മൂന്നു ബാറുകൾക്ക് ലൈസൻസ് അനുവദിച്ച സംഭവം; സസ്പെൻഷന് സ്റ്റേ ഇല്ല

സർക്കാർ നയത്തിന് മുമ്പ് മൂന്നു ബാറുകൾക്ക് ലൈസൻസ് നൽകിയ ഉദ്യോഗസ്ഥരുടെ സസ്പെൻഷന് അഡ്മിനിസ്ട്രേറ്റീവ് ട്രിബ്യൂണൽ സ്റ്റേ അനുവദിച്ചില്ല. സംഭവത്തിൽ എക്സൈസ് കമ്മീഷണറോട് വിശദീകരണം തേടിയതായി മന്ത്രി എം ലിജു അറിയിച്ചു.

തിരുവനന്തപുരം: സർക്കാർ നയം രൂപീകരിക്കുന്നതിന് മുമ്പ് മൂന്നു ബാറുകൾക്ക് ലൈസൻസ് അനുവദിച്ച ഉദ്യോഗസ്ഥരെ സസ്പെൻഡ് ചെയ്ത നടപടിക്ക് സ്റ്റേ ഇല്ല. നടപടിക്ക് വിധേയരായ ഉദ്യോഗസ്ഥർ അഡ്മിനിസ്ട്രേറ്റീവ് ട്രിബ്യൂണലിനെ സമീപിച്ചെങ്കിലും സ്റ്റേ കിട്ടിയില്ല. ഡെപ്യൂട്ടി കമ്മിഷണർമാരായ സതീഷ് പി കെ, ഷിബു പി എൽ എന്നിവരാണ് ട്രിബ്യൂണലിനെ സമീപിച്ചത്. എറണാകുളം, തിരുവനന്തപുരം ട്രിബ്യൂണലുകളിലാണ് ഉദ്യോഗസ്ഥർ ഹർജി നൽകിയത്. അതേസമയം, ബാർ ലൈസൻസുകളുടെ അനുമതി സർക്കാരിനെ അറിയിക്കേണ്ടതായിരുന്നു എന്ന് എക്സൈസ് വകുപ്പ് മന്ത്രി എം ലിജു. വിഷയത്തിൽ മാധ്യമങ്ങളോട് പ്രതികരിക്കുകയായിരുന്നു എം ലിജു. എക്സൈസ് കമ്മീഷണറോട് വിശദീകരണം തേടിയിട്ടുണ്ടെന്നും മന്ത്രി അറിയിച്ചു.

ഇടതുസർക്കാരിനോട് അതൃപ്തിയുണ്ടെന്നും എം ലിജു പറഞ്ഞു. എം ബി രാജേഷിനോടും മന്ത്രി അതൃപ്തി അറിയിച്ചു. ചുമതല ഏറ്റെടുത്ത ആദ്യ ദിവസങ്ങളിൽ എക്സൈസ് കമ്മീഷണർക്ക് ധാരണ വന്നിട്ടുണ്ടാകില്ലെന്നും എം ലിജു അഭിപ്രായപ്പെട്ടു. എക്സൈസ് കമ്മീഷണറെ മാറ്റുന്നത് ഒക്കെ ഭരണപരമായ കാര്യമാണ്. സർക്കാർ അറിയാതെ പല കാര്യങ്ങളും താഴെത്തട്ടിൽ തീരുമാനമെടുക്കാനാണ് നിലവിലെ ചട്ടം. അത് മുൻ സർക്കാർ ഉണ്ടാക്കിയതാണെന്നും എം ലിജു ചൂണ്ടിക്കാട്ടി.