ഞെട്ടിത്തരിച്ച് ഷി ജിൻപിങ്, പണി നൽകിയത് വലംകൈ; രാജ്യത്തിന്റെ ആണവ പദ്ധതി അമേരിക്കക്ക് ചോർത്തി സൈനിക ഉന്നതൻ

ചൈനീസ് പ്രസിഡന്റ് ഷി ജിൻപിങ്ങിന്റെ വലംകൈയും സൈനിക ഉന്നതനുമായ ഷാങ് യൂക്സിയക്കെതിരെ ഗുരുതര ആരോപണം. രാജ്യത്തിന്റെ ആണവ പദ്ധതിയുടെ വിവരങ്ങൾ അമേരിക്കക്ക് ചോർത്തി നൽകിയെന്നും കൈക്കൂലി വാങ്ങിയെന്നും ആരോപണമുയർന്നതോടെ ഇദ്ദേഹം അന്വേഷണം നേരിടുകയാണ്. 

ദില്ലി: അമേരിക്ക് ആണവ പദ്ധതിയുടെ വിവരങ്ങൾ ചോർത്തി നൽകിയെന്ന് ചൈനീസ് ഉന്നതനെതിരെ ആരോപണം. പ്രസിഡന്റ് ഷി ജിങ്‌പിങ്ങിന്റെ കീഴിലുള്ള രണ്ടാമത്തെ കമാൻഡറും കേന്ദ്ര സൈനിക കമ്മീഷൻ വൈസ് ചെയർമാനുമായ ഷാങ് യൂക്സിയക്കെതിരെയാണ് ​ഗുരുതരമായ ആരോപണമുയർന്നത്. ഷിയുടെ ഏറ്റവും അടുത്ത സൈനിക സഖ്യകക്ഷികളിൽ ഒരാളായാണ് ഷാങ് അറിയപ്പെട്ടിരുന്നത്. ചൈനയുടെ ആണവ പദ്ധതിയെക്കുറിച്ചുള്ള വിവരങ്ങൾ യുഎസിന് ചോർത്തി നൽകിയതിനും ഉദ്യോഗസ്ഥനെ പ്രതിരോധ മന്ത്രിയായി സ്ഥാനക്കയറ്റം നൽകുന്നത് പോലുള്ള ഔദ്യോഗിക പ്രവർത്തനങ്ങൾക്കായി കൈക്കൂലി വാങ്ങിയെന്നുമാണ് ആരോപണം. സിഎംസിയുടെ ജോയിന്റ് സ്റ്റാഫ് വകുപ്പിലെ ചീഫ് ഓഫ് സ്റ്റാഫ് ആയ ഷാങ്ങും ലിയു സെൻലിയും അന്വേഷണത്തിലാണെന്ന് ചൈനീസ് മന്ത്രാലയം ശനിയാഴ്ച പ്രഖ്യാപിച്ചു.

ഷാങ്ങിന് ഷി ജിയുമായുള്ള വ്യക്തിപരമായ രാഷ്ട്രീയ അടുപ്പം കാരണം സുരക്ഷാ വിശകലന വിദഗ്ധരും വിദേശ നയതന്ത്രജ്ഞരും സംഭവവികാസങ്ങളെ സൂക്ഷ്മമായി നിരീക്ഷിക്കുന്നുണ്ട്. ചൈനയുടെ ഉന്നത സൈനിക നേതൃത്വത്തിൽ അഭിപ്രായ ഭിന്നതയുണ്ടെന്ന് അന്വേഷണം സൂചിപ്പിക്കുന്നു. ഭരണകക്ഷിയായ കമ്മ്യൂണിസ്റ്റ് പാർട്ടിയുടെ പോളിറ്റ് ബ്യൂറോ അംഗമായ ഷാങ്, യുദ്ധ പരിചയമുള്ള ചുരുക്കം ചില മുൻനിര ഉദ്യോഗസ്ഥരിൽ ഒരാളാണെന്ന് ദി ഗാർഡിയൻ റിപ്പോർട്ട് ചെയ്തു. 

അതേസമയം, തായ്‌വാൻ ചൈനയെ നിരീക്ഷിക്കുന്നത് ശക്തമാക്കി. ചൈനയുടെ പാർട്ടി, സർക്കാർ, സൈനിക നേതൃത്വം എന്നിവയുടെ ഉന്നത തലങ്ങളിലെ അസാധാരണ മാറ്റങ്ങൾ ഞങ്ങൾ സൂക്ഷ്മമായി നിരീക്ഷിക്കുന്നത് തുടരും. തായ്‌വാനെതിരെ ബലപ്രയോഗം ചൈന ഒരിക്കലും ഉപേക്ഷിച്ചിട്ടില്ല എന്ന വസ്തുതയെ അടിസ്ഥാനമാക്കിയുള്ളതാണ് സൈന്യത്തിന്റെ നിലപാടെന്ന് തായ്‌വാൻ പ്രതിരോധ മന്ത്രി വെല്ലിംഗ്ടൺ കൂ പാർലമെന്റിൽ മാധ്യമപ്രവർത്തകരോട് പറഞ്ഞു.