17 കാരനായ പ്രതിയുടെ അതിവേഗം ജാമ്യം അത്ഭുതപ്പെടുത്തി, പൊലീസിന് വീഴ്ച പറ്റി, നടപടിയുണ്ടാകുമെന്നും ആഭ്യന്തര മന്ത്രി; ചേരാനല്ലൂർ വാഹനാപകടം സഭയിലും ചർച്ച

ചേരാനല്ലൂരിൽ 17 കാരൻ ഓടിച്ച ബെൻസ് കാറിടിച്ച് സ്കൂട്ടർ യാത്രക്കാരൻ മരിച്ച സംഭവം നിയമസഭയിൽ ചർച്ചയായി. പ്രതിക്ക് വേഗത്തിൽ ജാമ്യം ലഭിച്ചതിൽ ആഭ്യന്തര മന്ത്രി അത്ഭുതം പ്രകടിപ്പിച്ചു. പൊലീസിന്‍റെ വീഴ്ചയിൽ നടപടിയുണ്ടാകുമെന്നും ചെന്നിത്തല

തിരുവനന്തപുരം: ചേരാനല്ലൂരിൽ 17 കാരൻ ഓടിച്ച ബെൻസ് കാറിടിച്ച് സ്കൂട്ടർ യാത്രക്കാരൻ മരിച്ച സംഭവം നിയമസഭയിലും ചൂടേറിയ ചർച്ചയായി. പ്രതിപക്ഷ നേതാവ് പിണറായി വിജയനാണ് വിഷയം ഉന്നയിച്ചത്. പ്രായപൂർത്തിയാകാത്തവർ വാഹനം ഓടിച്ചുള്ള അപകടങ്ങൾ വർധിപ്പിവരികയാണെന്നും ഉന്നത സ്വാധീനം ഉപയോഗിച്ച് രക്ഷപ്പെടുന്ന സാഹചര്യം ഒഴിവാക്കണമെന്നും പിണറായി ആവശ്യപ്പെട്ടു. പ്രതിപക്ഷ നേതാവ് ഉന്നയിച്ച വിഷയം ശരിയാണെന്ന് ആഭ്യന്തര മന്ത്രി രമേശ് ചെന്നിത്തല വ്യക്തമാക്കി. ചേരാനല്ലൂർ കേസിലെ പ്രതിയെ ജുവനൈൽ കോടതിയിൽ ഹാജരാക്കിയ ഉടൻ ജാമ്യം കിട്ടിയത് അത്ഭുതപ്പെടുത്തിയെന്നും ചെന്നിത്തല വിവരിച്ചു. ദാരുണമായ സംഭവമാണ് ചേരാനല്ലൂരിൽ ഉണ്ടായത്. തുടക്കത്തിൽ പൊലീസ് സ്വീകരിച്ച നിലപാട് ശരിയല്ലെന്നും ആഭ്യന്തര മന്ത്രി തുറന്ന് സമ്മതിച്ചു.

പൊലീസിന്‍റെ വീഴ്ചയിൽ നടപടി ഉറപ്പ്

നരഹത്യാക്കുറ്റം ആദ്യം തന്നെ ചുമത്തേണ്ടതായിരുന്നു എന്നും ആഭ്യന്തര മന്ത്രി വ്യക്തമാക്കി. ആ വകുപ്പ് ചുമത്താതിരുന്നത് പൊലീസിന്‍റെ വീഴ്ചയാണ്. അടിയന്തരമായി വിഷയത്തിൽ ഇടപെട്ട് ഡി ജി പിയോട് സംസാരിച്ചു. ആവശ്യമായ നടപടികൾ സ്വീകരിക്കാൻ ആവശ്യപ്പെട്ടെന്നും ചെന്നിത്തല വ്യക്തമാക്കി. പിന്നീട് പൊലീസ് പ്രതിക്കെതിരെ നരഹത്യാക്കുറ്റം ചുമത്തി കേസെടുത്തു. പ്രതിയെ കസ്റ്റഡിയിലെടുത്ത് രാത്രി തന്നെ ജുവനൈൽ കോടതിക്ക് മുന്നിൽ ഹാജരാക്കി. സർപ്രൈസായാണ് തനിക്ക് അതിൽ ഒരു കാര്യം തോന്നിയത്. കോടതിയിൽ ഹാജരാക്കിയ ഉടൻ തന്നെ പ്രതിക്ക് ജാമ്യം അനുവദിച്ചു. ഇത് അത്ഭുതപ്പെടുത്തിയെന്നും ചെന്നിത്തല വിവരിച്ചു. പ്രതിയുടെ ജാമ്യം റദ്ദാക്കാനുള്ള നടപടികൾ സ്വീകരിക്കാൻ നിർദേശം നൽകിയിട്ടുണ്ട്. നീതി എല്ലാവർക്കും ഒരുപോലെ തന്നെയാണ്. അതിൽ പാവപ്പെട്ടവനെന്നോ പണക്കാരനെന്നോ ഇല്ല. വാഹനം ഓടിച്ചത് പതിനേഴുകാരനാണ്. വാഹനം ജഡ്ജിയുടെ പേരിലാണെങ്കിൽ ജഡ്ജിക്കെതിരെയും കേസെടുക്കുമെന്നതിൽ ആർക്കും സംശയം വേണ്ടെന്നും ചെന്നിത്തല സഭയെ അറിയിച്ചു.

