അട്ടപ്പാടിയിൽ വീണ്ടും കാട്ടാന ആക്രമണം; വനംവകുപ്പ് വാഹനം തക‍ർത്തു, ഡ്രൈവർ രക്ഷപ്പെട്ടത് തലനാരിഴയ്ക്ക്

ദ്രുതപ്രതികരണ സംഘത്തിന്റെ വാഹനം കാട്ടാന കൊമ്പിൽ കോർത്ത് പുറകോട്ട് തള്ളി നീക്കി. വൈദ്യുതി പോസ്റ്റിലിടിച്ചാണ് വാഹനം നിന്നത്. ഡ്രൈവർ സിദീഖ് വാഹനം പിന്നെയും മുന്നോട്ട് എടുത്തതോടെ കാട്ടാന പിന്തിരിയുകയായിരുന്നു

പാലക്കാട്: അട്ടപ്പാടിയിൽ കാട്ടാന വീടും ദ്രുതപ്രതികരണ സംഘത്തിന്റെ വാഹനവും തകർത്തു. താവളം കരിവടം മൊട്ടി കോളനിയിലാണ് കാട്ടാന വീടും, ദ്രുതപ്രതികരണ സംഘത്തിന്റെ വാഹനവും തകർത്തത്. മൊട്ടി കോളനിയിലെ മണിയന്റെ വീടാണ് കാട്ടാന തകർത്തത്. വീട്ടിലുള്ളവർ ഓടി രക്ഷപ്പെടുകയായിരുന്നു. ദ്രുതപ്രതികരണ സംഘത്തിന്റെ വാഹനം കാട്ടാന കൊമ്പിൽ കോർത്ത് പുറകോട്ട് തള്ളി നീക്കി. വൈദ്യുതി പോസ്റ്റിലിടിച്ചാണ് വാഹനം നിന്നത്. ഡ്രൈവർ സിദീഖ് വാഹനം പിന്നെയും മുന്നോട്ട് എടുത്തതോടെ കാട്ടാന പിന്തിരിയുകയായിരുന്നു.