ദേശീയപാത നിർമ്മാണത്തിലെ പാളിച്ച: നടപടികൾ വിശദീകരിച്ച് ഗതാ​ഗത മന്ത്രാലയം, ഹാരിസ് ബീരാൻ എംപിയുടെ ചോദ്യങ്ങൾക്ക് മറുപടി

കൂരിയാട്ടെ തകർച്ചയിൽ കെഎൻആർ കൺസ്ട്രക്ഷൻ കമ്പനിക്ക് ഷോ കോസ് നോട്ടീസ് നൽകി.

ദില്ലി: ദേശീയപാത 66ലെ നിർമ്മാണത്തിലെ പാളിച്ചയുമായി ബന്ധപ്പെട്ട് സ്വീകരിച്ച നടപടികൾ വിശദീകരിച്ച് ​ഉപരിതല ​ഗതാ​ഗത മന്ത്രാലയം. ജൂൺ, ജൂലൈ മാസങ്ങളിലായി വിദ​ഗ്ധസമിതി കേരളത്തിലുടനീളം പരിശോധന നടത്തിയെങ്കിലും അന്തിമ റിപ്പോർട്ട് ലഭിച്ചിട്ടില്ല. കാസർകോഡ് ചെങ്ങളയിലെ തകർച്ചയിൽ മേഘ എഞ്ചിനീയറിം​ഗ് കമ്പനിക്ക് പിഴ ചുമത്തി കാരണം കാണിക്കൽ നോട്ടീസ് നൽകിയെന്നും ഗതാ​ഗത മന്ത്രാലയം വിശദീകരിച്ചു. ഹാരിസ് ബീരാൻ എംപിയുടെ ചോദ്യങ്ങൾക്ക് മറുപടിയായാണ് ഇക്കാര്യങ്ങൾ അറിയിച്ചത്.

കൂരിയാട്ടെ തകർച്ചയിൽ കെഎൻആർ കൺസ്ട്രക്ഷൻ കമ്പനിക്ക് ഷോ കോസ് നോട്ടീസ് നൽകി. 1 വർഷത്തേക്ക് വിലക്കേർപ്പെടുത്തി. എൻഎച്ച്എഐ പ്രോജക്ട് ഡയറക്ടറെ സസ്പെൻഡ് ചെയ്തു. സൈറ്റ് എഞ്ചിനീയറെ പിരിച്ചുവിട്ടതായും ഗതാ​ഗത മന്ത്രാലയം പറയുന്നു. തുറവൂരിലെ തകർച്ചയിൽ കൺസൾട്ടന്റിനെയും കോൺ​ട്രാക്ടറെയും സസ്പെൻഡ് ചെയ്തു. കോൺ​ട്രാക്ടർക്ക് 15.4 ലക്ഷം പിഴചുമത്തി. കൊല്ലം ബൈപ്പാസ് കടമ്പാട്ടുകോണത്തെ തകർച്ചയിൽ കരാറുകാരന് 9.55 ലക്ഷം പിഴയിട്ടതായും എഞ്ചിനീയറെ പിരിച്ചുവിട്ടതായും ഗതാ​ഗത മന്ത്രാലയം വ്യക്തമാക്കി.