'സ്ത്രീകൾക്ക് തുല്യ അവകാശവും സ്വാതന്ത്ര്യവുമുള്ള സമൂഹത്തിനായി ഇനിയുമേറെ ദൂരം പോകാനുണ്ട്': മുഖ്യമന്ത്രി

ലിംഗസമത്വവും തുല്യനീതിയും സമൂഹത്തിന്‍റെ ബോധ്യമായി മാറ്റാൻ പ്രയത്നിക്കുമെന്ന് ദൃഢപ്രതിജ്ഞ ചെയ്യാം

തിരുവനന്തപുരം: ദേശീയ ബാലികാ ദിനത്തിൽ ആശംസയുമായി മുഖ്യമന്ത്രി പിണറായി വിജയൻ. വികസിതവും പുരോഗമനോന്മുഖവുമായ ഒരു സമൂഹം സൃഷ്ടിക്കപ്പെടണമെങ്കിൽ സ്ത്രീകൾക്ക് തുല്യ അവകാശവും സ്വാതന്ത്ര്യവും അനുഭവിക്കാൻ കഴിയുന്ന സ്ഥിതി വിശേഷം ഉണ്ടാകണമെന്ന് മുഖ്യമന്ത്രി ചൂണ്ടികാട്ടി. അത്തരമൊരു സമൂഹമായി മാറാൻ ഇനിയുമൊരുപാട് ദൂരം നമ്മൾ മുന്നോട്ടു പോകേണ്ടതുണ്ടെന്നും പിണറായി ബാലികാ ദിന സന്ദേശത്തിൽ ഓർമ്മിപ്പിച്ചു.

മുഖ്യമന്ത്രിയുടെ സന്ദേശം പൂർണരൂപത്തിൽ

ഇന്ന് ദേശീയ ബാലികാ ദിനം. വികസിതവും പുരോഗമനോന്മുഖവുമായ ഒരു സമൂഹം സൃഷ്ടിക്കപ്പെടണമെങ്കിൽ സ്ത്രീകൾക്ക് തുല്യ അവകാശവും സ്വാതന്ത്ര്യവും അനുഭവിക്കാൻ കഴിയുന്ന സ്ഥിതി വിശേഷം സംജാതമാകണം. അത്തരമൊരു സമൂഹമായി മാറാൻ ഇനിയുമൊരുപാട് ദൂരം നമ്മൾ മുന്നോട്ടു പോകേണ്ടതുണ്ട്. ആ ലക്ഷ്യം നിറവേറ്റാൻ, ലിംഗസമത്വവും തുല്യനീതിയും സമൂഹത്തിന്‍റെ ബോധ്യമായി മാറ്റാൻ പ്രയത്നിക്കുമെന്നു ദൃഢപ്രതിജ്ഞ ചെയ്യാം. അതിനായി ഒരുമിച്ച് നിൽക്കാം.