അമേരിക്കയോടാണ്, വെടിയുണ്ടകൾ മറുപടി പറയും ചോദ്യങ്ങൾ പിന്നെ, ഗ്രീൻലൻഡ് പിടിച്ചെടുക്കാൻ നോക്കിയാൽ യുഎസിനെ നേരിടുമെന്ന് ഡെന്മാർക്ക്

ഗ്രീൻലൻഡ് പിടിച്ചെടുക്കുമെന്ന യുഎസ് പ്രസിഡന്റ് ട്രംപിന്റെ ഭീഷണിക്ക് കടുത്ത മറുപടിയുമായി ഡെന്മാർക്ക്. അതിക്രമിച്ചു കയറാൻ ശ്രമിച്ചാൽ സൈന്യത്തിന് നേരെ വെടിവെക്കുമെന്നും ചോദ്യങ്ങൾ പിന്നീട് മതിയെന്നും ഡാനിഷ് പ്രതിരോധ മന്ത്രാലയം  

കോപ്പൻഹേഗൻ: ഗ്രീൻലൻഡ് പിടിച്ചെടുക്കുമെന്ന യുഎസ് പ്രസിഡന്റ് ഡൊണാൾഡ് ട്രംപിന്റെ ഭീഷണിക്ക് കടുത്ത ഭാഷയിൽ മറുപടി നൽകി ഡെന്മാർക്ക്. ഗ്രീൻലൻഡിലേക്ക് അതിക്രമിച്ചു കയറാൻ ശ്രമിച്ചാൽ യുഎസ് സൈന്യത്തിന് നേരെ ആദ്യം വെടിവെക്കുക, ചോദ്യങ്ങൾ പിന്നീട് എന്ന നയം സ്വീകരിക്കുമെന്ന് ഡാനിഷ് പ്രതിരോധ മന്ത്രാലയം മുന്നറിയിപ്പ് നൽകി. അധിനിവേശമുണ്ടായാൽ മുകളിൽ നിന്നുള്ള ഉത്തരവിനായി കാത്തുനിൽക്കാതെ ശത്രുക്കളെ ആക്രമിക്കണമെന്ന് നിർദ്ദേശിക്കുന്ന സൈന്യത്തിന്റെ 1952-ലെ നിയമം ഇപ്പോഴും നിലവിലുണ്ടെന്ന് ഡാനിഷ് സർക്കാർ വ്യക്തമാക്കി. ഡാനിഷ് പത്രമായ ബെർലിങ്‌സ്കെ ഈ നിയമത്തിന്റെ നിലവിലെ സ്ഥിതിയെക്കുറിച്ച് ചോദിച്ചപ്പോഴാണ് മന്ത്രാലയം ഈ കർശന നിലപാട് വ്യക്തമാക്കിയത്.

ഗ്രീൻലൻഡ് സ്വന്തമാക്കുന്നത് യുഎസിന്റെ സുരക്ഷയ്ക്ക് അത്യന്താപേക്ഷിതമാണെന്നാണ് ട്രംപിന്റെ നിലപാട്. ആർട്ടിക് മേഖലയിൽ ചൈനയുടെയും റഷ്യയുടെയും സ്വാധീനം കുറയ്ക്കാൻ ലോകത്തിലെ ഏറ്റവും വലിയ ദ്വീപായ ഗ്രീൻലൻഡ് യുഎസ് നിയന്ത്രണത്തിലാകണമെന്ന് അദ്ദേഹം വാദിക്കുന്നു. ഇതിനായി സൈനിക ശക്തി ഉപയോഗിക്കുന്നത് പരിഗണനയിലാണെന്ന് വൈറ്റ് ഹൗസ് പ്രസ് സെക്രട്ടറി കരോലിൻ ലീവിറ്റും സ്ഥിരീകരിച്ചിട്ടുണ്ട്. അതേസമയം, ഗ്രീൻലൻഡ് വിൽപ്പനയ്ക്കുള്ളതല്ലെന്ന് ഡെന്മാർക്ക് ആവർത്തിച്ചു വ്യക്തമാക്കി.

ഗ്രീൻലൻഡിന് മേൽ ഏതെങ്കിലും തരത്തിലുള്ള സൈനിക നീക്കം നടത്തിയാൽ അത് നാറ്റോ സഖ്യത്തിന്റെ തകർച്ചയ്ക്കും രണ്ടാം ലോകമഹായുദ്ധത്തിന് ശേഷം നിലനിൽക്കുന്ന സുരക്ഷാ സംവിധാനങ്ങളുടെ അവസാനത്തിനും കാരണമാകുമെന്ന് ഡാനിഷ് പ്രധാനമന്ത്രി മെറ്റെ ഫ്രെഡറിക്സൺ മുന്നറിയിപ്പ് നൽകി. അടുത്ത ആഴ്ച യുഎസ് സ്റ്റേറ്റ് സെക്രട്ടറി മാർക്കോ റൂബിയോ ഡാനിഷ് ഉദ്യോഗസ്ഥരുമായി കൂടിക്കാഴ്ച നടത്താനിരിക്കുകയാണ്. എന്നാൽ ഗ്രീൻലൻഡിന്റെ പരമാധികാരം മാനിക്കണമെന്ന് യൂറോപ്യൻ നേതാക്കൾ ട്രംപിന് മുന്നറിയിപ്പ് നൽകിയിട്ടുണ്ട്. ആർട്ടിക് മേഖലയിലെ ഈ തർക്കം ആഗോള രാഷ്ട്രീയത്തിൽ വലിയ പ്രത്യാഘാതങ്ങൾ ഉണ്ടാക്കുമെന്നാണ് വിലയിരുത്തപ്പെടുന്നത്.