അക്രമാസക്തരായി മോഷണക്കേസ് പ്രതികൾ, കെഎസ്ആർടി ബസിൽ വച്ച് അതിക്രമം, പൊലീസുകാർക്കും യാത്രക്കാർക്കും പരിക്ക്

പ്രതികളെ കീഴ്പ്പെടുത്തി കിളിമാനൂർ പൊലീസ് സ്റ്റേഷനിലെത്തിച്ചപ്പൊൾ ഇവർ അവിടെയും ആക്രമണം നടത്തി. പൊലീസ് സ്റ്റേഷനിലെ ഇലക്ട്രോണിക് ഉപകരണങ്ങൾ അടക്കം തകർത്തു

തിരുവനന്തപുരം: കോടതിയിൽ വിചാരണയ്ക്ക് ഹാജരാക്കി ജയിലിലേക്ക് കൊണ്ടുവരും വഴി കെഎസ്ആർടിസി ബസ്സിൽ പ്രതികളുടെ അതിക്രമം. തിരുവനന്തപുരം കിളിമാനൂരിലാണ് സംഭവം. അകമ്പടി പോയ പൊലീസുകാർക്കും ബസ്സിലുണ്ടായിരുന്ന യാത്രക്കാർക്കും മർദ്ദനമേറ്റു. പ്രതികളെ കീഴ്പ്പെടുത്തി കിളിമാനൂർ പൊലീസ് സ്റ്റേഷനിലെത്തിച്ചപ്പോൾ ഇവർ അവിടെയും ആക്രമണം നടത്തി. 

പൊലീസ് സ്റ്റേഷനിലെ ഇലക്ട്രോണിക് ഉപകരണങ്ങൾ അടക്കം തകർത്തു. മോഷണക്കേസ് പ്രതികളായ കടയ്ക്കൽ സ്വദേശി മുഹമ്മദ് ഷാൻ, കഴക്കൂട്ടം സ്വദേശി അനന്തൻ, നേമം സ്വദേശി ഷിഫാൻ എന്നിവരാണ് അതിക്രമം കാണിച്ചത്. ഇവരുടെ കൈവശമുണ്ടായിരുന്ന കഞ്ചാവ് പൊതി പിടിച്ചെടുത്തതാണ് പ്രകോപനത്തിന് കാരണമെന്ന് പൊലീസ് അറിയിച്ചു. കൊട്ടാരക്കര കോടതിയിൽ ഹാജരാക്കിയ ശേഷം പ്രതികളെ പൂജപ്പുര ജയിലിലേക്ക് തിരികെ കൊണ്ടുവരുമ്പോഴായിരുന്നു സംഭവം.