രാജ്യതലസ്ഥാനത്ത് ഉന്നതതല ചർച്ച, പിന്നാലെ നിർണായക പ്രഖ്യാപനങ്ങളുമായി മുഖ്യമന്ത്രി; വൈദ്യുതി പ്രതിസന്ധിക്ക് പരിഹാര നടപടികൾ

സംസ്ഥാനത്തെ വൈദ്യുതി പ്രതിസന്ധി പരിഹരിക്കുന്നതിനായി മുഖ്യമന്ത്രി വി ഡി സതീശൻ എൻടിപിസിയുമായി ന്യൂഡൽഹിയിൽ നിർണായക ചർച്ച നടത്തി. കായംകുളത്ത് 2000 മെഗാവാട്ട് ശേഷിയുള്ള ബാറ്ററി എനർജി സ്റ്റോറേജ് സിസ്റ്റം സ്ഥാപിക്കാനും മഹാരാഷ്ട്രയിൽ നിന്ന് 300 മെഗാവാട്ട് വൈദ്യുതി ലഭ്യമാക്കാനും തീരുമാനമായി.

ന്യൂഡൽഹി/തിരുവനന്തപുരം: സംസ്ഥാനം നേരിടുന്ന വർധിച്ചുവരുന്ന വൈദ്യുതി ആവശ്യകത പരിഹരിക്കുന്നതിനും ദീർഘകാല ഊർജസുരക്ഷ ഉറപ്പാക്കുന്നതിനുമായി കേന്ദ്ര പൊതുമേഖലാ സ്ഥാപനമായ എൻടിപിസിയുമായി നടത്തിയ ഉന്നതതല ചർച്ചയിൽ നിർണായക തീരുമാനങ്ങൾ കൈക്കൊണ്ടുവെന്ന് മുഖ്യമന്ത്രി വി ഡി സതീശൻ. ന്യൂഡൽഹിയിൽ നടന്ന ചർച്ചയിൽ പുനരുപയോഗ ഊർജ സംഭരണം, അധിക വൈദ്യുതി ലഭ്യത, സാങ്കേതിക സഹകരണം എന്നിവയുൾപ്പെടെയുള്ള സുപ്രധാന മേഖലകളിൽ സമഗ്രമായ ധാരണയിലെത്തി.

ഊർജ സംഭരണ രംഗത്ത് വൻ കുതിച്ചുചാട്ടത്തിന് വഴിയൊരുക്കി കായംകുളത്ത് 2000 MWh ശേഷിയുള്ള കൂറ്റൻ ബാറ്ററി എനർജി സ്റ്റോറേജ് സിസ്റ്റം (BESS) സ്ഥാപിക്കാൻ തീരുമാനമായി. കെഎസ്ഇബി, എൻടിപിസി, എൻടിപിസി ഗ്രീൻ എനർജി ലിമിറ്റഡ് (NGEL) എന്നിവർ സംയുക്തമായാണ് ഈ ബൃഹദ് പദ്ധതി യാഥാർഥ്യമാക്കുന്നത്. ഇതിനായുള്ള ധാരണാപത്രം ഉടൻ ഒപ്പുവെക്കും. ഇതിനുപുറമെ, പോത്തൻകോട്, ശ്രീകണ്ഠപുരം എന്നിവിടങ്ങളിൽ 80 MWh വീതം ശേഷിയുള്ള 'ബെസ്' പദ്ധതികൾ 2027 മാർച്ചോടെ കമ്മീഷൻ ചെയ്യാനും ധാരണയായിട്ടുണ്ട്.

സംസ്ഥാനത്തിന്‍റെ അടിയന്തര വൈദ്യുതി ലഭ്യത ഉറപ്പാക്കുന്നതിനായി മഹാരാഷ്ട്രയിലെ എൻടിപിസി സിന്നർ പദ്ധതിയിൽ നിന്ന് 300 MW വരെ വൈദ്യുതി ലഭ്യമാക്കും. യൂണിറ്റിന് 5.18 രൂപ നിരക്കിലാണ് ഈ വൈദ്യുതി കേരളത്തിന് കൈമാറുക. ഒപ്പം, കായംകുളത്ത് നിലവിലുള്ള 27 MW സോളാർ പദ്ധതിയുടെ തുടർനടപടികൾ വേഗത്തിലാക്കാനും പദ്ധതിക്കാവശ്യമായ പൂർണ സംസ്ഥാന സഹകരണം നൽകാനും യോഗത്തിൽ തീരുമാനമായി. കേരളത്തിന്‍റെ ദീർഘകാല ആവശ്യങ്ങൾ മുൻനിർത്തി സംസ്ഥാനത്തിനായി ഒരു സമർപ്പിത വൈദ്യുതി നിലയം സ്ഥാപിക്കണമെന്ന ആവശ്യവും എൻടിപിസിക്ക് മുന്നിൽ വെച്ചിട്ടുണ്ട്.

ഇതിന്‍റെ ഭാഗമായി രാമഗുണ്ടം പവർ പ്ലാന്റിൽ നിന്ന് ആവശ്യമായ വൈദ്യുതി ലഭ്യമാക്കുന്നതിനുള്ള പവർ പർച്ചേസ് കരാർ (PPA) ഒപ്പുവെക്കാൻ എൻടിപിസി സന്നദ്ധത അറിയിച്ചു. പദ്ധതികൾക്കൊപ്പം കെഎസ്ഇബിയുടെ പ്രവർത്തനമികവ് വർധിപ്പിക്കുന്നതിനായി മാനേജ്‌മെന്റ്, സാങ്കേതിക പ്രവർത്തനം, ആധുനിക വൈദ്യുതി മാനേജ്‌മെന്റ് സംവിധാനങ്ങൾ എന്നിവയിൽ എൻടിപിസിയുടെ പ്രൊഫഷണൽ വൈദഗ്ധ്യവും സാങ്കേതിക പിന്തുണയും ലഭ്യമാക്കും. പുനരുപയോഗ ഊർജം കാര്യക്ഷമമായി സംഭരിച്ചുപയോഗിക്കാനും പീക്ക് സമയങ്ങളിലെ പ്രതിസന്ധി ഒഴിവാക്കാനും ഈ വിപുലമായ നടപടികൾ സംസ്ഥാനത്തിന് വലിയ കരുത്താകുമെന്നും മുഖ്യമന്ത്രി അറിയിച്ചു.