'ഈ സർക്കാർ ബിജെപിയുടെ ബി ടീമല്ല, മറിച്ച് ഒറിജിനൽ ടീം'; യുഡിഎഫ് സർക്കാരിനെതിരെ അതിരൂക്ഷ വിമർശനവുമായി മുൻ മന്ത്രി പി രാജീവ്

മുൻ മന്ത്രി പി രാജീവ്, കോൺഗ്രസ് നേതാവ് രാഹുൽ ഗാന്ധിയെയും സംസ്ഥാന സർക്കാരിനെയും രൂക്ഷമായി വിമർശിച്ചു. വിദേശയാത്രയുടെ പേരിൽ രാഹുലിനെയും, നീറ്റ് സമരത്തിൽ വിദ്യാർത്ഥികൾക്കെതിരെ കേസെടുത്തതിന് സർക്കാരിനെയും അദ്ദേഹം കുറ്റപ്പെടുത്തി. യുഡിഎഫ് സർക്കാർ ബിജെപിയുടെ ബി ടീമല്ല, മറിച്ച് ഒറിജിനൽ ടീമാണെന്നും അദ്ദേഹം ആരോപിച്ചു.

തിരുവനന്തപുരം: കോൺഗ്രസ് നേതാവ് രാഹുൽ ഗാന്ധിക്കും സംസ്ഥാന സർക്കാരിനുമെതിരെ രൂക്ഷവിമർശനവുമായി മുൻ മന്ത്രി പി രാജീവ്. ഡിവൈഎഫ്ഐ ജില്ലാ പ്രസിഡന്റായി ആദ്യമായി ഒരു യുവതിയെ തിരഞ്ഞെടുത്തതിനെ അഭിനന്ദിച്ചുകൊണ്ട് സംസാരിക്കുകയായിരുന്നു അദ്ദേഹം. വിദേശയാത്ര കാരണം മൂന്ന് പ്രതിഷേധ റാലികളാണ് രാഹുൽ ഗാന്ധി മാറ്റിവെച്ചതെന്ന് പി രാജീവ് പരിഹസിച്ചു. രാജ്യം മുഴുവൻ സമരം ചെയ്തപ്പോൾ ജൂലൈ 21-ാം തീയതി മാത്രം സമരം ചെയ്ത കോൺഗ്രസിന്റെ നടപടി വളരെ "അഭിനന്ദനാർഹമാണ്" എന്നും അദ്ദേഹം പരിഹാസരൂപേണ കൂട്ടിച്ചേർത്തു.

നീറ്റ് പരീക്ഷാ ക്രമക്കേട് വിവാദത്തിൽ വിദ്യാർത്ഥികൾക്കെതിരെ കേസെടുത്ത പ്രതിപക്ഷം ഭരിക്കുന്ന ഏക സംസ്ഥാനമാണ് കേരളമെന്ന് അദ്ദേഹം കുറ്റപ്പെടുത്തി. വേടനെതിരെ കേസ് എടുത്ത നടപടിയെയും അദ്ദേഹം രൂക്ഷമായി വിമർശിച്ചു. കേവലം പാട്ട് പാടിയതിന് കേസെടുക്കുന്ന ഇത്തരം ഒരു സ്ഥിതി ബിജെപി ഭരിക്കുന്ന സംസ്ഥാനങ്ങളിൽ പോലും ഇല്ലെന്ന് അദ്ദേഹം ചൂണ്ടിക്കാട്ടി. യുഡിഎഫ് സർക്കാരിനെതിരെ അതിരൂക്ഷ വിമർശനമുന്നയിച്ച പി. രാജീവ്, ഈ സർക്കാർ ബിജെപിയുടെ ബി ടീമല്ല, മറിച്ച് ഒറിജിനൽ ടീമാണെന്നും കുറ്റപ്പെടുത്തി.