
മനില: ഫിലിപ്പീൻസ് തലസ്ഥാനമായ മനിലയിൽ നടക്കുന്ന ആസിയാൻ ഉച്ചകോടിക്കിടെ നടക്കുന്ന ക്വാഡ് നേതാക്കളുടെ യോഗത്തിനിടെ പ്രധാനമന്ത്രി നരേന്ദ്ര മോദിയും യുഎസ് പ്രസിഡൻ്റ് ഡൊണാൾഡ് ട്രംപും തമ്മിൽ പ്രത്യേക കൂടിക്കാഴ്ച നടത്തുമോ എന്നതുസംബന്ധിച്ച് ഔദ്യോഗിക സ്ഥിരീകരണമില്ല. കൂടിക്കാഴ്ച നടന്നാലും ഹ്രസ്വ ചർച്ചയ്ക്ക് മാത്രമാണ് സാധ്യത. ഏതാനും മണിക്കൂറുകൾ മാത്രം മനിലയിൽ ചെലവഴിക്കുന്ന ട്രംപ് തുടർന്ന് ചൈനയിലെ ഷെൻഷെനിലേക്ക് പോകും. ഏഷ്യ-പസഫിക് സാമ്പത്തിക സഹകരണ (APEC) ഉച്ചകോടിയിൽ പങ്കെടുക്കാനാണ് ട്രംപിന്റെ ചൈനീസ് സന്ദർശനം.
മനിലയിൽ ഇന്ത്യൻ സമയം ഇന്ന് ഉച്ചയ്ക്ക് രണ്ടുമണിക്ക് ട്രംപ്-മോദി കൂടിക്കാഴ്ച നടന്നേക്കുമെന്ന റിപ്പോർട്ടുകൾ പുറത്തുവന്നിരുന്നു. എന്നാൽ ട്രംപ് അധിക സമയം മനിലയിൽ ചെലവഴിക്കില്ലെന്നാണ് ഒടുവിലത്തെ വിവരം. ഇരുനേതാക്കളും തമ്മിൽ ഹ്രസ്വമായ കൂടിക്കാഴ്ച നടന്നാലും വ്യാപാര കരാർ ഉൾപ്പെടെ ഉള്ള കാര്യങ്ങൾ ചർച്ചയാകാനുള്ള സാധ്യത വിരളമാണെന്നാണ് വിദേശകാര്യ മന്ത്രാലയ വൃത്തങ്ങൾ വ്യക്തമാക്കുന്നത്.
ഇൻഡോ-പസഫിക് മേഖലയിലെ സമാധാനം, സമൃദ്ധി, സുരക്ഷ എന്നിവ ലക്ഷ്യമിട്ടുള്ള ക്വാഡ് രാജ്യങ്ങളിലെ നേതാക്കളുടെ സുപ്രധാന യോഗമാണ് ഇന്ന് മനിലയിൽ നടക്കുക. ആസിയാൻ ഉച്ചകോടിയുടെ ഭാഗമായാണ് ഇന്ത്യ, അമേരിക്ക, ഓസ്ട്രേലിയ, ജപ്പാൻ എന്നീ നാല് രാഷ്ട്രങ്ങളുടെ കൂട്ടായ്മയായ ക്വാഡിന്റെ ഉന്നതതല യോഗം ചേരുന്നത്. ഇൻഡോ-പസഫിക് മേഖലയിൽ സമാധാനവും സുരക്ഷയും ഉറപ്പുവരുത്തുന്നതിനുള്ള പൊതുവായ താൽപര്യങ്ങൾ നേതാക്കൾ യോഗത്തിൽ ചർച്ച ചെയ്യുമെന്ന് വൈറ്റ് ഹൗസ് അസിസ്റ്റന്റ് പ്രസ് സെക്രട്ടറി വ്യക്തമാക്കിയിരുന്നു. മേഖലയിലെ പ്രാദേശിക സഹകരണം ശക്തിപ്പെടുത്തുന്നതിലും തന്ത്രപ്രധാനമായ വിഷയങ്ങളിൽ ഒരുമിച്ച് നിൽക്കുന്നതിലും യോഗം ശ്രദ്ധ കേന്ദ്രീകരിക്കും.
ട്രംപിന്റെ നിലവിലെ ഭരണകാലയളവിൽ ക്വാഡ് നേതാക്കൾ പങ്കെടുക്കുന്ന ആദ്യത്തെ ഉന്നതതല യോഗമാണ് മനിലയിൽ നടക്കുന്നത്. നേരത്തെ 2024 സെപ്റ്റംബറിൽ അന്നത്തെ അമേരിക്കൻ പ്രസിഡന്റ് ജോ ബൈഡന്റെ അധ്യക്ഷതയിൽ ഡെലവെയറിലാണ് ഇതിന് മുൻപ് ക്വാഡ് നേതാക്കളുടെ ഉച്ചകോടി നടന്നത്. ക്വാഡ് ഉച്ചകോടിക്ക് ഏകദേശം 48 മണിക്കൂറിന് ശേഷം, നവംബർ 19ന് ചൈനയിലെ ഷെൻഷെനിൽ വെച്ച് ട്രംപ് ചൈനീസ് പ്രസിഡന്റ് ഷി ജിൻപിങ്ങുമായും റഷ്യൻ പ്രസിഡന്റ് വ്ളാഡിമിർ പുടിനുമായും ത്രികക്ഷി ചർച്ച നടത്തും.
ഇന്ത്യയിലെയും ലോകമെമ്പാടുമുള്ള എല്ലാ International News അറിയാൻ എപ്പോഴും ഏഷ്യാനെറ്റ് ന്യൂസ് വാർത്തകൾ. Malayalam Live News തത്സമയ അപ്ഡേറ്റുകളും ആഴത്തിലുള്ള വിശകലനവും സമഗ്രമായ റിപ്പോർട്ടിംഗും — എല്ലാം ഒരൊറ്റ സ്ഥലത്ത്. ഏത് സമയത്തും, എവിടെയും വിശ്വസനീയമായ വാർത്തകൾ ലഭിക്കാൻ Asianet News Malayalam