കണ്ണൂരിലെ രാഷ്ട്രീയ പോരാട്ടഭൂമി; അഴീക്കോട് ആർക്കൊപ്പം, കോട്ട കാക്കാൻ കെവി സുമേഷ്, തിരിച്ചുപിടിക്കാൻ കരീം ചേളേരി

പരമ്പരാഗതമായി ഇടതുപക്ഷത്തെ പിന്തുണയ്ക്കുന്ന അഴീക്കോട് മണ്ഡലത്തിലെ രാഷ്ട്രീയ ചരിത്രവും നിലവിലെ സാഹചര്യവുമാണ് ലേഖനം ചർച്ച ചെയ്യുന്നത്. മുൻകാലങ്ങളിൽ കെഎം ഷാജിയിലൂടെ യുഡിഎഫ് നേടിയ വിജയങ്ങളും സമീപകാല തെരഞ്ഞെടുപ്പുകളിലെ മുന്നേറ്റവും വരാനിരിക്കുന്ന മത്സരത്തെ പ്രവചനാതീതമാക്കുന്നു. 

നിയമസഭ തെരഞ്ഞെടുപ്പിൽ ശക്തമായ മത്സരം നടക്കുന്ന മണ്ഡലമാണ് അഴീക്കോട്. ഇടതുപക്ഷത്തിനെ പിന്തുണയ്ക്കുന്ന മണ്ഡലമാണെങ്കിലും നേരിയ ഭൂരിപക്ഷത്തിനാണ് പലപ്പോഴും ഇടതുപക്ഷം വിജയിച്ചു കയറിയിച്ചുള്ളത്. 1987ൽ എംവി രാഘവൻ വിജയിച്ച് നിയമസഭയിലെത്തിയ മണ്ഡലത്തിൽ മകൻ എംവി നികേഷ് കുമാർ മത്സരിച്ചതും തെരഞ്ഞെടുപ്പ് പ്രചരണത്തിനിടയിൽ നടന്ന സംഭവവും ഏറെ ചർച്ചയായിരുന്നു. സ്ഥിരമായി ഇടതുപക്ഷത്തിനെ പിന്തുണയ്ക്കുന്ന മണ്ഡലം 2011ലാണ് മുസ്ലീ ലീ​ഗിലെ കെഎം ഷാജി പിടിച്ചെടുക്കുന്നത്.

കണ്ണൂർ താലൂക്കിലെ അഴീക്കോട്, ചിറക്കൽ, നാറാത്ത്, പള്ളിക്കുന്ന്, പാപ്പിനിശ്ശേരി, പുഴാതി, വളപട്ടണം എന്നീ പ്രദേശങ്ങൾ ചേരുന്നതാണ് അഴീക്കോട് നിയമസഭാ നിയോജകമണ്ഡലം. പൗരബോധത്തിന്റെ കാര്യത്തിൽ ഏറെ മുന്നിട്ടുനിൽക്കുന്ന ഈ മണ്ഡലത്തിലെ സ്ത്രീ വോട്ടർമാരുടെ ഉയർന്ന പങ്കാളിത്തം എടുത്തു പറയേണ്ട ഒരു സവിശേഷതയാണ്. കഴിഞ്ഞ 2021-ലെ നിയമസഭാ തിരഞ്ഞെടുപ്പിൽ 79.85 ശതമാനം പോളിംഗ് രേഖപ്പെടുത്തിയത് ഇവിടുത്തെ വോട്ടർമാരുടെ സജീവമായ ജനാധിപത്യ ഇടപെടലിന് തെളിവാണ്. വടക്കൻ കേരളത്തിന്റെ രാഷ്ട്രീയ ചലനങ്ങളെയും ജനകീയ താല്പര്യങ്ങളെയും കൃത്യമായി അടയാളപ്പെടുത്തുന്ന ഒരു മണ്ഡലം കൂടിയാണിത്.

1977-ൽ രൂപീകൃതമായത് മുതൽ 2000-ന്റെ തുടക്കം വരെ സിപിഎം ഈ മണ്ഡലത്തിൽ ആധിപത്യം പുലർത്തിയിരുന്നു. എന്നാൽ പിന്നീട് യുഡിഎഫ് ഘടകകക്ഷിയായ മുസ്ലിം ലീഗ് ഇവിടെ ശക്തമായ സാന്നിധ്യമായി മാറി. 2011-ലും 2016-ലും നടന്ന തിരഞ്ഞെടുപ്പുകളിൽ മുസ്ലിം ലീഗിലെ കെ.എം. ഷാജി ചെറിയ ഭൂരിപക്ഷത്തിന് ഇവിടെ വിജയിച്ചു. 2011-ൽ 493 വോട്ടുകൾക്കും 2016-ൽ 2,287 വോട്ടുകൾക്കുമായിരുന്നു അദ്ദേഹത്തിന്റെ വിജയം. അതിനു മുമ്പ് എം. പ്രകാശൻ മാസ്റ്റർപോലുള്ള സിപിഎം നേതാക്കൾ ഈ മണ്ഡലത്തെ പ്രതിനിധീകരിച്ചിട്ടുണ്ട്.

