ഹഗ്ഗീസ് നിർമാതാക്കളായ ലോകപ്രശസ്ത പേപ്പർ കമ്പനി കിംബർലി-ക്ലാർക്കിന്റെ വെയർഹൗസിൽ വൻ തീപിടിത്തം; ജീവനക്കാരൻ തീയിട്ടെന്ന് സംശയം

കാലിഫോർണിയയിലെ ഒന്റാറിയോയിൽ സ്ഥിതി ചെയ്യുന്ന കിംബർലി-ക്ലാർക്കിന്റെ കൂറ്റൻ വെയർഹൗസ് തീപിടുത്തത്തിൽ നശിച്ചു. സംഭവത്തിൽ ജീവനക്കാരൻ അറസ്റ്റിലായതോടെ ഇത് മനഃപൂർവം തീയിട്ടതാണെന്ന് പോലീസ് കണ്ടെത്തി. ഈ തീപിടുത്തം കമ്പനിയുടെ വിതരണ ശൃംഖലയെ സാരമായി ബാധിക്കുമെന്ന് കരുതുന്നു.

ഒന്റാറിയോ (കാലിഫോർണിയ): ലോകപ്രശസ്ത പേപ്പർ ഉൽപ്പന്ന നിർമ്മാതാക്കളായ കിംബർലി-ക്ലാർക്കിന്റെ കാലിഫോർണിയയിലെ കൂറ്റൻ വെയർഹൗസ് തീവച്ച് നശിപ്പിച്ചു. ടോയ്‌ലറ്റ് പേപ്പർ, ടിഷ്യൂ പേപ്പർ തുടങ്ങിയവ സൂക്ഷിച്ചിരുന്ന 1.2 ദശലക്ഷം ചതുരശ്ര അടി വിസ്തീർണ്ണമുള്ള കെട്ടിടമാണ് അഗ്നിക്കിരയാക്കിയത്. ഏപ്രിൽ 7-ന് പുലർച്ചെ 1:45-ഓടെയാണ് ഒന്റാറിയോയിലെ വെയർഹൗസിൽ തീപിടുത്തമുണ്ടായത്. പേപ്പർ ഉൽപ്പന്നങ്ങൾ ധാരാളമായി ഉണ്ടായിരുന്നതിനാൽ തീ അതിവേഗം പടരുകയായിരുന്നു. സംഭവവുമായി ബന്ധപ്പെട്ട് ഒരു ജീവനക്കാരനെ പോലീസ് അറസ്റ്റ് ചെയ്തു.

140-ഓളം അഗ്നിശമനസേനാംഗങ്ങൾ മണിക്കൂറുകളോളം പരിശ്രമിച്ചാണ് തീ നിയന്ത്രണവിധേയമാക്കിയത്. കെട്ടിടത്തിന്റെ മേൽക്കൂര ഭാഗികമായി തകർന്നു വീണു. സംഭവസമയത്ത് സ്ഥലത്തുണ്ടായിരുന്ന 20 ജീവനക്കാരിൽ ഒരാളായ 29-കാരൻ ചമേൽ അബ്ദുൾകരീമിനെയാണ് പോലീസ് അറസ്റ്റ് ചെയ്തത്. ഇയാൾ മനഃപൂർവ്വം ഗോഡൗണിന് തീയിട്ടെന്നാണ് അന്വേഷണ ഉദ്യോഗസ്ഥർ കണ്ടെത്തിയിരിക്കുന്നത്. ആർക്കും പരിക്കേറ്റിട്ടില്ല. എല്ലാവരെയും സുരക്ഷിതമായി പുറത്തെത്തിച്ചുവെന്നും അഗ്നിരക്ഷാ ലേമ അറിയിച്ചു.

ക്ലീനെക്സ് (Kleenex), ഹഗ്ഗീസ് (Huggies) തുടങ്ങിയ ബ്രാൻഡുകളുടെ ഉടമസ്ഥരായ കിംബർലി-ക്ലാർക്കിന്റെ വിതരണ ശൃംഖലയെ തീപിടുത്തം സാരമായി ബാധിച്ചേക്കാമെന്നാണ് കരുതുന്നത്. ഏകദേശം 5 കോടി ജനങ്ങളിലേക്ക് ഉൽപ്പന്നങ്ങൾ എത്തിക്കുന്ന പ്രധാന കേന്ദ്രമായിരുന്നു ഇത്. സംഭവത്തെത്തുടർന്ന് കമ്പനിയുടെ ഓഹരി വിലയിലും ഇടിവുണ്ടായിട്ടുണ്ട്.