ഇസ്രയേലിനെ മൈൻഡാക്കിയില്ല, സൗദിയ്ക്ക് എഫ്-35 നൽകുമെന്ന് ട്രംപ്; ചൈനയ്ക്ക് 'ഗോൾഡൻ ചാൻസ്'?

സൗദി അറേബ്യയ്ക്ക് എഫ്-35 യുദ്ധവിമാനങ്ങൾ വിൽക്കാൻ പദ്ധതിയുണ്ടെന്ന ഡൊണാൾഡ് ട്രംപിന്റെ പ്രഖ്യാപനം അന്താരാഷ്ട്ര തലത്തിൽ വലിയ ചര്‍ച്ചകൾക്ക് വഴിയൊരുക്കിയിരിക്കുകയാണ്. 

ന്യൂയോ‍ര്‍ക്ക്: സൗദി അറേബ്യയ്ക്ക് എഫ്-35 യുദ്ധവിമാനങ്ങൾ വിൽക്കാൻ പദ്ധതിയുണ്ടെന്ന അമേരിക്കൻ പ്രസിഡന്റ് ഡൊണാൾഡ് ട്രംപിന്റെ ഏറ്റവും പുതിയ പ്രഖ്യാപനം ചര്‍ച്ചയാകുന്നു. സൗദി കിരീടാവകാശി മുഹമ്മദ് ബിൻ സൽമാന്റെ അമേരിക്കൻ സന്ദർശനത്തിന് മുന്നോടിയായിട്ടാണ് ട്രംപ് ഇക്കാര്യം അറിയിച്ചത്. മാധ്യമപ്രവർത്തകരുടെ ചോ​ദ്യത്തിന് മറുപടിയായിട്ടായിരുന്നു ട്രംപിന്റെ പ്രതികരണം. അമേരിക്ക സൗദിക്ക് എഫ്-35 ജെറ്റുകൾ നൽകുന്നു എന്നത് ഇരു രാഷ്ട്രങ്ങളും തമ്മിലുള്ള ബന്ധത്തിൽ നിർണായകമാണ്. സൗദിയെ മഹത്തായ സഖ്യകക്ഷി എന്ന് വിശേഷിപ്പിച്ചായിരുന്നു ട്രംപ് ഇക്കാര്യം അറിയിച്ചത്. എന്താണ് എഫ്-35 ജെറ്റുകളുടെയും ട്രംപിന്റെ പ്രഖ്യാപനത്തിന്റെയും പ്രത്യേകതകൾ എന്ന് നോക്കാം.

യുഎസ് എയ്റോസ്പേസ് കമ്പനിയായ ലോക്ഹീഡ് മാർട്ടിൻ നിർമ്മിക്കുന്ന സ്റ്റെൽത്ത് സ്ട്രൈക്ക് ഫൈറ്ററുകളുടെ ​ഗണത്തിലുള്ള ജെറ്റുകളാണ് എഫ്-35. ലോകത്തിലെ ഏറ്റവും അഡ്‍വാൻസ്ഡ് ആയ ഫൈറ്റർ ജെറ്റ് എന്നാണ് എഫ്-35നെ വിശേഷിപ്പിക്കാറുള്ളത്. റഡാറുകളുടെയും മറ്റ് സാങ്കേതിക വിദ്യകളുടെയും കണ്ണിൽപ്പെടില്ലാത്ത രീതിയിലാണ് ഇതിന്റെ ഡിസൈൻ. ശത്രുവിന്റെ പ്രതിരോധങ്ങളെയും യുദ്ധ വിമാനങ്ങളെയും വിക്ഷേപിക്കുന്നതിന് മുമ്പേ ആക്രമിക്കാനുള്ള കഴിവിലൂടെ ഒരു വ്യോമ മേധാവിത്വമാണ് എഫ്-35 ലക്ഷ്യമിടുന്നത്. എഫ്-35 എ, എഫ്-35, ബി, എഫ്-35 സി എന്നിങ്ങനെ മൂന്ന് വേരിയന്റ് ജെറ്റുകളാണുള്ളത്. ഓസ്ട്രേലിയ, കാനഡ, ഇറ്റലി, നെതർലന്റ്സ്, നോർവേ, യുകെ, ഡെൻമാർക്ക് തുടങ്ങി നിരവധി രാജ്യങ്ങൾ എഫ്-35ന്റെ നിർമ്മാണത്തിൽ അമേരിക്കയുമായി പങ്കാളിത്തത്തിൽ ഏർപ്പെട്ടിട്ടുണ്ട്.

