ഇന്ത്യ-യുഎഇ ബന്ധത്തിന് പുതിയ ഊർജ്ജം; മുംബൈയിൽ ഡോ. എസ് ജയശങ്കറുമായി കൂടിക്കാഴ്ച നടത്തി ശൈഖ് അബ്ദുള്ള ബിൻ സായിദ്

യുഎഇ ഉപപ്രധാനമന്ത്രി ശൈഖ് അബ്ദുള്ള ബിൻ സായിദ് അൽ നഹ്യാനും ഇന്ത്യൻ വിദേശകാര്യ മന്ത്രി എസ് ജയശങ്കറും മുംബൈയിൽ ഉന്നതതല ചർച്ച നടത്തി. സാമ്പത്തികം, വ്യാപാരം, നിക്ഷേപം തുടങ്ങിയ മേഖലകളിൽ ഇരുരാജ്യങ്ങളും തമ്മിലുള്ള സഹകരണം കൂടുതൽ ശക്തമാക്കുക എന്നതാണ് കൂടിക്കാഴ്ചയുടെ പ്രധാന ലക്ഷ്യം. പ്രാദേശിക സുരക്ഷയും ഉഭയകക്ഷി വ്യാപാര വളർച്ചയും ചർച്ചകളിൽ പ്രധാന വിഷയങ്ങളായി.

മുംബൈ: ഔദ്യോഗിക സന്ദർശനത്തിനായി ഇന്ത്യയിലെത്തിയ യുഎഇ ഉപപ്രധാനമന്ത്രിയും വിദേശകാര്യ മന്ത്രിയുമായ ശൈഖ് അബ്ദുള്ള ബിൻ സായിദ് അൽ നഹ്യാൻ ഇന്ത്യൻ വിദേശകാര്യ മന്ത്രി ഡോ. എസ് ജയശങ്കറുമായി മുംബൈയിൽ ഉന്നതതല ചർച്ച നടത്തി. ഇരുരാജ്യങ്ങളും തമ്മിലുള്ള ചരിത്രപരമായ ബന്ധം കൂടുതൽ ദൃഢമാക്കുന്നതിനും സാമ്പത്തികം, വ്യാപാരം, നിക്ഷേപം, സംസ്‌കാരം, ഊർജ്ജം തുടങ്ങിയ മേഖലകളിൽ സഹകരണം ശക്തമാക്കുന്നതിനും ലക്ഷ്യമിട്ടായിരുന്നു കൂടിക്കാഴ്ച.

ഇന്ത്യയുമായുള്ള ബന്ധത്തിന് യുഎഇ വലിയ പ്രാധാന്യമാണ് നൽകുന്നതെന്ന് ശൈഖ് അബ്ദുള്ള പറഞ്ഞു. 2022-ൽ ഒപ്പുവെച്ച സമഗ്ര സാമ്പത്തിക പങ്കാളിത്ത കരാർ വഴി ഇരുരാജ്യങ്ങളും തമ്മിലുള്ള ഉഭയകക്ഷി വ്യാപാരം 85 ബില്യൺ ഡോളർ (ഏകദേശം 7.1 ലക്ഷം കോടി രൂപ) കടന്നിട്ടുണ്ട്. യുഎഇ ഒപ്പുവെക്കുന്ന ആദ്യത്തെ ഇത്തരത്തിലുള്ള കരാറാണിത്. നിലവിൽ യുഎഇയുടെ ഏറ്റവും വലിയ വ്യാപാര പങ്കാളിയാണ് ഇന്ത്യ. ഇന്ത്യയുടെ മൂന്നാമത്തെ വലിയ വ്യാപാര പങ്കാളിയായി യുഎഇയും മാറി.

യുഎഇയുടെ രൂപീകരണം മുതൽ ഇന്ത്യയുമായി ശക്തമായ സൗഹൃദബന്ധമാണ് നിലനിൽക്കുന്നത്. ഏകദേശം 40 ലക്ഷത്തോളം വരുന്ന ഇന്ത്യൻ പ്രവാസികളാണ് യുഎഇയിലെ ഏറ്റവും വലിയ വിദേശി സമൂഹം. ആഗോള സാമ്പത്തിക വളർച്ചയിൽ നിർണ്ണായക പങ്കുവഹിക്കുന്ന ഇന്ത്യ-യുഎഇ പങ്കാളിത്തം കൂടുതൽ ശക്തി പ്രാപിച്ചുകൊണ്ടിരിക്കുകയാണെന്ന് ശൈഖ് അബ്ദുള്ള വ്യക്തമാക്കി.

പ്രാദേശികവും അന്താരാഷ്ട്രീയവുമായ വിവിധ വിഷയങ്ങളും, മേഖലയിൽ സമാധാനവും സുരക്ഷയും ഉറപ്പാക്കുന്നതിനായുള്ള നടപടികളും ഇരുമന്ത്രിമാരും ചർച്ച ചെയ്തതായി യുഎഇ ഔദ്യോഗിക വാർത്താ ഏജൻസിയായ 'വാം' റിപ്പോർട്ട് ചെയ്തു. മുംബൈയിലെത്തിയ ഷെയ്ഖ് അബ്ദുള്ളയെ മഹാരാഷ്ട്ര നൈപുണ്യ വികസന, സംരംഭകത്വ മന്ത്രി മംഗൾ പ്രഭാത് ലോധയും മറ്റ് മുതിർന്ന ഉദ്യോഗസ്ഥരും ചേർന്ന് സ്വീകരിച്ചു.

നേരത്തെ മേയിൽ ഇന്ത്യൻ പ്രധാനമന്ത്രി നരേന്ദ്ര മോദി യുഎഇ സന്ദർശിച്ച് യുഎഇ പ്രസിഡന്റ് ശൈഖ് മുഹമ്മദ് ബിൻ സായിദ് അൽ നഹ്യാനുമായി കൂടിക്കാഴ്ച നടത്തിയിരുന്നു. ജനുവരിയിൽ ശൈഖ് മുഹമ്മദ് ദില്ലി സന്ദർശിച്ചപ്പോൾ ആർട്ടിഫിഷ്യൽ ഇന്റലിജൻസ്, സാമ്പത്തികം, ഭക്ഷ്യസുരക്ഷ എന്നീ മേഖലകളിൽ ഒന്നിച്ചു പ്രവർത്തിക്കാൻ ഇരുനേതാക്കളും തീരുമാനിച്ചിരുന്നു. 2024-ൽ യുഎഇ സന്ദർശിച്ച പ്രധാനമന്ത്രി മോദി വേൾഡ് ഗവൺമെന്റ്‌സ് ഉച്ചകോടിയെ അഭിസംബോധന ചെയ്യുകയും അബുദാബിയിലെ ആദ്യത്തെ ഹൈന്ദവ ക്ഷേത്രം ഉദ്ഘാടനം ചെയ്യുകയും ചെയ്തിരുന്നു.