ജഡ്ജി ആയാലും വാദി ആയാലും നിയമം എല്ലാവർക്കും ഒരുപോലെ

സഭയ്ക്ക് പുറത്തിറങ്ങിയ ശേഷവും ആഭ്യന്തര മന്ത്രി ഇക്കാര്യത്തിലെ നിലപാട് ആവർത്തിച്ചു. അപകടത്തിൽ പൊലീസ് സ്വീകരിക്കേണ്ട നടപടി എടുത്തില്ല എന്ന് തന്നെയാണ് അഭിപ്രായം എന്ന് അദ്ദേഹം വ്യക്തമാക്കി. വീഴ്ച സംബന്ധിച്ച് എ ഡി ജി പി വിജയനോട് അന്വേഷിക്കാൻ ആവശ്യപ്പെട്ടു. മരിച്ചയാളുടെ സംസ്കാരത്തിന് മുൻപ് തന്നെ അപകടമുണ്ടാക്കിയ ആൾക്ക് ജാമ്യം കിട്ടി. അത് വീഴ്ചയാണ്. അംഗീകരിക്കാൻ നിവൃത്തിയില്ല. വീഴ്ച വരുത്തിയവർക്കെതിരെ നടപടി ഉണ്ടാകും. വാഹന ഉടമക്കെതിരെയും നടപടി ഉണ്ടാകും. ജഡ്ജി ആണെങ്കിലും വാദി ആണെങ്കിലും നിയമം എല്ലാവർക്കും ഒരുപോലെയെന്നും ആഭ്യന്തര മന്ത്രി ചൂണ്ടിക്കാട്ടി. മദ്യപിച്ച് വാഹനമോടിച്ചാൽ കർശന നടപടിയെന്നും ചെന്നിത്തല കൂട്ടിച്ചേർത്തു.

ജഡ്ജിക്കെതിരെ കേസ്

അതേസമയം ചേരാനല്ലൂരിൽ 17 കാരൻ ഓടിച്ച ബെൻസ് കാറിടിച്ച് സ്കൂട്ടർ യാത്രക്കാരൻ മരിച്ച സംഭവത്തിൽ വാഹന ഉടമയും കുട്ടിയുടെ പിതാവുമായ അഡീഷണൽ സെഷൻസ് ജഡ്ജിക്കെതിരെ പൊലീസ് കേസെടുത്തു. ഹൈക്കോടതിയുടെ അനുമതി തേടിയ ശേഷമാണ് മോട്ടോർ വെഹിക്കിൾ ആക്ട് 199 A വകുപ്പ് ചുമത്തി ജഡ്ജിയെ പ്രതിചേർത്ത് പോലീസിന്റെ എഫ് ഐ ആർ റിപ്പോർട്ട് കോടതിയിൽ സമർപ്പിച്ചത്. നിയമോപദേശം തേടിയ ശേഷമാണ് ഈ നിർണായക നടപടിയെന്ന് പൊലീസ് വ്യക്തമാക്കി. കൂടാതെ സ്റ്റേഷൻ ജാമ്യത്തിൽ വിട്ടയച്ച 17 കാരനായ പ്രതിയുടെ ജാമ്യം റദ്ദാക്കാൻ എറണാകുളം ജില്ലാ സെഷൻസ് കോടതിയിൽ അപേക്ഷ നൽകാനും പോലീസ് തീരുമാനിച്ചിട്ടുണ്ട്.

ആശയങ്ങളുടെ ഉത്സവം- അഗോറയില്‍ രജിസ്റ്റര്‍ ചെയ്യാൻ ഇവിടെ ക്ലിക് ചെയ്യുക