സ്റ്റെൽത്ത്, അഡ്വാൻസ്ഡ് സെൻസറുകൾ, ഹൈ സ്പീഡ് കമ്പ്യൂട്ടിങ് എന്നിവയുടെ സംയോ​ജനമാണ് ഇവയെ വ്യത്യസ്തമാക്കുന്നത്. മുൻ യുദ്ധവിമാനങ്ങളെ അപേക്ഷിച്ച് ശത്രുക്കൾക്ക് കണ്ടുപിടിക്കാൻ ബുദ്ധിമുട്ടേറിയതും ഡാറ്റാ ശേഖരണത്തിൽ മികവേറിയതുമാണ് ഇത്. കാലങ്ങളായി അമേരിക്കൻ ആയുധങ്ങൾ വാങ്ങുന്നതിൽ മുൻപന്തിയിലാണ് സൗദി അറേബ്യ. എന്നാൽ എഫ്-35ൽ പങ്കാളിയാകാൻ സൗദിക്ക് കഴിഞ്ഞിട്ടില്ല. ഏറ്റവും അടുത്ത സഖ്യകക്ഷികൾക്ക് മാത്രമാണ് എഫ്-35 വിമാനങ്ങൾ വിൽക്കാൻ യുഎസിന് അനുമതിയുള്ളു. എഫ്-35 സ്വന്തമാക്കാനായാൽ, വ്യോമസേനയെ ശക്തിപ്പെടുത്തുന്നതിനൊപ്പം മിഡിൽ ഈസ്റ്റിൽ തങ്ങളുടെ പവർ ഊട്ടി ഉറപ്പിക്കാനും സൗദിക്ക് കഴിയും.

ഇസ്രയേലാണ് നിലവിൽ ഈ പോർവിമാനം സ്വന്തമായുള്ള ഏക മിഡിൽ ഈസ്റ്റ് രാജ്യം. ഈ മോണോപോളി വിട്ടുകൊടുക്കാൻ ഇസ്രയേൽ ഇതുവരെ തയ്യാറായിട്ടില്ല. മിഡിൽ ഈസ്റ്റിലെ ഇസ്രയേലിന്റെ താൽപര്യങ്ങളെ പരി​ഗണിക്കാതെയാണ് ട്രംപിന്റെ പ്രഖ്യാപനം എന്നതും ശ്രദ്ധേയമാണ്. ഇസ്രയേലുമായുള്ള ബന്ധം മെച്ചപ്പെടുത്താൻ അമേരിക്കയുടെ മധ്യസ്ഥതയിൽ തയ്യാറാക്കിയ അബ്രഹാം കരാറിൽ സൗദി ഇതുവരെ ധാരണയിലെത്തിയിട്ടുമില്ല. എഫ്-35 വിമാനങ്ങൾ സൗദിക്ക് നൽകുന്നത്, ഇസ്രയേലിന്റെ "ക്വാളിറ്റേറ്റീവ് മിലിട്ടറി എഡ്ജ്" നിലനിർത്താനുള്ള യുഎസ് നിയമങ്ങളെ ലംഘിക്കുമോ എന്ന ആശങ്ക ഇപ്പോഴും നിലനിൽക്കുന്നുണ്ട്.