2021-ലെ തിരഞ്ഞെടുപ്പിൽ അഴീക്കോട് മണ്ഡലം ശക്തമായ ത്രികോണ മത്സരത്തിനാണ് സാക്ഷ്യം വഹിച്ചത്. സിപിഎം സ്ഥാനാർത്ഥി കെവി സുമേഷ് 65,794 വോട്ടുകളാണ് നേടിയത്. യുഡിഎഫ് സ്ഥാനാർത്ഥിയായിരുന്ന കെഎം ഷാജിക്ക് 59,653 വോട്ടുകളാണ് ലഭിച്ചത്. ബിജെപി സ്ഥാനാർത്ഥി കെ.രഞ്ജിത്ത് 15,741 വോട്ടുകളോടെ മൂന്നാം സ്ഥാനത്തെത്തി.

1977-ലാണ് അഴീക്കോട് നിയമസഭാ മണ്ഡലം രൂപീകൃതമാകുന്നത്. സിപിഎമ്മിന്റെ കരുത്തനായ നേതാവ് ചടയൻ ഗോവിന്ദൻ മണ്ഡലത്തിലെ ആദ്യ ജനപ്രതിനിധിയായി തിരഞ്ഞെടുക്കപ്പെട്ടു. തുടർന്ന് പി ദേവൂട്ടി, ഇപി ജയരാജൻ, ടികെ ബാലൻ എന്നിവർ തുടർച്ചയായി വിജയിച്ചതോടെ അഴീക്കോട് ഇടതുകോട്ടയായി ഉറച്ചുനിന്നു. എന്നാൽ, 1987-ൽ മണ്ഡലത്തിലെ രാഷ്ട്രീയ സമവാക്യങ്ങൾ മാറിമറിഞ്ഞു. സിപിഎമ്മിൽ നിന്ന് പുറത്തായ എംവി രാഘവൻ, യുഡിഎഫ് പിന്തുണയോടെ 'തെങ്ങ്' ചിഹ്നത്തിൽ മത്സരിച്ച് വിജയിച്ചതോടെയാണ് അഴീക്കോട് ഒരു ശക്തമായ രാഷ്ട്രീയ പോരാട്ടഭൂമിയായി മാറിയത്. ഇടതുപക്ഷത്തിന്റെ ആധിപത്യത്തിന്മേൽ ആദ്യമായി വിള്ളൽ വീഴ്ത്തിയ ആ തിരഞ്ഞെടുപ്പ് മണ്ഡലത്തിന്റെ ചരിത്രത്തിലെ നിർണ്ണായക വഴിത്തിരിവായിരുന്നു.

യുഡിഎഫിന്റെ പ്രതീക്ഷകളും കുതിപ്പും

അഴീക്കോട് മണ്ഡലം തിരിച്ചുപിടിക്കാമെന്ന ഉറച്ച വിശ്വാസത്തിലാണ് യുഡിഎഫ് ക്യാമ്പ്. ഈ പ്രതീക്ഷയ്ക്ക് പിന്നിൽ പ്രധാനമായും മൂന്ന് കാരണങ്ങളാണുള്ളത്:

ലോക്സഭാ തിരഞ്ഞെടുപ്പിലെ മുന്നേറ്റം: 2023-ലെ ലോക്സഭാ തിരഞ്ഞെടുപ്പിൽ മണ്ഡലത്തിൽ 21,857 വോട്ടിന്റെ വൻ ഭൂരിപക്ഷം നേടാൻ യുഡിഎഫിന് സാധിച്ചു. ഇത് അണികൾക്കിടയിൽ വലിയ ആത്മവിശ്വാസം നൽകിയിട്ടുണ്ട്.

തദ്ദേശ തിരഞ്ഞെടുപ്പിലെ അട്ടിമറി: 2025-ലെ തദ്ദേശ സ്വയംഭരണ തിരഞ്ഞെടുപ്പിൽ എൽഡിഎഫിന്റെ ഉറച്ച കോട്ടയായിരുന്ന നാറാത്ത് പഞ്ചായത്ത് പിടിച്ചെടുക്കാൻ സാധിച്ചത് വലിയൊരു രാഷ്ട്രീയ നേട്ടമായി യുഡിഎഫ് കണക്കാക്കുന്നു.

അംഗസംഖ്യയിലെ വർദ്ധനവ്: അഴീക്കോട്, ചിറക്കൽ പഞ്ചായത്തുകളിൽ യുഡിഎഫ് പ്രതിനിധികളുടെ എണ്ണം വർദ്ധിപ്പിക്കാൻ സാധിച്ചതും മണ്ഡലത്തിൽ അനുകൂല തരംഗമുണ്ടെന്ന വിലയിരുത്തലിന് കരുത്തേകുന്നു.

ഈ ഘടകങ്ങളെല്ലാം മുൻനിർത്തി, വരാനിരിക്കുന്ന തിരഞ്ഞെടുപ്പിൽ അഴീക്കോട് മണ്ഡലത്തിൽ വലിയൊരു രാഷ്ട്രീയ മാറ്റം സംഭവിക്കുമെന്നാണ് യുഡിഎഫ് കണക്കുകൂട്ടുന്നത്.

സ്ഥാനാർത്ഥികൾ

സിറ്റിങ് എംഎൽഎ കെവി സുമേഷ് തന്നെയാണ് സിപിഎമ്മിനുവേണ്ടി മത്സരിക്കുന്നത്. യുഡിഎഫ് സ്ഥാനാർഥിയായി കരീം ചേളേരിയാണ് രം​ഗത്തിറങ്ങുന്നത്. കെകെ വിനോദ് കുമാറാണ് ബിജെപി സ്ഥാനാർഥി.