അമേരിക്കയിൽ 30 വർഷമായി കഴിയുന്ന 73കാരി; ഇന്ത്യാക്കാരി ഇമ്മിഗ്രേഷൻ വിഭാഗത്തിൻ്റെ കസ്റ്റഡിയിൽ

മുപ്പത് വർഷമായി അമേരിക്കയിൽ കഴിയുന്ന ഇന്ത്യാക്കാരിയായ 73 വയസ് പ്രായമുള്ള സിഖ് വനിതയെ  ഇമ്മിഗ്രേഷൻ വിഭാഗം തടഞ്ഞുവെച്ചിരിക്കുന്നു. സംഭവത്തിൽ പ്രതിഷേധവുമായി കുടുംബവും സിഖ് സമൂഹവും രംഗത്തെത്തി

കാലിഫോർണിയ: അമേരിക്കയിൽ 73കാരിയായ സിഖ് വനിതയെ ഇമ്മിഗ്രേഷൻ ആൻ്റ് കസ്റ്റംസ് ഉദ്യോഗസ്ഥർ തടഞ്ഞുവെച്ചു. കാലിഫോർണിയയിൽ പതിവ് പരിശോധനകളുടെ ഭാഗമായി എത്തിയ വനിതയെയാണ് ഉദ്യോഗസ്ഥർ തടഞ്ഞുവെച്ചത്. സംഭവത്തിൽ സ്ത്രീയുടെ കുടുംബം പ്രതിഷേധിച്ചു. മുപ്പത് വർഷമായി വടക്കൻ കാലിഫോർണിയയിലെ ഈസ്റ്റ് ബേയിൽ താമസിക്കുന്ന ഹർജിത് കൗറിനാണ് ദുരനുഭവം.

പ്രതിഷേധവുമായി കുടുംബവും സിഖ് സമൂഹവും

സംഭവത്തിന് പിന്നാലെ ഹർജിത് കൗറിൻ്റെ കുടുംബവും സിഖ് സമൂഹത്തിൽ നിന്നുള്ളവരും ഒന്നിച്ചാണ് പ്രതിഷേധിച്ചത്. എന്നാൽ ഹർജിത് കൗറിന് രേഖകളില്ലെന്നാണ് ഉദ്യോഗസ്ഥർ പറയുന്നത്. 1992 ൽ രണ്ട് ആൺമക്കളുമായി ഇന്ത്യയിൽ നിന്ന് അമേരിക്കയിലെത്തിയതാണ് ഇവർ. 2012 ൽ അഭയാർത്ഥിത്വത്തിനുള്ള ഇവരുടെ അപേക്ഷ നിരസിക്കപ്പെട്ടിരുന്നു. എന്നാൽ പിന്നീടുള്ള എല്ലാ സമയത്തും അവർ വർഷത്തിൽ രണ്ട് തവണ അവർ ഇമ്മിഗ്രേഷൻ വിഭാഗത്തിൽ നേരിട്ട് ഹാജരായിരുന്നുവെന്നും ഒരിക്കൽ പോലും ഇത് തെറ്റിയിട്ടില്ലെന്നും ഇവരുടെ മരുമകൾ ഇയോ മഞ്ചി കൗർ പറയുന്നു.

വയോധികയും അസുഖബാധിതയുമായ ഹർജിത് കൗറിനെ മുപ്പത് വർഷങ്ങൾക്ക് ശേഷം ഇന്ത്യയിലേക്ക് തിരിച്ചയക്കുമോയെന്ന ആശങ്കയിലാമ് കുടുംബം. തൈറോയ്‌ഡ്, മൈഗ്രേൻ, മുട്ടുവേദന, ആങ്സൈറ്റി അടക്കം ബുദ്ധിമുട്ടുകൾ ഇവർക്കുണ്ടെന്നാണ് കുടുംബം പറയുന്നത്.