സ്ത്രീകൾക്കും മുതിർന്നവർക്കും 'നിഴൽ' പദ്ധതിയുമായി കേരളാ പൊലീസ്
Synopsis
അസമയത്ത് വാഹനം കേടാവുകയും ടയര് പഞ്ചറാവുകയും ചെയ്യുന്നത് മൂലം വഴിയില് കുടുങ്ങിയ വനിതാ യാത്രക്കാര്ക്കും മുതിര്ന്ന പൗരന്മാര്ക്കും 112 എന്ന നമ്പറില് വിളിച്ച് സഹായം അഭ്യര്ത്ഥിക്കാം.
തിരുവനന്തപുരം: അസമയത്ത് വഴിയില് ഒറ്റപ്പെട്ടുപോകുന്ന വനിതായാത്രക്കാര്ക്കും മുതിര്ന്ന പൗരന്മാര്ക്കും സുരക്ഷാഹസ്തവുമായി കേരള പൊലീസ്. ഏത് അടിയന്തിര സാഹചര്യത്തിലും ആവശ്യമായ സഹായം എത്തിക്കാന് തിരുവനന്തപുരത്തെ പൊലീസ് ആസ്ഥാനത്തെ കമാന്റ് സെന്ററില് പ്രത്യേക സംവിധാനം നിലവില് വന്നു. 'നിഴൽ' എന്ന് പേരിട്ടിരിക്കുന്ന ഈ സംവിധാനത്തിലേയ്ക്ക് കേരളത്തിലെ എല്ലാ ജില്ലയില് നിന്നും ഏത് സമയവും ഫോണ് മുഖേന ബന്ധപ്പെടാവുന്നതാണ്.
അസമയത്ത് വാഹനം കേടാവുകയും ടയര് പഞ്ചറാവുകയും ചെയ്യുന്നത് മൂലം വഴിയില് കുടുങ്ങിയ വനിതാ യാത്രക്കാര്ക്കും മുതിര്ന്ന പൗരന്മാര്ക്കും 112 എന്ന നമ്പറില് വിളിച്ച് സഹായം അഭ്യര്ത്ഥിക്കാം. രാത്രി ഒറ്റയ്ക്ക് സഞ്ചരിക്കുന്ന വനിതകള്ക്ക് പൊലീസ് സഹായം എത്തിക്കാനും ഈ സംവിധാനം വഴി സാധിക്കും. ഒറ്റയ്ക്ക് താമസിക്കുന്ന സ്ത്രീകള്ക്കും മുതിര്ന്ന പൗരന്മാര്ക്കും ഏത് ആവശ്യത്തിനും ഏത് സമയത്തും ഈ സൗകര്യം വിനിയോഗിക്കാവുന്നതാണ്.
പൊലീസ് ആസ്ഥാനത്തെ 24 മണിക്കൂറും പ്രവര്ത്തിക്കുന്ന കമാന്റ് സെന്ററിലാണ് ഫോണ്കോള് ലഭിക്കുക. വിളിക്കുന്നയാള് ഉള്ള സ്ഥലം ആധുനിക സാങ്കേതികവിദ്യയുടെ സഹായത്തോടെ കൃത്യമായി മനസിലാക്കാന് കമാന്റ് സെന്ററിന് കഴിയും. നമ്പര് ഡയല് ചെയ്യാന് സാധിക്കാത്ത സാഹചര്യത്തില് ഫോണിന്റെ പവര് ബട്ടണ് മൂന്ന് തവണ അമര്ത്തിയാല് കമാന്റ് സെന്ററില് സന്ദേശം ലഭിക്കുകയും പൊലീസ് ഉദ്യോഗസ്ഥര് തിരികെ വിളിച്ച് വിവരം അന്വേഷിക്കുകയും ചെയ്യും.
112 ഇന്ത്യ എന്ന മൊബൈല് ആപ്പിലെ പാനിക് ബട്ടണ് അമര്ത്തിയാലും കമാന്റ് സെന്ററില് സന്ദേശമെത്തും. പൊതുജനങ്ങള് ഈ സൗകര്യം പരമാവധി വിനിയോഗിക്കണമെന്ന് സംസ്ഥാന പൊലീസ് മേധാവി ലോക്നാഥ് ബെഹ്റ അഭ്യര്ത്ഥിച്ചു.
കേരളത്തിലെ എല്ലാ വാർത്തകൾ Kerala News അറിയാൻ എപ്പോഴും ഏഷ്യാനെറ്റ് ന്യൂസ് വാർത്തകൾ. Malayalam News തത്സമയ അപ്ഡേറ്റുകളും ആഴത്തിലുള്ള വിശകലനവും സമഗ്രമായ റിപ്പോർട്ടിംഗും — എല്ലാം ഒരൊറ്റ സ്ഥലത്ത്. ഏത് സമയത്തും, എവിടെയും വിശ്വസനീയമായ വാർത്തകൾ ലഭിക്കാൻ Asianet News Malayalam