മലപ്പുറം വളാഞ്ചേരിയിൽ ബസും ബൈക്കും തമ്മിൽ കൂട്ടിയിടിച്ച് ഇതര സംസ്ഥാനക്കാരായ രണ്ടുപേർക്ക് ദാരുണാന്ത്യം

ബൈക്ക് യാത്രികരായ ആസാം സ്വദേശികളായ അമീൻ, രാഹുൽ എന്നിവരാണ് മരിച്ചത്. 

മലപ്പുറം: മലപ്പുറം വളാഞ്ചേരിയിൽ ബസും ഇരു ചക്ര വാഹനവും കൂട്ടിയിടിച്ചു രണ്ട് പേർക്ക് ദാരുണാന്ത്യം. ബൈക്ക് യാത്രികരായ ആസാം സ്വദേശികളായ അമീൻ, രാഹുൽ എന്നിവരാണ് മരിച്ചത്. 

അതേസമയം, ഇടുക്കിയിൽ നിന്നാണ് മറ്റൊരു അപകട വാർത്ത. അടിമാലിക്ക് സമീപം ചീയപ്പാറയിൽ കാർ കൊക്കയിലേക്ക് മറിഞ്ഞ് കാറിൽ യാത്ര ചെയ്തിരുന്ന നാലു പേർക്ക് പരിക്കേറ്റു. അടിമാലി പൊളിഞ്ഞപാലം സ്വദേശികളായ അബ്ദുൾ ഖാദർ, ഭാര്യ റജീന, അയൽവാസികളായ ബിജു, ലാലി എന്നിവർക്കാണ് പരിക്കേറ്റത്. ചീയപ്പാറ വെള്ളച്ചാട്ടത്തിന് സമീപത്താണ് അപകടം നടന്നത്. കൊച്ചി നെടുമ്പാശ്ശേരി വിമാനത്താവളത്തിൽ നിന്നും മടങ്ങി വരുംവഴിയാണ് അടിമാലിയിൽ വെച്ച് അപകടമുണ്ടായത്. റോഡിൽ നിന്നും 150 അടിയോളം താഴ്ചയിലേക്കാണ് കാർ വീണത്. അടിമാലിയിൽ നിന്നും അഗ്നിശമന സേനയെത്തി വടം കെട്ടിയാണ് അപകടത്തിൽ പെട്ടവരെ റോഡിലേക്ക് എത്തിച്ചത്. ആരുടെയും പരിക്ക് ഗുരുതരമല്ല.