പശ്ചിമേഷ്യയിലേക്ക് സർവീസുകൾ ശക്തിപ്പെടുത്തി എയർ ഇന്ത്യ ഗ്രൂപ്പ്; ഇന്ന് മാത്രം 80 വിമാനങ്ങൾ സർവീസിൽ

പശ്ചിമേഷ്യൻ രാജ്യങ്ങളിലെ യാത്രാത്തിരക്ക് പരിഗണിച്ച് എയർ ഇന്ത്യ ഗ്രൂപ്പ് വിമാന സർവീസുകൾ വർധിപ്പിക്കുന്നു. എയർ ഇന്ത്യയും എയർ ഇന്ത്യ എക്സ്പ്രസും ചേർന്ന് ഇന്ന് 80 സർവീസുകൾ നടത്തുന്നുണ്ട്.

ദില്ലി: പശ്ചിമേഷ്യൻ രാജ്യങ്ങളിലേക്കും അവിടെ നിന്ന് ഇന്ത്യയിലേക്കുമുള്ള യാത്രക്കാരുടെ തിരക്ക് പരിഗണിച്ച് എയർ ഇന്ത്യ ഗ്രൂപ്പ് പ്രത്യേക വിമാന സർവീസുകൾ ശക്തിപ്പെടുത്തുന്നു. ഇന്ന് (മാർച്ച് 14) എയർ ഇന്ത്യയും എയർ ഇന്ത്യ എക്സ്പ്രസും ചേർന്ന് ആകെ 80 വിമാന സർവീസുകൾ പശ്ചിമേഷ്യൻ മേഖലയിലേക്ക് നടത്തുമെന്ന് അധികൃതർ അറിയിച്ചിട്ടുണ്ട്. ഇതിൽ നിശ്ചിത സർവീസുകളോടൊപ്പം പ്രത്യേക (അഡ്‌ഹോക്ക്) സർവീസുകളും ഉൾപ്പെടുന്നുണ്ട്. പ്രത്യേകിച്ച് സൗദി അറേബ്യയിലെ ജിദ്ദയും ഒമാനിലെ മസ്‌കത്തുമാണ് നിശ്ചിത സർവീസുകൾ തുടരുന്ന പ്രധാന സ്ഥലങ്ങൾ.

ജിദ്ദയിലേക്ക് എയർ ഇന്ത്യയും എയർ ഇന്ത്യ എക്സ്പ്രസും ചേർന്ന് മൊത്തം 10 വിമാന സർവീസുകൾ നടത്തും. ദില്ലിയിൽ നിന്ന് ഒരു റൗണ്ട് ട്രിപ്പും മുംബൈയിൽ നിന്ന് രണ്ട് റൗണ്ട് ട്രിപ്പുകളും എയർ ഇന്ത്യ നടത്തും. കോഴിക്കോട്, മംഗളൂരു എന്നിവിടങ്ങളിൽ നിന്നായി എയർ ഇന്ത്യ എക്സ്പ്രസും സർവീസുകൾ നടത്തും. അതേസമയം, മസ്‌കത്തിലേക്ക് എയർ ഇന്ത്യ എക്സ്പ്രസ് എട്ട് നിശ്ചിത സർവീസുകൾ നടത്തും. ദില്ലി, കൊച്ചി, കോഴിക്കോട്, മുംബൈ എന്നിവിടങ്ങളിൽ നിന്ന് മസ്‌കത്തിലേക്കുള്ള റൗണ്ട് ട്രിപ്പ് സർവീസുകൾ ഇതിൽ ഉൾപ്പെടുന്നു.

ഇതുകൂടാതെ, യു.എ.ഇയും സൗദി അറേബ്യയും ലക്ഷ്യമാക്കി 62 അധിക പ്രത്യേക സർവീസുകൾ നടത്താനാണ് പദ്ധതി. ബന്ധപ്പെട്ട വിമാനത്താവളങ്ങളിൽ സ്ലോട്ട് ലഭ്യതയും മറ്റ് പ്രവർത്തന സാഹചര്യങ്ങളും അനുസരിച്ചായിരിക്കും ഈ സർവീസുകൾ നടത്തുക. ഇന്ത്യയിലെയും പ്രാദേശിക അധികാരികളിലെയും ആവശ്യമായ അനുമതികൾ ലഭിച്ച ശേഷമാണ് ഈ വിമാനങ്ങൾ പ്രവർത്തിക്കുന്നത്.

ദുബായ്, അബുദാബി, ഷാർജ, റാസ് അൽ ഖൈമ തുടങ്ങിയ യുഎഇ വിമാനത്താവളങ്ങളിലേക്ക് ദില്ലി, മുംബൈ, ചെന്നൈ, ബെംഗളൂരു, ഹൈദരാബാദ്, കൊച്ചി, കോഴിക്കോട്, തിരുവനന്തപുരം തുടങ്ങിയ നഗരങ്ങളിൽ നിന്ന് അധിക സർവീസുകൾ നടത്തും. അതേസമയം, ഉത്തര അമേരിക്ക, യൂറോപ്പ്, ഓസ്ട്രേലിയ എന്നിവയുൾപ്പെടെയുള്ള മറ്റ് അന്താരാഷ്ട്ര റൂട്ടുകളിലെ എയർ ഇന്ത്യ സർവീസുകൾ പതിവ് ഷെഡ്യൂൾ പ്രകാരം തുടരുമെന്ന് അധികൃതർ അറിയിച്ചു.

ചില റൂട്ടുകളിൽ നിശ്ചിത സർവീസുകൾ താൽക്കാലികമായി നിർത്തിയിരിക്കുന്നതിനാൽ ടിക്കറ്റ് ബുക്ക് ചെയ്ത യാത്രക്കാർക്ക് അധിക ചാർജില്ലാതെ പുതിയ തീയതിയിലേക്ക് യാത്ര മാറ്റാനോ പൂർണ്ണ റീഫണ്ട് ലഭിക്കാനോ സൗകര്യമൊരുക്കിയിട്ടുണ്ട്. യാത്രാ മാറ്റം, റദ്ദാക്കൽ തുടങ്ങിയ ആവശ്യങ്ങൾ എയർ ഇന്ത്യയുടെ ഔദ്യോഗിക വെബ്സൈറ്റ് വഴിയോ 24 മണിക്കൂർ പ്രവർത്തിക്കുന്ന ഹെൽപ്‌ലൈൻ നമ്പറുകളിലൂടെയോ അറിയിക്കാം. പശ്ചിമേഷ്യയിലെ യാത്രക്കാരുടെ ആവശ്യങ്ങൾ പരിഗണിച്ച് കൂടുതൽ അധിക സർവീസുകൾ നടത്താനുള്ള സാധ്യതകളും എയർ ഇന്ത്യ ഗ്രൂപ്പ് പരിശോധിച്ചുകൊണ്ടിരിക്കുകയാണ്.