മെഡിക്കൽ കോളേജ് സമരം; നിരോധനാജ്ഞ ലംഘിച്ചതിന് ഡോക്ടർമാർക്കെതിരെ കേസ്

നിരോധനാജ്ഞ ലംഘിച്ചതിനാണ് നടപടിയെന്ന് പൊലീസ് അറിയിച്ചു. അമ്പതിലധികം പേർക്കെതിരെയാണ് മെഡിക്കൽ കോളേജ് പോലീസ് കേസ് എടുത്തത്.

തിരുവനന്തപുരം: മെഡിക്കൽ കോളേജിനു മുമ്പിൽ പ്രതിഷേധിച്ച ഡോക്ടർമാർക്കെതിരെ പൊലീസ് കേസെടുത്തു. നിരോധനാജ്ഞ ലംഘിച്ചതിനാണ് നടപടിയെന്ന് പൊലീസ് അറിയിച്ചു. അമ്പതിലധികം പേർക്കെതിരെയാണ് മെഡിക്കൽ കോളേജ് പോലീസ് കേസ് എടുത്തത്.

ആശുപത്രിയിൽ ചികിത്സയിലുണ്ടായിരുന്ന  രോ​ഗിയെ പുഴുവരിച്ചെന്ന പരാതിയിൽ നടപടിയെടുത്തതിനെതിരെയാണ് ഡോക്ടർമാർ ഇന്ന് രണ്ട് മണിക്കൂർ പ്രതിഷേധിച്ചത് . ഒപികളുടെ പ്രവർത്തനത്തെ ഡോക്ടർമാരുടെ സമരം സാരമായി ബാധിച്ചില്ല. മെഡിക്കൽ കോളേജിൽ ചികിത്സയിലിരിക്കെ രോ​ഗിയെ പുഴുവരിച്ചെന്ന പരാതിയിൽ ആരോ​ഗ്യവകുപ്പ് അച്ചടക്ക നടപടി സ്വീകരിച്ചതിനെതിരെയാണ് ഡോക്ടർമാരുടെ പ്രതിഷേധം. നഴ്സുമാരും കരിദിനം ആചരിക്കുകയാണ്.

കെജിഎംസിടിഎ യൂണിറ്റ് പ്രസിഡന്റ് ഇന്ന് 48 മണിക്കൂർ നീളുന്ന സത്യ​ഗ്രഹം തുടങ്ങും. റിലേ സത്യ​ഗ്രഹം തീരും മുമ്പ് സസ്പെൻഷൻ നടപടി പിൻവലിച്ചില്ലെങ്കിൽ കൊവിഡ് ഇതര ഡ്യൂട്ടി ബഹിഷ്കരിച്ച് പണിമുടക്കിലേക്ക് പോകുമെന്നാണ് ഡോക്ടർമാരുടെ മുന്നറിയിപ്പ്. നടപടി പിൻവലിച്ചില്ലെങ്കിൽ പണിമുടക്കിലേക്ക് പോകുമെന്ന് നഴ്സുമാരും പറയുന്നു. അതേസമയം, അന്വേഷണത്തിൽ നടപടിയുമായി മുന്നോട്ട് പോകാൻ തന്നെയാണ് ആരോ​ഗ്യവകുപ്പിന്റെ തീരുമാനം.