മാസപ്പടി കേസ്: എസ്ഐടി രൂപീകരിച്ച ഉത്തരവിൽ നിയമപ്രശ്നമുണ്ടെന്ന് ഷോൺ ജോർജ്, 'കേസ് സിബിഐക്ക് വിടണം'

മാസപ്പടി കേസിൽ എസ്ഐടി രൂപീകരിച്ച ഉത്തരവിൽ നിയമപ്രശ്നമുണ്ടെന്ന് ബി ജെ പി നേതാവ് ഷോൺ ജോർജ്. ഇഡി കത്ത് കൊടുത്തത് ഡിജിപിക്കാണ്. എന്നാൽ അന്വേഷണത്തിന് നിർദേശം നൽകാൻ ആഭ്യന്തര മന്ത്രിക്ക് കഴിയില്ലെന്നും ഷോണ്‍ ജോര്‍ജ്.

തിരുവനന്തപുരം: മാസപ്പടി കേസിൽ എസ്ഐടി രൂപീകരിച്ച ഉത്തരവിൽ നിയമപ്രശ്നമുണ്ടെന്ന് ബി ജെ പി നേതാവ് ഷോൺ ജോർജ്. ഇഡി കത്ത് കൊടുത്തത് ഡിജിപിക്കാണ്. എന്നാൽ അന്വേഷണത്തിന് നിർദേശം നൽകാൻ ആഭ്യന്തര മന്ത്രിക്ക് കഴിയില്ല. ആഭ്യന്തര മന്ത്രി ആരോപണ വിധേയനാണ്. അദ്ദേഹമാണ് എഫ്ഐആർ ഇടേണ്ടതില്ലെന്ന് പറഞ്ഞതെന്നും ഷോൺ ജോർജ് പറഞ്ഞു. മുഖ്യമന്ത്രി ഹരിത എംഎൽഎ എന്ന് അവകാശപ്പെട്ട ആളാണ്. മാലിന്യം തള്ളുന്നവരിൽ നിന്ന് പണം വാങ്ങിയെന്നും കാപട്യം എന്താണെന്നു മുഖ്യമന്ത്രിയെ കണ്ടുപഠിക്കണമെന്നും ഷോൺ ജോർജ് പറഞ്ഞു.

പലരും പണം വാങ്ങിയിട്ടുണ്ട്. സംഘടനകൾ, മാധ്യമങ്ങൾ എല്ലാം പണം വാങ്ങിയിട്ടുണ്ട്. പണം വാങ്ങിയവരിൽ അധികാരത്തിൽ ഇരുന്നവരാണ്. അതാണ് ഗൗരവം. കമ്പനിക്ക് ഒത്താശ ചെയ്തവരാണ്. മുഖ്യമന്ത്രിയും കേസിൽ പ്രതിയാണ്. എസ്ഐടി മുഖ്യമന്ത്രിയെയും ചോദ്യം ചെയ്യുമോ. കേസ് സിബിഐക്ക് വിടണമെന്നും ഇനി നടക്കുന്ന അന്വേഷണം തെളിവുകൾ തേച്ചുമായ്ച്ചു കളയാൻ ഉള്ളതാണെന്നും ഷോൺ ജോർജ് പറഞ്ഞു. തന്റെ കയ്യിൽ കിട്ടിയതിൽ ബിജെപി നേതാക്കളുടെ പേരില്ല. മറുനാടൻ ഷാജൻ അയച്ചുതന്നതാണെന്നും ഷോൺ ജോർജ് കൂട്ടിച്ചേർത്തു.

മാസപ്പടി കേസിൽ മുഖ്യമന്ത്രി വി ഡി സതീശന്‍റെയും പ്രതിപക്ഷ നേതാവ് പിണറായി വിജയന്‍റെയുമടക്കം നിരവധി പ്രമുഖരുടെ പേരുമുണ്ടെന്നാണ് ഷോൺ ജോർജിൻ്റെ വെളിപ്പെടുത്തൽ. എൻഫോഴ്സ്മെന്റ് ഏജൻസിയായ എസ് എഫ് ഐ ഒ (SFIO) കോടതിയിൽ സമർപ്പിച്ച രേഖകൾ പുറത്തുവിട്ടാണ് ബി ജെ പി നേതാവ് രംഗത്തെത്തിയിരിക്കുന്നത്. സി എം ആർ എൽ മാനേജിംഗ് ഡയറക്ടർ ശശിധരൻ കർത്തായിൽ നിന്ന് പിടിച്ചെടുത്ത ഡയറിയിലെ സുപ്രധാന എൻട്രികൾ അടങ്ങിയ പേജാണ് ഷോൺ ജോർജ് പങ്കുവെച്ചത്. എൽ ഡി എഫ്, യു ഡി എഫ് പ്രമുഖ നേതാക്കളുടെ പേരുകൾ വ്യക്തമായി കുറിച്ചിട്ടുള്ള പേജിൽ മുഖ്യമന്ത്രി വി ഡി സതീശനും ഉൾപ്പെട്ടത് ചൂണ്ടിക്കാട്ടിയ ഷോൺ, മാസപ്പടി കേസിൽ ഇ ഡിയുടെ കത്തിൽ സംസ്ഥാന സർക്കാർ പിണറായിക്കെതിരെ വിജിലൻസ് അന്വേഷണം പ്രഖ്യാപിക്കാത്തതിന്‍റെ കാരണം ഇതാണെന്നാണ് പറഞ്ഞുവച്ചിരിക്കുന്നത്. പിണറായി വിജയന്റെ പേര് 'പി വി' എന്നല്ല, 'പിണറായി' എന്ന് തന്നെയാണ് ഡയറിയിൽ രേഖപ്പെടുത്തിയിരിക്കുന്നതെന്നും വ്യക്തമായിട്ടുണ്ട്.

പേരുകൾ ഇങ്ങനെ

ഉമ്മൻ ചാണ്ടി, രമേശ് ചെന്നിത്തല, വി എസ് അച്ചു..., കെ മുരളീധരൻ, സി കെ ചന്ദ്രപ്പൻ, എളമരം കരീം, ഗോവിന്ദൻ മാസ്റ്റർ, ഹൈബി ഈഡൻ, പന്ന്യൻ രവീന്ദ്രൻ, എസ് ശർമ്മ, പി രാജീവ്, ഷിബു ബേബി ജോൺ, കെ ബി ഗണേഷ് കുമാർ തുടങ്ങിയ രാഷ്ട്രീയ നേതാക്കളുടെ പേരുകൾ അടങ്ങിയ താളാണ് പുറത്തുവന്നിട്ടുള്ളത്. പുറത്തുവന്ന കണക്കുകൾ നിരവധിയായ ചോദ്യങ്ങൾക്ക് മറുപടി നൽകുന്നതാണെന്നും ഇത്രയും വ്യക്തമായ തെളിവുകൾ ഉണ്ടായിട്ടും വിഷയം വിജിലൻസ് അന്വേഷിക്കാത്തത് എന്തുകൊണ്ടാണെന്നും ഷോൺ ജോർജ് ചോദ്യമുന്നയിച്ചു.