തിരുവനന്തപുരത്ത് വൻ നീക്കവുമായി യുവാക്കൾ; മാനവീയം വീഥിയിൽ ജൂലൈ 23-ന് വൈകിട്ട് ദില്ലി സമരത്തിന് ഐക്യദാർഢ്യം പ്രഖ്യാപിച്ച് ജനകീയ പ്രതിഷേധത്തിന് നീക്കം

കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ്റെ രാജി ആവശ്യപ്പെട്ട് ദില്ലിയിൽ നടക്കുന്ന സമരത്തിന് ഐക്യദാർഢ്യം പ്രഖ്യാപിച്ച് തിരുവനന്തപുരത്തും പ്രതിഷേധം. രാഷ്ട്രീയ പാർട്ടികളുടെ പിന്തുണയില്ലാതെ വിദ്യാർത്ഥികളും യുവാക്കളും ജൂലൈ 23-ന് മാനവീയം വീഥിയിൽ ഒത്തുകൂടും.

തിരുവനന്തപുരം: ദില്ലിയിൽ കോക്രോച് ജനത പാർട്ടി കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ്റെ രാജി ആവശ്യപ്പെട്ട് നടത്തുന്ന സമരം തിരുവനന്തപുരത്തേക്കും വ്യാപിക്കുന്നു. ദില്ലിയിൽ സമരക്കാർക്ക് നേരായ പൊലീസ് അതിക്രമത്തിൽ പ്രതിഷേധിച്ചും ദില്ലിയിലെ സമരത്തിന് ഐക്യദാർഢ്യം അറിയിച്ചും വലിയ പ്രതിഷേധ കൂട്ടായ്‌മയ്ക്കാണ് നീക്കം. യുവാക്കളും വിദ്യാർത്ഥികളും അധ്യാപകരുമടങ്ങിയ വലിയ സംഘമാണ് പ്രതിഷേധത്തിനായി മുന്നിട്ടിറങ്ങുന്നത്.

തിരുവനന്തപുരം മാനവീയം വീഥിയിൽ ജൂലൈ 23 ന് വൈകിട്ട് ഏഴ് മണിയോടെ പ്രതിഷേധം നടത്താനാണ് നീക്കം. രാഷ്ട്രീയ പാർട്ടികളുടെ ഒന്നിൻ്റെയും പിന്തുണയില്ലാതെ സ്വതന്ത്ര നിലപാടുള്ള യുവാക്കളാണ് ദില്ലി സമരത്തിന് ഐക്യദാർഢ്യം അറിയിച്ചുള്ള പ്രതിഷേധ കൂട്ടായ്മയ്ക്ക് നേതൃത്വം നൽകുന്നതെന്ന് സംഘാടകരിൽ ഒരാളും വിദ്യാർത്ഥിയുമായ എമിൽ ഏഷ്യാനെറ്റ് ന്യൂസ് ഓൺലൈനിനോട് പ്രതികരിച്ചു. പ്രതിഷേധത്തിൻ്റെ ഭാഗമായി നവമാധ്യമങ്ങൾ വഴി ശക്തമായ പ്രചാരണത്തിനും തുടക്കമായി. ഐക്യദാർഢ്യ പ്രതിഷേധ സദസ് ആര് ഉദ്ഘാടനം ചെയ്യുമെന്ന കാര്യത്തിൽ തീരുമാനമായിട്ടില്ല. പ്രതിഷേധ കൂട്ടായ്മ സംഘടിപ്പിക്കാനുള്ള പൊലീസ് അനുമതി നാളെ തേടുമെന്നും എമിൽ വ്യക്തമാക്കി.