വിയറ്റ്നാമില് നിന്ന് കേരളത്തിൽ വിമാനം പറന്നിറങ്ങും! ചർച്ച നടത്തി മുഖ്യമന്ത്രി, 3 മേഖലകളിൽ സഹകരണത്തിന് സാധ്യത
Synopsis
കാര്ഷിക മേഖലയിലെ യന്ത്രവല്ക്കരണം, മത്സ്യബന്ധന മേഖലയിലെ ആധുനിക വല്ക്കരണം, ടൂറിസം എന്നിവയില് കേരളത്തോട് സഹകരിച്ച് പ്രവര്ത്തിക്കാന് വിയറ്റ്നാം താല്പ്പര്യപ്പെട്ടു
തിരുവനന്തപുരം: ടൂറിസം സഹകരണത്തിന്റെ ഭാഗമായി വിയറ്റ്നാമില് നിന്ന് കേരളത്തിലേക്ക് വിമാന സര്വ്വീസ് ആരംഭിക്കുന്ന കാര്യം ഗൗരവമായി പരിഗണിക്കാൻ വിയറ്റ്നാമിലെ ബെന്ട്രി പ്രവിശ്യാ ചെയര്മാന് ട്രാന് നഗോക് ടാമും സംഘവും മുഖ്യമന്ത്രി പിണറായി വിജയനുമായി നടത്തിയ കൂടിക്കാഴ്ചയില് തീരുമാനം. വിയറ്റ് ജെറ്റ് എയർലൈൻസ് അധികൃതമായി ചർച്ച നടത്തിയ കാര്യം അറിയിച്ച മുഖ്യമന്ത്രിയാണ് ഇക്കാര്യം വ്യക്തമാക്കിയത്. കാര്ഷിക മേഖലയിലെ യന്ത്രവല്ക്കരണം, മത്സ്യബന്ധന മേഖലയിലെ ആധുനിക വല്ക്കരണം, ടൂറിസം എന്നിവയില് കേരളത്തോട് സഹകരിച്ച് പ്രവര്ത്തിക്കാന് അവര് താല്പ്പര്യപ്പെട്ടെന്നും ഐ ടി ഉള്പ്പെടെയുള്ള മേഖലകളില് കേരളത്തിന്റെ സേവനം വിയറ്റ്നാമിന് ലഭ്യമാക്കുമെന്നും മുഖ്യമന്ത്രി അറിയിച്ചു. യോഗത്തില് കായിക വകുപ്പു മന്ത്രി വി അബ്ദുറഹ്മാന്, ചീഫ് സെക്രട്ടറി ഡോ. വി പി ജോയി, സംസ്ഥാന സര്ക്കാരിന്റെ ദില്ലിയിലെ ഓഫീസര് ഓണ് സ്പെഷ്യല് ഡ്യൂട്ടി വേണു രാജാമണി തുടങ്ങിയവര് പങ്കെടുത്തു.
'യുവജനതയുടെ തൊഴിൽ സ്വപ്നങ്ങൾ സാർത്ഥകമാക്കാൻ നിലപാട് സ്വീകരിച്ച സർക്കാർ'; അഭിവാദ്യവുമായി ഡിവൈഎഫ്ഐ
വിദേശയാത്രയുടെ തുടര്പ്രവര്ത്തനങ്ങൾ ആവിഷ്കരിക്കാന് യോഗം ചേര്ന്നു
അതേസമയം മുഖ്യമന്ത്രി പിണറായി വിജയന്റെ നേതൃത്വത്തില് കഴിഞ്ഞ മാസം നടത്തിയ വിദേശ യാത്രയിലെടുത്ത തീരുമാനങ്ങളുടെയും ആലോചനകളുടെയും തുടര് പ്രവര്ത്തനം ആവിഷ്കരിക്കാനും ഇന്ന് യോഗം ചേര്ന്നു. മുഖ്യമന്ത്രിയുടെ അദ്ധ്യക്ഷതയില് ചേര്ന്ന യോഗത്തില് ബന്ധപ്പെട്ട മന്ത്രിമാരും ഉന്നത ഉദ്യോഗസ്ഥരും പങ്കെടുത്തു. ഫിന്ലന്റ്, നോര്വേ, യു.കെ എന്നീ രാജ്യങ്ങളിലെ വിവിധ സ്ഥാപനങ്ങളും ഏജന്സികളുമായി ചേര്ന്ന് നടപ്പാക്കേണ്ട പ്രവര്ത്തനങ്ങളുടെ അവലോകനം നടത്തി. നഗര ശാക്തീകരണവുമായി ബന്ധപ്പെട്ട് തുടർപ്രവർത്തനങ്ങൾ ആവിഷ്കരിക്കുന്നതിന്റെ ഭാഗമായി നോർവെയിലെ നാൻസൻ സെന്റർ ഡയറക്ടറും സംഘവും കൊച്ചിയിൽ എത്തിയിട്ടുണ്ട് എന്നതിൽ മുഖ്യമന്ത്രി സന്തോഷം പ്രകടിപ്പിച്ചു. മത്സ്യബന്ധന മേഖലയുടെ ശാക്തീകരണത്തിന് കുഫോസിൽ ശിൽപ്പശാല സംഘടിപ്പിക്കും. ഈ ശില്പശാലയിൽ തുടർ പ്രവർത്തനങ്ങൾ സംബന്ധിച്ച് വിശദമായ രൂപരേഖ തയ്യാറാക്കും. നോർവിജിയൻ ജിയോ ടെക്നിക്കൽ ഡയറക്ടർ അടുത്തുതന്നെ കേരളം സന്ദർശിച്ച് തുടർ പ്രവർത്തനങ്ങൾ ആവിഷ്കരിക്കും. വെയിൽസ് സർക്കാരുമായി ആരോഗ്യപ്രവർത്തകരെ റിക്രൂട്ട് ചെയ്യുന്നതിനുള്ള ചർച്ചകൾ പുരോഗമിക്കുകയാണ്. ഓരോ വകുപ്പും ചെയ്യേണ്ട പ്രവര്ത്തനങ്ങളും നടപ്പാക്കേണ്ട കാര്യങ്ങളും സമയബന്ധിതമായി പൂര്ത്തീകരിക്കാന് മുഖ്യമന്ത്രി നിര്ദ്ദേശിച്ചു. യോഗത്തില് മന്ത്രിമാരായ പി. രാജീവ്, വി. ശിവന്കുട്ടി, വി. അബ്ദുറഹ്മാന്, വീണാ ജോര്ജ്ജ്, പ്ലാനിംഗ് ബോര്ഡ് വൈസ് ചെയര്മാന് വി.കെ. രാമചന്ദ്രന്, ചീഫ് സെക്രട്ടറി ഡോ. വി.പി. ജോയി, സംസ്ഥാന സര്ക്കാരിന്റെ ഡല്ഹിയിലെ ഓഫീസര് ഓണ് സ്പെഷ്യല് ഡ്യൂട്ടി വേണു രാജാമണി, ബന്ധപ്പെട്ട വകുപ്പ് സെക്രട്ടറിമാര് തുടങ്ങിയവര് പങ്കെടുത്തു.