7 സെന്റിൽ 1000 സ്ക്വയർഫീറ്റ് വീട്; വയനാട്ടിലെ ഉരുൾപൊട്ടൽ ദുരന്തബാധിതർക്കുള്ള ടൗൺഷിപ്പിന്റെ തറക്കല്ലിടൽ ഇന്ന്
Synopsis
കൽപ്പറ്റയിലെ എൽസ്റ്റൺ എസ്റ്റേറ്റിൽ മുഖ്യമന്ത്രി പിണറായി വിജയനാണ് പദ്ധതിക്ക് തറക്കല്ലിടുക.
കൽപ്പറ്റ: വയനാട്ടിലെ ഉരുൾപൊട്ടൽ ദുരന്തബാധിതർക്കുള്ള ടൗൺഷിപ്പിന്റെ തറക്കല്ലിടൽ ഇന്ന് വൈകീട്ട്. കൽപ്പറ്റയിലെ എൽസ്റ്റൺ എസ്റ്റേറ്റിൽ മുഖ്യമന്ത്രി പിണറായി വിജയനാണ് പദ്ധതിക്ക് തറക്കല്ലിടുക. 7 സെൻറ് ഭൂമിയിൽ 1000 ചതുരശ്ര അടി വിസ്തീർണമുള്ള വീടുകളാണ് ദുരന്തബാധിതർക്കായി നിർമ്മിക്കുന്നത്.
നിർമ്മാണം ഒരു വർഷത്തിനകം പൂർത്തിയാക്കുമെന്ന് റവന്യൂ മന്ത്രി കെ രാജൻ പറഞ്ഞു. സർക്കാർ എല്ലാവരെയും കേൾക്കും. ഭൂമി ഏറ്റെടുക്കലിനും നിർമ്മാണ പ്രവർത്തനങ്ങൾക്കും കോടതി വിധി തടസമാകുമെന്ന് കരുതുന്നില്ലെന്നും കെ രാജൻ ഏഷ്യാനെറ്റ് ന്യൂസിനോട് പറഞ്ഞു.
വീടുകൾക്ക് പുറമെ പൊതുസ്ഥാപനങ്ങള്ക്ക് പ്രത്യേക കെട്ടിടങ്ങള്, റോഡ്, അനുബന്ധ സ്ഥാപനങ്ങള്, വ്യാപാര - വാണിജ്യ സൗകര്യങ്ങള് എന്നിവ ടൗണ്ഷിപ്പില് സജ്ജമാക്കും. ഊരാളുങ്കല് ലേബര് കോണ്ട്രാക്ട് കോ- ഓപറേറ്റീവ് സൊസൈറ്റിയാണ് ടൗണ്ഷിപ്പ് നിര്മ്മാണം നടത്തുക. കിഫ്കോണ് കണ്സള്ട്ടന്റ് ഏജന്സിയായി പ്രവര്ത്തിക്കും.
ഒന്നാംഘട്ട ഗുണഭോക്തൃ പട്ടികയിലുള്പ്പെട്ട 242 ഗുണഭോക്താക്കളും സമ്മതപത്രം കൈമാറി. ടൗണ്ഷിപ്പില് വീടിനായി 175 പേരും 15 ലക്ഷം സാമ്പത്തിക സഹായത്തിന് 67 പേരുമാണ് സമ്മതപത്രം കൈമാറിയത്. ഒന്നാം ഘട്ട പട്ടികയില് 242 പേരും 2- എ പട്ടികയില് 87 പേരും 2- ബി ലിസ്റ്റില് 73 പേരും ഉള്പ്പെടെ 402 ഗുണഭോക്താക്കളാണ് അന്തിമ പട്ടികയില് ഉള്പ്പെട്ടിട്ടുള്ളത്. 2-എ, 2-ബി പട്ടികയില് ഉള്പ്പെട്ടവര്ക്ക് ഏപ്രില് മൂന്ന് വരെ സമ്മതപത്രം കൈമാറാം. ലഭിച്ച സമ്മതപത്രങ്ങളിൽ ഏപ്രില് 13 നകം വിവരശേഖരണം, സമാഹരണം എന്നിവ പൂര്ത്തീകരിച്ച് ഏപ്രില് 20 ന് അന്തിമ ഗുണഭോക്തൃ പട്ടിക പ്രസിദ്ധീകരിക്കും.
ഇന്ന് എല്സ്റ്റണ് എസ്റ്റേറ്റില് നടക്കുന്ന ശിലാസ്ഥാപന ചടങ്ങിൽ മന്ത്രിമാരായ കെ. രാജന്, ഒ ആര് കേളു, റോഷി അഗസ്റ്റിന്, കെ. കൃഷ്ണന്കുട്ടി, എ കെ ശശീന്ദ്രന്, രാമചന്ദ്രന് കടന്നപ്പള്ളി, കെ ബി ഗണേഷ് കുമാര്, പി.എ മുഹമ്മദ് റിയാസ്, പ്രതിപക്ഷ നേതാവ് വി ഡി സതീശന്, എം പി പ്രിയങ്കാ ഗാന്ധി, എംഎല്എ ടി സിദ്ദിഖ്, പ്രതിപക്ഷ ഉപ നേതാവ് പി കെ കുഞ്ഞാലിക്കുട്ടി, ജില്ലാ പഞ്ചായത്ത് പ്രസിഡന്റ് സംഷാദ് മരക്കാര്, കല്പ്പറ്റ നഗരസഭാ ചെയര്മാന് ടി ജെ ഐസക്, മേപ്പാടി ഗ്രാമപഞ്ചായത്ത് പ്രസിഡന്റ് കെ ബാബു, ജില്ലാ കളക്ടര് ഡി ആര് മേഘശ്രീ, ഉന്നതതല ഉദ്യോഗസ്ഥര്, ജനപ്രതിനിധികള്, രാഷ്ട്രീയ പാര്ട്ടി പ്രതിനിധികൾ എന്നിവര് പങ്കെടുക്കും.
ഉരുൾപൊട്ടൽ ടൗൺഷിപ്പ് വീട്
വീട്ടിൽ ഒരുക്കുന്നത് രണ്ട് ബെഡ്റൂമുകൾ
മാസ്റ്റർ ബെഡ്റൂം- 340 x 365
രണ്ടാമത്തെ ബെഡ്റൂം - 335 x 340
ഡൈനിങ് 325 x 338
ലിവിങ് 353 x 338
സിറ്റൗട്ട് - 353 x 150
കിച്ചൺ 335 X 340
ബാത്ത് റൂം 205 x 155
കോമൺ ടോയ്ലറ്റ് 205 x 170
വർക്ക് ഏരിയ 190x 340
കേരളത്തിലെ എല്ലാ വാർത്തകൾ Kerala News അറിയാൻ എപ്പോഴും ഏഷ്യാനെറ്റ് ന്യൂസ് വാർത്തകൾ. Malayalam News തത്സമയ അപ്ഡേറ്റുകളും ആഴത്തിലുള്ള വിശകലനവും സമഗ്രമായ റിപ്പോർട്ടിംഗും — എല്ലാം ഒരൊറ്റ സ്ഥലത്ത്. ഏത് സമയത്തും, എവിടെയും വിശ്വസനീയമായ വാർത്തകൾ ലഭിക്കാൻ Asianet News Malayalam