കര്ഷക ആത്മഹത്യ: കൃഷിവകുപ്പ് മന്ത്രി നാളെ ഇടുക്കിയിൽ
Synopsis
കൃഷിവകുപ്പ് മന്ത്രി വി എസ് സുനില് കുമാര് നാളെ ഇടുക്കി സന്ദര്ശിക്കും. ജില്ലാതല ബാങ്കേഴ്സ് സമിതി യോഗത്തില് മന്ത്രി പങ്കെടുക്കും.
ഇടുക്കി: കര്ഷക ആത്മഹത്യകള് തുടരുന്ന സാഹചര്യത്തില് കൃഷിവകുപ്പ് മന്ത്രി വി എസ് സുനില് കുമാര് നാളെ ഇടുക്കി സന്ദര്ശിക്കും. ജില്ലാതല ബാങ്കേഴ്സ് സമിതി യോഗത്തില് മന്ത്രി പങ്കെടുക്കും. അതേസമയം, മുഖ്യമന്ത്രി വിളിച്ച ബാങ്കേഴ്സ് സമിതി യോഗം അല്പസമയത്തിനുള്ളില് നടക്കും.
പ്രളയത്തില് തകര്ന്ന സംസ്ഥാനത്തെ കാര്ഷിക മേഖലകള് കടുത്ത സാമ്പത്തിക പ്രതിസന്ധിയുടെ നടുവിലാണ്. മൊറട്ടോറിയം നിലനില്ക്കെ വായ്പാ തിരിച്ചടവിന് ബാങ്കുകള് സമ്മര്ദ്ദം ശക്തമാക്കിയതോടെ ആത്മഹത്യയില് അഭയം പ്രാപിക്കുന്നവരുടെ എണ്ണം പെരുകി. പ്രളയ ശേഷം ഇടുക്കിയില് മാത്രം ആറ് കര്ഷകര് ജീവനൊടുക്കിയതായാണ് കണക്ക്. പതിനയ്യായിരത്തോളം കർഷകർക്കാണ് ബാങ്കുകളുടെ ജപ്തി നോട്ടീസ് കിട്ടിയത്.
പ്രളയത്തിൽ നട്ടെല്ല് തകര്ന്ന ഇടുക്കി ജില്ലയുടെ കാര്ഷിക മേഖലയ്ക്ക് ഇരുട്ടടിയായി ബാങ്കുകൾ കടം തിരിച്ച് പിടിക്കാൻ ഇറങ്ങിയതോടെ എന്ത് ചെയ്യുമെന്ന് അറിയാത്ത അങ്കലാപ്പിലാണ് കര്ഷകര്. സര്ക്കാര് നിലപാടിന് വിരുദ്ധമായി സഹകരണ ബാങ്കുകള് തന്നെ ജപ്തി നടപടികളുമായി കര്ഷകരെ സമ്മര്ദ്ദത്തിലാക്കുന്ന പ്രശ്നം ഏഷ്യാനെറ്റ് ന്യൂസ് റോവിംഗ് റിപ്പോര്ട്ടറിലൂടെ പുറത്തെത്തിക്കുക കൂടി ചെയ്തതോടെ സര്ക്കാര് നടപടികള് ഊര്ജ്ജിതമാക്കി.
കേരളത്തിലെ എല്ലാ വാർത്തകൾ Kerala News അറിയാൻ എപ്പോഴും ഏഷ്യാനെറ്റ് ന്യൂസ് വാർത്തകൾ. Malayalam News തത്സമയ അപ്ഡേറ്റുകളും ആഴത്തിലുള്ള വിശകലനവും സമഗ്രമായ റിപ്പോർട്ടിംഗും — എല്ലാം ഒരൊറ്റ സ്ഥലത്ത്. ഏത് സമയത്തും, എവിടെയും വിശ്വസനീയമായ വാർത്തകൾ ലഭിക്കാൻ Asianet News Malayalam