കഴിഞ്ഞ 11 വർഷമായി അന്താരാഷ്ട്ര യാത്രക്കാരുടെ എണ്ണത്തിൽ ഗണ്യമായ വർദ്ധനവ് ഉണ്ടായി: അമിത് ഷാ

2014-ൽ 3.54 കോടിയായിരുന്ന വിദേശ യാത്രക്കാരുടെ എണ്ണം 2024-ൽ 6.12 കോടിയായി ഉയർന്നെന്ന് അമിത് ഷാ പറഞ്ഞു.

ദില്ലി: പ്രധാനമന്ത്രി നരേന്ദ്ര മോദിയുടെ നേതൃത്വത്തിൽ കഴിഞ്ഞ 11 വർഷമായി അന്താരാഷ്ട്ര യാത്രക്കാരുടെ എണ്ണത്തിൽ ഗണ്യമായ വർദ്ധനവ് ഉണ്ടായിട്ടുണ്ടെന്ന് കേന്ദ്ര ആഭ്യന്തര മന്ത്രി അമിത് ഷാ. 2014-ൽ വിദേശത്തേക്ക് സഞ്ചരിച്ച യാത്രക്കാരുടെ എണ്ണം 3.54 കോടിയായിരുന്നുവെന്നും ഇത് 2024-ൽ ഏകദേശം 73 ശതമാനം വർദ്ധിച്ച് 6.12 കോടിയായി എന്നും അദ്ദേഹം പറഞ്ഞു. ലഖ്‌നൗ, തിരുവനന്തപുരം, തിരുച്ചി, കോഴിക്കോട്, അമൃത്സർ വിമാനത്താവളങ്ങളിലെ ഫാസ്റ്റ് ട്രാക്ക് ഇമിഗ്രേഷൻ - ട്രസ്റ്റഡ് ട്രാവലർ പ്രോഗ്രാം (FTI-TTP) വീഡിയോ കോൺഫറൻസിംഗിലൂടെ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.

ഇന്ത്യ സന്ദർശിക്കുന്ന വിദേശ സഞ്ചാരികളുടെ എണ്ണം 2014-ൽ 1.53 കോടിയായിരുന്നു, ഇത് ഏകദേശം 31 ശതമാനം വർദ്ധിച്ച് 2024-ൽ ഏകദേശം 2 കോടിയായെന്ന് അമിത് ഷാ ചൂണ്ടിക്കാട്ടി. രണ്ട് കണക്കുകളും ചേർത്ത് നോക്കുമ്പോൾ, 2014-ൽ ആകെ യാത്രക്കാരുടെ എണ്ണം 5.07 കോടിയായിരുന്നു, 2024-ൽ ഇത് 8.12 കോടിയായിരുന്നുവെന്നും അദ്ദേഹം പറഞ്ഞു. ഇത് വിദേശത്ത് നിന്ന് വന്നവരോ വിദേശത്തേക്ക് യാത്ര ചെയ്തവരോ ആയവരെ പ്രതിനിധീകരിക്കുന്നു, ഇത് മൊത്തത്തിൽ 60 ശതമാനം വർദ്ധനവിനെ സൂചിപ്പിക്കുന്നു. എല്ലാ ഇന്ത്യൻ പൗരന്മാർക്കും ഒസിഐ കാർഡ് ഉടമകൾക്കും ഈ സൗകര്യം പ്രയോജനപ്പെടുന്നുവെന്ന് ഉറപ്പാക്കുക എന്നതാണ് നമ്മുടെ ലക്ഷ്യമെന്നും അദ്ദേഹം ഊന്നിപ്പറഞ്ഞു.

അതേസമയം, ഫാസ്റ്റ് ട്രാക്ക് ഇമിഗ്രേഷൻ - ട്രസ്റ്റഡ് ട്രാവലർ പ്രോഗ്രാം (FTI-TTP) ഉപയോ​ഗപ്പെടുത്തുന്നതിലൂടെ ഇന്ന് മുതൽ വിമാനത്താവളങ്ങളിൽ തടസ്സമില്ലാത്ത ഇമിഗ്രേഷൻ സൗകര്യങ്ങൾ ലഭ്യമാകുമെന്ന് അമിത് ഷാ പറഞ്ഞു. സൗകര്യം ഒരുക്കിയാൽ മാത്രം പോരാ, പരമാവധി യാത്രക്കാർക്ക് അതിന്റെ പ്രയോജനം ലഭിക്കുന്നുണ്ടെന്ന് ഉറപ്പാക്കുകയും ചെയ്യണമെന്ന് അദ്ദേഹം കൂട്ടിച്ചേർത്തു. ഈ നേട്ടം കൈവരിക്കുന്നതിനായി, പാസ്‌പോർട്ടുകളും ഒസിഐ കാർഡുകളും നൽകുന്ന സമയത്തു തന്നെ രജിസ്ട്രേഷൻ സാധ്യമാക്കാൻ ശ്രമിക്കണം. ഇത് നടപ്പിലാക്കാൻ കഴിഞ്ഞാൽ യാത്രക്കാർക്ക് വിരലടയാളം പതിക്കാനോ രേഖകൾ തയ്യാറാക്കുന്നതിനോ ​​വേണ്ടി തിരികെ വരേണ്ടതില്ലെന്നും, അവർക്ക് ഇഷ്ടമുള്ളപ്പോഴെല്ലാം പാസ്‌പോർട്ട് ഉപയോഗിച്ച് യാത്ര ചെയ്യാനാകുമെന്നും അദ്ദേഹം പറഞ്ഞു.

പരമാവധി ആളുകൾക്ക് ഈ പരിപാടിയുടെ പ്രയോജനം ലഭിക്കുന്നുണ്ടെന്ന് ഉറപ്പാക്കാൻ എല്ലാ സാങ്കേതിക സാധ്യതകളും പരിശോധിക്കണമെന്ന് കേന്ദ്ര ആഭ്യന്തര മന്ത്രി കൂട്ടിച്ചേർത്തു. ഇന്ത്യൻ പൗരന്മാർക്ക് തീർച്ചയായും പ്രയോജനം ലഭിക്കുമെങ്കിലും, ഒസിഐ കാർഡ് ഉടമകൾക്ക് ഏറ്റവും കൂടുതൽ പ്രയോജനം ലഭിക്കുമെന്നും അദ്ദേഹം സൂചിപ്പിച്ചു. തിരുവനന്തപുരം, കോഴിക്കോട് വിമാനത്താവളങ്ങളിൽ കൂടി ഈ സംവിധാനം ആരംഭിക്കുന്നതോടെ കേരളത്തിൽ മൂന്നി‌ടത്ത് അതിവേഗ എമിഗ്രേഷന്‍ സംവിധാനം നിലവിൽ വന്നിരിക്കുകയാണ്.