സിപിഎം ജില്ലാ സെക്രട്ടറിയുടെ ഭീഷണി പ്രസംഗത്തിന് പിന്നാലെ നടപടി; പനമരം സിഐയെ സ്ഥലംമാറ്റി 

സി ഐ അഷറഫിന് തിരിച്ചടി അനുഭവിക്കേണ്ടി വരുമെന്നും പൊലീസ് ഉദ്യോഗസ്ഥരുടെ പേര് പറഞ്ഞ് സൂക്കേട് തീർക്കുമെന്നും കെ റഫീഖ്  ഭീഷണി പ്രസംഗത്തിൽ പറഞ്ഞിരുന്നു.  

കൽപ്പറ്റ : പനമരം സിഐ എ അഷ്റഫിനെ ഇടുക്കി ക്രൈംബ്രാഞ്ചിലേക്ക് സ്ഥലംമാറ്റി. വയനാട് ജില്ലാ സെക്രട്ടറി കെ റഫീഖിന്റെ ഭീഷണി പ്രസംഗത്തിന് പിന്നാലെയാണ് നടപടി. സിപിഎം നേതാക്കൾക്കെതിരെ കള്ളക്കേസ് എടുക്കുന്നുവെന്ന് ആരോപിച്ച് സിപിഎം നടത്തിയ പ്രതിഷേധ യോഗത്തിലായിരുന്നു ഭീഷണി. സി ഐ അഷറഫിന് തിരിച്ചടി അനുഭവിക്കേണ്ടി വരുമെന്നും പൊലീസ് ഉദ്യോഗസ്ഥരുടെ പേര് പറഞ്ഞ് സൂക്കേട് തീർക്കുമെന്നും കെ. റഫീഖ്  ഭീഷണി പ്രസംഗത്തിൽ പറഞ്ഞിരുന്നു. 

എൽഡിഎഫ് ഭരിക്കുന്ന പനമരം പഞ്ചായത്തിൽ അവിശ്വാസപ്രമേയത്തെ അനുകൂലിച്ചതിന് പിന്നാലെ മെമ്പർ ബെന്നി ചെറിയാൻ ആക്രമിക്കപ്പെട്ടിരുന്നു. ഈ സംഭവത്തിൽ പനമരം പൊലീസ് ഡിവൈഎഫ്ഐ നേതാക്കളെ അറസ്റ്റ് ചെയ്തിരുന്നു. ഏരിയ കമ്മിറ്റി അംഗം ഷിജുവിനും അമ്മയ്ക്കും എതിരെ ബെന്നി അധിക്ഷേപ പരാമർശം നടത്തിയെന്നതിൽ നടപടി എടുക്കുന്നില്ലെന്നും സിപിഎം ആരോപിച്ചിരുന്നു.