'ഒന്നും ഒളിപ്പിക്കാനില്ല, നിയമം പാലിച്ചാണ് ബാങ്ക് ഇടപാടുകൾ നടത്തിയിട്ടുള്ളത്'; എം എം വർഗീസ്​

ഇന്നലെ 12 മണിക്കൂർ ആണ് കേന്ദ്ര ഏജൻസികളായ ഇ ഡിയും ആദായ നികുതി വകുപ്പും വർഗീസിനെ ചോദ്യം ചെയ്തത്.

തിരുവനന്തപുരം: ഒന്നും ഒളിപ്പിക്കാനില്ലെന്ന് സിപിഎം തൃശ്ശൂർ ജില്ലാ സെക്രട്ടറി എംഎം വർ​ഗീസ്. കരുവന്നൂര്‍ സഹകരണ ബാങ്ക് തട്ടിപ്പ് കേസുമായി ബന്ധപ്പെട്ട്  ഇന്നലെ ഇഡിയും ആദായ നികുതി വകുപ്പും ചോദ്യം ചെയ്തതിന്റെ പശ്ചാത്തലത്തിലായിരുന്നു വർ​ഗീസിന്റെ പ്രതികരണം. ബാങ്ക് ഓഫ് ഇന്ത്യയിൽ പാർട്ടിക്ക് അക്കൗണ്ട് ഉണ്ടെന്നും നിയമം പാലിച്ചാണ് ബാങ്ക് ഇടപാടുകൾ നടത്തിയതെന്നും അദ്ദേഹം വ്യക്തമാക്കി. തിരഞ്ഞെടുപ്പ് മുന്നിൽ കണ്ടു കൊണ്ടാണ് ഇ ഡിയുടെയും ആദായ നികുതി വകുപ്പിൻ്റെയും നീക്കമെന്ന് പറഞ്ഞ വർ​ഗീസ് ചോദ്യം ചെയ്യലിൽ ഉദ്യോഗസ്ഥർ ഭീഷണിപ്പെടുത്തിയിട്ടില്ലെന്നും കൂട്ടിച്ചേർത്തു. 

കരുവന്നൂർ കേസിൽ സിപിഎം തൃശ്ശൂർ ജില്ലാ സെക്രട്ടറി എംഎം വർഗീസിന്റെ ചോദ്യം ചെയ്യൽ തിങ്കളാഴ്ച്ചയും തുടരും. ഇന്നലെ 12 മണിക്കൂർ ആണ് കേന്ദ്ര ഏജൻസികളായ ഇ ഡിയും ആദായ നികുതി വകുപ്പും വർഗീനെ ചോദ്യം ചെയ്തത്. വർഗീസിന്റെ ഫോണും അന്വേഷണത്തിന്റെ ഭാഗമായി ഇ ഡി കസ്റ്റഡിയിൽ എടുത്തിട്ടുണ്ട്. തൃശ്ശൂരിലെ വിവിധ സഹകരണ ബാങ്കുകളിലും ദേശസാത്കൃത ബാങ്കുകളിലെയും സിപിഎം നിയത്രണത്തിലുള്ള അക്കൗണ്ടുകളെ കുറിച്ചാണ് ഇ ഡി അന്വേഷണം. തൃശ്ശൂരിലെ രണ്ട് ബാങ്ക് അക്കൗണ്ടുകളിൽ നിന്ന് പണം പിൻവലിച്ചതുമായി ബന്ധപ്പെട്ട് ഐടി വിഭാഗവും ഇന്നലെ വർഗീസിനെ ചോദ്യം ചെയ്തിരുന്നു. തിങ്കളാഴ്ച പി കെ ബിജുവിനോടും ഹാജരാകാൻ നിർദ്ദേശിച്ചിട്ടുണ്ട്.

ഏഷ്യാനെറ്റ് ന്യൂസ് ലൈവ്