വന്യജീവി ആക്രമണത്തിൽ കൊല്ലപ്പെടുന്നവരുടെ ആശ്രിതർക്കുള്ള നഷ്ടപരിഹാരം 17.5 ലക്ഷമാക്കി സർക്കാർ; പാമ്പ് കടിച്ചോ കടന്നൽ കുത്തേറ്റോ ഉള്ള ജീവഹാനിക്ക് 5 ലക്ഷം

വന്യജീവി ആക്രമണങ്ങളിൽ ഇരയാകുന്നവർക്കുള്ള നഷ്ടപരിഹാര തുക സർക്കാർ വർദ്ധിപ്പിച്ചു. മരണം സംഭവിക്കുന്നവരുടെ ആശ്രിതർക്ക് ഇനി 17.5 ലക്ഷം ലഭിക്കും. പരിക്കേൽക്കുന്നവർക്കും അംഗവൈകല്യം സംഭവിക്കുന്നവർക്കുമുള്ള സഹായധനത്തിലും വലിയ വർധനവ് വരുത്തി

തിരുവനന്തപുരം: വന്യജീവി ആക്രമണങ്ങളിൽ കൊല്ലപ്പെടുന്നവരുടെ ആശ്രിതർക്കുള്ള നഷ്ടപരിഹാര തുക വർദ്ധിപ്പിച്ച് സംസ്ഥാന സർക്കാർ ഉത്തരവിറക്കി. ജനങ്ങളുടെ ദീർഘകാല ആവശ്യങ്ങൾ കണക്കിലെടുത്താണ് ഫോറസ്റ്റ് ഡിപ്പാർട്ട്‌മെന്റിന്റെ ഈ നിർണായക നീക്കം. പുതിയ ഉത്തരവ് പ്രകാരം പാമ്പ്, തേനീച്ച, കടന്നൽ എന്നിവ ഒഴികെയുള്ള വന്യജീവി ആക്രമണങ്ങളിൽ മരണം സംഭവിച്ചാൽ ആശ്രിതർക്ക് നൽകുന്ന സഹായധനം 14 ലക്ഷം രൂപയിൽ നിന്ന് 17.5 ലക്ഷം രൂപയായി ഉയർത്തിയിട്ടുണ്ട്. അതേസമയം പാമ്പ് കടി, തേനീച്ച അല്ലെങ്കിൽ കടന്നൽ കുത്ത് എന്നിവ മൂലം മരണം സംഭവിച്ചാൽ കുടംബത്തിന് നൽകുന്ന നഷ്ടപരിഹാര തുക നാല് ലക്ഷം രൂപയിൽ നിന്ന് അഞ്ച് ലക്ഷം രൂപയായി വർദ്ധിപ്പിച്ചു. ഇതിനുപുറമേ, വന്യജീവി ആക്രമണങ്ങളിൽ ഗുരുതരമായി പരിക്കേൽക്കുന്നവർക്കുള്ള സാമ്പത്തിക സഹായത്തിലും സർക്കാർ വലിയ തോതിൽ വർദ്ധന വരുത്തിയിട്ടുണ്ട്.

അംഗവൈകല്യം സംഭവിക്കുന്നവർക്കും തുക കൂട്ടി

വന്യജീവി ആക്രമണത്തിൽ അംഗവൈകല്യം സംഭവിക്കുന്നവർക്ക് നൽകിവരുന്ന തുകയും പുതുക്കിയിട്ടുണ്ട്. 40 ശതമാനം മുതൽ 60 ശതമാനം വരെ അംഗവൈകല്യം സംഭവിക്കുന്നവർക്ക് രണ്ട് ലക്ഷം രൂപയിൽ നിന്ന് 2.5 ലക്ഷം രൂപയായും, 60 ശതമാനത്തിന് മുകളിൽ അംഗവൈകല്യം ബാധിച്ചവർക്ക് 2.5 ലക്ഷത്തിൽ നിന്ന് 3,12,500 രൂപയായും നഷ്ടപരിഹാരം ഉയർത്തി. നിസ്സാര പരിക്കുകൾക്ക് 12,500 രൂപ വരെ ലഭിക്കും. കൂടാതെ, അടിയന്തര സാഹചര്യങ്ങളിൽ മുഖ്യമന്ത്രിയുടെ ദുരിതാശ്വാസ നിധിയിൽ (സി എം ഡി ആർ എഫ്) നിന്ന് ഒരു ലക്ഷം രൂപ വരെ അനുവദിക്കാനും പുതിയ ഉത്തരവിൽ വ്യക്തമാക്കുന്നു.

ആശയങ്ങളുടെ ഉത്സവം- അഗോറയില്‍ രജിസ്റ്റര്‍ ചെയ്യാൻ ഇവിടെ ക്ലിക് ചെയ്യുക