള കടമ നിർവഹിക്കുന്നതിനാൽ എനിക്ക് അതിന് കഴിഞ്ഞില്ല," -മുഖ്യമന്ത്രി പറഞ്ഞു. 

സ്വന്തം ജില്ലയിലെ മഹായോഗി ഗുരു ഗോരഖ്നാഥ് സർക്കാർ കോളേജിൽ തന്റെ ആത്മീയ ഗുരു മഹന്ത് വൈദ്യനാഥിന്റെ പ്രതിമ അനാച്ഛാദനം ചെയ്തു. താൻ ജനിച്ച സ്ഥലത്ത് തന്റെ ആത്മീയ ഗുരുവിന്റെ പ്രതിമ അനാച്ഛാദനം ചെയ്യുന്നതിൽ അഭിമാനം തോന്നുന്നുവെന്നും അദ്ദേഹം പറഞ്ഞു.