'അകമലയിൽ 2 മണിക്കൂറിനുള്ളില് വീടൊഴിയാന് നിര്ദേശിച്ചിട്ടില്ല'; പ്രചരിക്കുന്ന വാർത്ത തെറ്റെന്ന് കലക്ടർ
Synopsis
പരിസര പ്രദേശങ്ങളിലായി ഏകദേശം എട്ട് കുടുംബങ്ങള് താമസിക്കുന്നുണ്ട്. ഇവരെയും മാറ്റുന്നതിനുള്ള നടപടി സ്വീകരിച്ചിട്ടുണ്ടെന്നും വസ്തുതാ വിരുദ്ധമായ വാര്ത്തകള് പ്രചരിപ്പിക്കരുതെന്നും ജില്ലാ കലക്ടര് അറിയിച്ചു.
തൃശൂര്: അകമല മേഖലയില് നിന്ന് 2 മണിക്കൂറിനുള്ളില് ആളുകളോട് വീടൊഴിയാന് നിര്ദേശം നല്കിയതായി പ്രചരിക്കുന്ന വാര്ത്ത തെറ്റാണെന്ന് ജില്ലാ കലക്ടര് അറിയിച്ചു. ജൂലൈ 31ന് വടക്കാഞ്ചേരി മുനിസിപ്പാലിറ്റി സെക്രട്ടറി അകമല-മാരാത്തുകുന്ന് ഭാഗത്തു മണ്ണിടിച്ചില് സാധ്യതയുണ്ടെന്നും അതിനാല് വിദഗ്ധസംഘം പരിശോധിക്കണമെന്നും ജില്ലാ കണ്ട്രോള് റൂമില് അറിയിച്ചിട്ടുണ്ട്. ഇതിന്റെ അടിസ്ഥാനത്തില് മുന്കരുതല് നടപടിയുടെ ഭാഗമായി മണ്ണിടിച്ചില് സാധ്യതാ പ്രദേശത്തുനിന്ന് ആളുകളെ മാറ്റണമെന്ന നിര്ദേശം നല്കുകയും, 25 കുടുംബങ്ങള് ബന്ധു വീടുകളിലേക്കും, ക്യാമ്പുകളിലേക്കും മാറുകയും ചെയ്തു.
ജിയോളജിസ്റ്റ്, മണ്ണ് സംരക്ഷണ ഓഫീസര്, ഭൂജലവകുപ്പ് തുടങ്ങിയവര് അടങ്ങുന്ന വിദഗ്ധ സംഘത്തോട് സ്ഥലം സന്ദര്ശിച്ച് ആവശ്യമായ നിര്ദ്ദേശങ്ങള് നല്കാന് അറിയിച്ചതിന്റെ അടിസ്ഥാനത്തില് അവർ സ്ഥലം സന്ദര്ശിച്ചു. മണ്ണിടിച്ചിലിന് സാധ്യതയുണ്ടെന്നും ശക്തമായ മഴ പെയ്യുന്ന സാഹചര്യത്തില് മുന്കരുതല് നടപടികളുടെ ഭാഗമായി ആളുകളെ മാറ്റിത്താമസിപ്പിക്കണമെന്നും വിദഗ്ധസംഘം അറിയിച്ചതായി തഹസില്ദാര് റിപ്പോര്ട്ട് ചെയ്തു.
പരിസര പ്രദേശങ്ങളിലായി ഏകദേശം എട്ട് കുടുംബങ്ങള് താമസിക്കുന്നുണ്ട്. ഇവരെയും മാറ്റുന്നതിനുള്ള നടപടി സ്വീകരിച്ചിട്ടുണ്ടെന്നും വസ്തുതാ വിരുദ്ധമായ വാര്ത്തകള് പ്രചരിപ്പിക്കരുതെന്നും ജില്ലാ കലക്ടര് അറിയിച്ചു.
കേരളത്തിലെ എല്ലാ വാർത്തകൾ Kerala News അറിയാൻ എപ്പോഴും ഏഷ്യാനെറ്റ് ന്യൂസ് വാർത്തകൾ. Malayalam News തത്സമയ അപ്ഡേറ്റുകളും ആഴത്തിലുള്ള വിശകലനവും സമഗ്രമായ റിപ്പോർട്ടിംഗും — എല്ലാം ഒരൊറ്റ സ്ഥലത്ത്. ഏത് സമയത്തും, എവിടെയും വിശ്വസനീയമായ വാർത്തകൾ ലഭിക്കാൻ Asianet News Malayalam