ഇന്റലിജൻസ് മുന്നറിയിപ്പുകൾ മറികടന്നാണ് ട്രംപിന്റെ നീക്കം എന്നതാണ് ശ്രദ്ധേയമായ മറ്റൊരു കാര്യം. സൗ​ദിയും ചൈനയും തമ്മിൽ സെക്യൂരിറ്റി പാർട്ണർഷിപ്പ് നിലനിൽക്കുന്നുണ്ട്. ഈ പശ്ചാത്തലത്തിൽ കരാറുമായി അമേരിക്ക മുന്നോട്ടുപോയാൽ ചൈനയ്ക്ക് എഫ്-35 ന്റെ സാങ്കേതിക വിദ്യ ആക്സസ് ചെയ്യാൻ കഴിയുമെന്ന ആശങ്ക അമേരിക്കയുടെ ഡിഫൻസ് ഇന്റലിജൻസ് ഏജൻസി മുന്നോട്ടുവെച്ചിരുന്നു. അന്താരാഷ്ട്ര തലത്തിലെ സൗദിയുടെ ഇടപെടലുകളുടെ പശ്ചാത്തലത്തിൽ എഫ്-35 സൗദിക്ക് നൽകുന്നത് രാജ്യസുരക്ഷയ്ക്ക് വിലങ്ങുതടിയായേക്കാമെന്ന ആശങ്കയും നിലനിൽക്കുന്നുണ്ട്.

യഥാർത്ഥത്തിൽ എഫ്-35 കൈമാറ്റം അത്ര എളുപ്പമുള്ള കാര്യമല്ല. വർഷങ്ങൾ നീണ്ടേക്കാവുന്ന ചർച്ചകൾ ആവശ്യമുണ്ട് ഇതിന്. ഇത്തവണയും വെല്ലുവിളികൾ നിരവധിയാണ്. ആദ്യത്തേത് അമേരിക്കയോട് ജെറ്റുകൾക്കായി ഔദ്യോ​ഗികമായി ആവശ്യപ്പെടണം. അതിന് യുഎസ് കോൺ​ഗ്രസ് അം​ഗീകാരം നൽകണം. തുടർന്ന് പെന്റ​ഗൺ ഒരു ലെറ്റർ ഓഫ് ഓഫർ ആന്റ് ആക്സപ്റ്റൻസ് അന്തിമമാക്കണം. തുടർന്ന് സൗദി ലോക്ക് ഹീഡുമായി ചർച്ചകൾ നടത്തണം. എന്നിരുന്നാലും ജെറ്റുകൾ നൽകാമെന്ന ട്രംപിന്റെ പ്രഖ്യാപനം ഇരു രാജ്യങ്ങളും തമ്മിലുള്ള നയതന്ത്ര ബന്ധത്തിൽ പ്രധാന വഴിത്തിരിവായേക്കും. ജമാൽ ഖഷോ​ഗിയുടെ കൊലയ്ക്ക് പിന്നാലെ ഇരുരാജ്യങ്ങളും തമ്മിൽ അസ്വാരസ്യങ്ങൾ ഉടലെടുത്തിരുന്നു. സൗദി അറേബ്യയ്ക്കും കിരീടാവകാശിക്കും എതിരായ വിമർശനങ്ങളെ തള്ളിയായിരുന്നു ട്രംപിന്റെ നീക്കം.

ട്രംപ് അം​ഗീകാരം നൽകിയാൽപ്പോലും ആയുധ വിൽപന തടയാനുള്ള അധികാരം യുഎസ് കോൺ​ഗ്രസിനുണ്ട്. സൗദിക്ക് എഫ്-35 വിമാനങ്ങൾ വിൽക്കാനുള്ള അനൗദ്യോഗിക നീക്കങ്ങൾ നടന്നെങ്കിലും ഇതുവരെ ഔദ്യോ​ഗിക തീരുമാനങ്ങളിലേക്ക് അമേരിക്ക കടന്നിട്ടില്ല.