സുപ്രധാന രഹസ്യങ്ങൾ കൈകാര്യം ഉന്നത ഉദ്യോഗസ്ഥർ, നിഗൂഡത കൂട്ടി തിരോധാനങ്ങൾ; ദുരൂഹമായ മരണങ്ങളിലും യുഎസിൽ അന്വേഷണം തുടങ്ങി

അമേരിക്കയുടെ അതീവ രഹസ്യ പദ്ധതികളിൽ ഏർപ്പെട്ടിരിക്കുന്ന പ്രമുഖ ശാസ്ത്രജ്ഞർ ദുരൂഹമായി കൊല്ലപ്പെടുകയോ അപ്രത്യക്ഷരാവുകയോ ചെയ്യുന്നു. നാസ, കാൽടെക് തുടങ്ങിയ സ്ഥാപനങ്ങളിലെ ഉദ്യോഗസ്ഥർ ഇരകളായതോടെ, എഫ്ബിഐയുടെ നേതൃത്വത്തിൽ ട്രംപ് ഭരണകൂടം വിപുലമായ അന്വേഷണത്തിന് ഉത്തരവിട്ടു. ഈ സംഭവങ്ങൾ അമേരിക്കയുടെ സുരക്ഷാ രഹസ്യങ്ങളെക്കുറിച്ച് വലിയ ആശങ്ക ഉയർത്തുന്നു.

വാഷിംഗ്ടൺ: അമേരിക്കയുടെ അതീവ രഹസ്യ സ്വഭാവമുള്ള ഗവേഷണ പദ്ധതികളിൽ ഏർപ്പെട്ടിരിക്കുന്ന പ്രമുഖ ശാസ്ത്രജ്ഞരെ ലക്ഷ്യം വെച്ച് നടക്കുന്ന ദുരൂഹമായ മരണങ്ങളും തിരോധാനങ്ങളും ലോകത്തെ ഞെട്ടിക്കുന്നു. ഉന്നത സുരക്ഷാ ക്ലിയറൻസുള്ള ഉദ്യോഗസ്ഥർ ഒന്നൊന്നായി കൊല്ലപ്പെടുകയോ അപ്രത്യക്ഷമാവുകയോ ചെയ്യുന്ന സാഹചര്യത്തിൽ ട്രംപ് ഭരണകൂടം വിപുലമായ ഫെഡറൽ അന്വേഷണത്തിന് ഉത്തരവിട്ടു. എഫ്ബിഐ നേതൃത്വം നൽകുന്ന ഈ അന്വേഷണത്തിൽ ഊർജ്ജ വകുപ്പും പ്രതിരോധ വകുപ്പും വിവിധ പ്രാദേശിക ഏജൻസികളും പങ്കാളികളാണ്.

നാസയുടെ ജെപിഎൽ, ലോസ് അലാമോസ് നാഷണൽ ലബോറട്ടറി, എംഐടി, കാൽടെക് തുടങ്ങിയ ലോകപ്രശസ്തമായ ഗവേഷണ സ്ഥാപനങ്ങളിലെ ശാസ്ത്രജ്ഞരാണ് ഈ ദുരൂഹതയുടെ ഇരകൾ. ബഹിരാകാശ നിരീക്ഷണ രംഗത്തെ പ്രമുഖനായ കാൽടെക് ആസ്ട്രോഫിസിസ്റ്റ് കാൾ ഗ്രിൽമെയർ സ്വന്തം വീടിന്‍റെ ഉമ്മറത്ത് വെടിയേറ്റു മരിച്ച നിലയിൽ കണ്ടെത്തിയത് വലിയ നടുക്കമുണ്ടാക്കി. ഇതിനുപുറമെ, ജെപിഎല്ലിലെ ഏറോസ്പേസ് എഞ്ചിനീയറായ മോണിക്ക റെസ 2025-ൽ വനപ്രദേശത്ത് ട്രെക്കിംഗിനിടെ അപ്രത്യക്ഷമായെങ്കിലും ഇതുവരെ കണ്ടെത്താനായിട്ടില്ല.

റിട്ടയേർഡ് എയർഫോഴ്സ് മേജർ ജനറൽ വില്യം നീൽ മക്കാസ്‌ലൻഡ് ഉൾപ്പെടെയുള്ള ഉന്നത ഉദ്യോഗസ്ഥർ തങ്ങളുടെ ഫോണും മറ്റ് ഉപകരണങ്ങളും വീട്ടിൽ വെച്ച് ദുരൂഹമായി അപ്രത്യക്ഷരായത് വലിയ സുരക്ഷാ ആശങ്കകളാണ് ഉയർത്തുന്നത്. ഈ സംഭവങ്ങൾ തമ്മിൽ എന്തെങ്കിലും ഗൂഢമായ ബന്ധമുണ്ടോ എന്ന് യുഎസ് ഹൗസ് ഓവർസൈറ്റ് കമ്മിറ്റി അന്വേഷിക്കുന്നുണ്ട്. എന്നാൽ വർഷങ്ങളുടെ ഇടവേളകളിൽ നടന്ന ഈ സംഭവങ്ങൾ തമ്മിൽ പ്രത്യക്ഷത്തിൽ ബന്ധമൊന്നുമില്ലെന്നാണ് ചില സുരക്ഷാ വിദഗ്ധരുടെ പ്രാഥമിക വിലയിരുത്തൽ. എങ്കിലും അമേരിക്കയുടെ സുപ്രധാന പ്രതിരോധ-ബഹിരാകാശ രഹസ്യങ്ങൾ കൈകാര്യം ചെയ്യുന്നവർ ഇത്തരത്തിൽ വേട്ടയാടപ്പെടുന്നത് രാജ്യാന്തര തലത്തിൽ തന്നെ വൻ ചർച്ചയായിരിക്കുകയാണ്.