'ഉത്തരവ് ഹൈറേഞ്ച് മേഖലയ്ക്കും ബാധകം, ആരെയും ഒഴിവാക്കിയിട്ടില്ല'; കടുപ്പിച്ച് ലേബര് കമ്മീഷണര്
Synopsis
തൊഴില് സമയ ക്രമീകരണങ്ങളില് നിന്നും സമുദ്രനിരപ്പില് നിന്ന് 3000 അടി ഉയരമുള്ള പ്രദേശങ്ങളെ ഒഴിവാക്കിയിരുന്നു.
തിരുവനന്തപുരം: വെയിലത്ത് ജോലി ചെയ്യുന്ന തൊഴിലാളികളുടെ ജോലി സമയത്തില് ഏര്പ്പെടുത്തിയ ക്രമീകരണങ്ങള് ഹൈറേഞ്ച് മേഖലയിലെ തോട്ടം തൊഴിലാളികള് ഉള്പ്പെടെയുള്ള എല്ലാ തൊഴിലാളികള്ക്കും ബാധകമായിരിക്കുമെന്ന് ലേബര് കമ്മീഷണര് അര്ജുന് പാണ്ഡ്യന്.
സംസ്ഥാനത്തെ തൊഴിലാളികള്ക്കായി മെയ് 15 വരെ ഏര്പ്പെടുത്തിയ തൊഴില് സമയ ക്രമീകരണങ്ങളില് നിന്നും സമുദ്രനിരപ്പില് നിന്ന് 3000 അടി ഉയരമുള്ള പ്രദേശങ്ങളെ ഒഴിവാക്കിയിരുന്നു. എന്നാല് സംസ്ഥാനത്ത് നിലവില് അനുഭവപ്പെടുന്ന ഉഷ്ണ തരംഗത്തിന്റെ വ്യാപ്തി കണക്കിലെടുത്ത് ഈ മേഖലകളിലെ തോട്ടം തൊഴിലാളികള് അടക്കമുള്ള എല്ലാ തൊഴിലാളികള്ക്കും ഉത്തരവ് ബാധകമായിരിക്കുമെന്ന് കമ്മീഷണര് അറിയിച്ചു. ഈ മേഖലകളില് ഉച്ചക്ക് 12 മുതല് വൈകിട്ട് മൂന്ന് വരെ തൊഴിലാളികള് വെയിലത്ത് ജോലി ചെയ്യുന്നത് കണ്ടെത്തിയാല് തൊഴിലുടമക്കെതിരെ കര്ശന നടപടി സ്വീകരിക്കും. സംസ്ഥാനത്ത് മുഴുവന് തൊഴിലിടങ്ങളിലും ഉത്തരവിന്റെ അടിസ്ഥാനത്തില് ജില്ലാ ലേബര് ഓഫീസര്, ഡെപ്യൂട്ടി ലേബര് ഓഫീസര്, അസി. ലേബര് ഓഫീസര് എന്നിവരുടെ മേല് നോട്ടത്തില് പ്രത്യേക ടീമുകള് രൂപീകരിച്ച് കര്ശന പരിശോധനകള് നടത്തിവരികയാണെന്നും ലേബര് കമ്മീഷണര് പറഞ്ഞു.
മെയ് 15 വരെ രാവിലെ 7 മുതല് വൈകുന്നേരം 7 മണി വരെയുള്ള സമയത്തില് എട്ട് മണിക്കൂറായി ജോലി സമയം നിജപ്പെടുത്തി ഉത്തരവായിട്ടുണ്ട്. പകല് സമയം ജോലി ചെയ്യുന്ന എല്ലാ തൊഴിലാളികള്ക്കും ഉച്ചയ്ക്ക് 12 മുതല് വൈകുന്നേരം മൂന്ന് മണിവരെ വിശ്രമവേളയായിരിക്കും. ഷിഫ്റ്റ് വ്യവസ്ഥയില് ജോലി ചെയ്യുന്ന തൊഴിലാളികള്ക്ക് ഷിഫ്റ്റുകള് ഉച്ചയ്ക്ക് 12 മണിക്ക് അവസാനിക്കുന്ന തരത്തിലും വൈകുന്നേരം 3 മണിക്ക് ആരംഭിക്കുന്ന തരത്തിലുമാണ് പുനക്രമീകരണം. കണ്സ്ട്രക്ഷന്, റോഡ് നിര്മാണം, തോട്ടം മേഖലകളില് വരും ദിവസങ്ങളില് കര്ശന പരിശോധന ഉറപ്പാക്കുമെന്നും കമ്മീഷണര് അറിയിച്ചു.
കേരളത്തിലെ എല്ലാ വാർത്തകൾ Kerala News അറിയാൻ എപ്പോഴും ഏഷ്യാനെറ്റ് ന്യൂസ് വാർത്തകൾ. Malayalam News തത്സമയ അപ്ഡേറ്റുകളും ആഴത്തിലുള്ള വിശകലനവും സമഗ്രമായ റിപ്പോർട്ടിംഗും — എല്ലാം ഒരൊറ്റ സ്ഥലത്ത്. ഏത് സമയത്തും, എവിടെയും വിശ്വസനീയമായ വാർത്തകൾ ലഭിക്കാൻ Asianet News Malayalam